പാലക്കാട്: പാലക്കാട്ടെ സ്ത്രീകളുടെയും കുട്ടികളുടെയും ആശുപത്രി ചോര്‍ന്നൊലിക്കുന്നു. ജില്ലയില്‍ ഏറ്റവും അധികം പ്രസവം നടക്കുന്ന ആശുപത്രിയായ ഇവിടെ ലേബര്‍ റൂം, കുട്ടികളുടെ വാര്‍ഡ്, ആന്റിനേറ്റര്‍ വാര്‍ഡ് എന്നിവിടങ്ങളിലാണ് ചോര്‍ച്ചയുള്ളത്. മഴ പെയ്യുമ്പോള്‍ ലേബര്‍ റൂം നന്നായി ചോര്‍ന്നൊലിക്കും. ആന്റിനേറ്റല്‍ വാര്‍ഡിലെ ചോര്‍ച്ച അധികമായതിനാല്‍ അവിടെയുളള രോഗികളെ വാര്‍ഡിന്റെ മറ്റൊരുഭാഗത്തേക്കു മാറ്റിയിരിക്കുയാണ്.

കെട്ടിടത്തില്‍ ഷീറ്റിട്ടാല്‍ ചോര്‍ച്ചയക്ക് തല്‍ക്കാല പരിഹാരം കാണാന്‍ കഴിയും. ആശുപത്രി വികസന സമിതി അംഗങ്ങള്‍ മഴയുടെ തുടക്കത്തില്‍ തന്നെ വിഷയം സംബന്ധിച്ച് പരാതി നല്‍കിയിട്ടുണ്ട്. എത്രയും വേഗം പ്രശ്‌നങ്ങള്‍ പരിഹരിച്ചില്ലെങ്കില്‍ ഗര്‍ഭിണികള്‍ തറയില്‍ വീണോ മറ്റോ അപകടങ്ങള്‍ സംഭവിക്കാമെന്നും ആശുപത്രി വികസന സമിതി ചൂണ്ടിക്കാട്ടി.