കൊച്ചി: കളമശ്ശേരി പോളിടെക്നിക് ഹോസ്റ്റലിൽ നിന്ന് കഞ്ചാവ് പിടികൂടിയ കേസിലെ മുഖ്യ പ്രതി അജയ് പ്രദാനെ ഒഡിഷയിൽ നിന്ന് പിടികൂടി. ഒഡിഷയിലെ ദരിങ്ക്ബാദിൽ നിന്നാണ് ഒഡിഷാ സ്വദേശിയായ പ്രതിയെ പിടികൂടിയത്. കളമശ്ശേരി പൊലിസ് നടത്തിയ അന്വേഷണത്തിലാണ് പ്രതി വലയിലായത്. നേരത്തെ കേസിൽ ഏഴ് പേർ അറസ്റ്റിലായിരുന്നു.

കേസുമായി ബന്ധപ്പെട്ട് നാലു വിദ്യാർഥികളെയും മൂന്ന് ഇതര സംസ്ഥാനക്കാരെയും പൊലിസ് നേരത്തെ അറസ്റ്റ് ചെയ്തിരുന്നു. ഇതിന് പിന്നാലെയാണ് ഇപ്പോൾ മുഖ്യപ്രതിയും പൊലിസിന്റെ പിടിയിലാകുന്നത്. കേസിൽ അറസ്റ്റിലായ വിദ്യാർഥികളായ ആകാശ്, ആദിത്യൻ, അഭിരാജ്, അനുരാജ് എന്നിവരെ കോളജ് പുറത്താക്കിയിരുന്നു. കോളേജിലെ ആഭ്യന്തര അന്വേഷണ സമിതിയുടെ റിപ്പോർട്ടിന്റെ അടിസ്ഥാനത്തിലായിരുന്നു ഇവരെ പുറത്താക്കിയത്.

ALSO READ: ഉത്തരേന്ത്യയില്‍ യാത്ര ചെയ്യുമ്പോള്‍ സഭാവസ്ത്രം ഉപേക്ഷിക്കാന്‍ നിര്‍ദേശം, നടപടി മലയാളി കന്യാസ്ത്രീകളുടെ അറസ്റ്റിന് പിന്നാലെ; മതസ്വാതന്ത്ര്യം അപകടത്തിലെന്ന് കെ.സി.ബി.സി

മാർച്ചിലാണ് കേസിനാസ്പദമായ സംഭവം നടന്നത്. എറണാകുളം കളമശ്ശേരി പോളിടെക്നിക് കോളേജിലെ ഹോസ്റ്റലിൽ പൊലീസ് നടത്തിയ റെയ്ഡിൽ 2 കിലോ കഞ്ചാവും മദ്യവും കണ്ടെത്തുകയായിരുന്നു. ഹോളി ആഘോഷത്തിൻറെ ഭാഗമായി ലഹരിപ്പാർട്ടി നടത്തുന്നുണ്ടെന്നും ഇതിനായി വിദ്യാ‍ർഥികളുടെ കൈയിൽ നിന്ന് പണപ്പിരിവ് നടത്തിയെന്നും പൊലിസിനു ലഭിച്ച രഹസ്യ വിവരത്തിന്റെ അടിസ്ഥാനത്തിലായിരുന്നു റെയ്ഡ്. ഇപ്പോൾ പിടിയിലായ ഒഡിഷ സ്വദേശി അജയ് പ്രദാനാണ് ഹോസ്റ്റലിലേക്ക് എത്തിക്കാൻ ഇതര സംസ്ഥാനക്കാരുടെ സംഘത്തിന് കഞ്ചാവ് കൈമാറിയത്.