ന്യൂഡൽഹി: ഏഷ്യാ കപ്പ് ടി20 ടൂർണമെന്റ് സെപ്റ്റംബർ ഒന്നുമുതൽ 28 വരെ യു.എ.ഇയിൽവെച്ച് നടക്കുമെന്ന് ഏഷ്യൻ ക്രിക്കറ്റ് കൗൺസിൽ (എസിസി) ഔദ്യോഗികമായി അറിയിച്ചു. എ.സി.സി അധ്യക്ഷനും പാക് ക്രിക്കറ്റ് ബോർഡ് ചെയർമാനുമായ മുഹ്‌സിൻ നഖ്‌വി സാമൂഹികമാധ്യമമായ എക്‌സിലൂടെ പ്രഖ്യാപനം നടത്തുകയായിരുന്നു. ഏവരും ഉറ്റുനോക്കുന്ന ഇന്ത്യപാകിസ്താൻ പോരാട്ടം സെപ്റ്റംബർ 14നാണ്. ആറ് ടീമുകൾ പങ്കെടുക്കുന്ന ടൂർണമെന്റിൽ 19 മത്സരങ്ങളാണുണ്ടാവുക. ഇന്ത്യയും പാകിസ്താനും യു.എ.ഇയും ഒമാനും ഒരേ ഗ്രൂപ്പിലാണ്. ശ്രീലങ്ക, ബംഗ്ലാദേശ്, അഫ്ഗാനിസ്താൻ, ഹോങ്കോങ് എന്നീ രാജ്യങ്ങൾ രണ്ടാമത്തെ ഗ്രൂപ്പിലും. 

ഓരോ ഗ്രൂപ്പിൽനിന്നും രണ്ടു ടീമുകൾ സൂപ്പർ ഫോറിലേക്ക് യോഗ്യത നേടും. സൂപ്പർ ഫോറിൽ ഓരോ ടീമും മറ്റ് മൂന്ന് ടീമുകളുമായി ഓരോ തവണ ഏറ്റുമുട്ടും. ഇതിൽ മികച്ച രണ്ട് ടീമുകൾ ഫൈനലിൽ കളിക്കും. ടീമുകൾ സെപ്റ്റംബർ ഏഴോടെ യു.എ.ഇയിലെത്തും. 2023 ഏഷ്യാ കപ്പിൽ നിലവിലെ ചാംപ്യന്മാരാണ് ഇന്ത്യ. 50 ഓവർ ഫോർമാറ്റിൽ നടന്ന മത്സരത്തിൽ ഫൈനലിൽ ശ്രീലങ്കയെ തകർത്താണ് ഇന്ത്യ കിരീടം നേടിയത്. ഈ മാസം 24ന്് ബംഗ്ലാദേശ് തലസ്ഥാനമായ ധാക്കയിൽ 25 അംഗരാജ്യങ്ങളും ചേർന്ന എ.സി.സി യോഗത്തിലാണ് ഏഷ്യാകപ്പ് ആതിഥേയത്വവും ഷെഡ്യൂളും സംബന്ധിച്ച അന്തിമ തീരുമാനമുണ്ടായത്. ബി.സി.സി.ഐയെ പ്രതിനിധാനംചെയ്ത് രാജീവ് ശുക്ല ഓൺലൈനായി പങ്കെടുത്തിരുന്നു. 

ALSO READ: പി.എസ്.സി റാങ്ക് ലിസ്റ്റ് വന്നിട്ടും പൊലിസ് തസ്തികകളിൽ നിയമനമില്ല; ഒഴിവുകൾ റിപ്പോർട്ട് ചെയ്യപ്പെടുന്നില്ല

ടി20 ഫോർമാറ്റിലായിരിക്കും ഏഷ്യാ കപ്പ് ടൂർണമെന്റ്. 2026ൽ ഇന്ത്യയും ശ്രീലങ്കയും സംയുക്തമായി ആതിഥേയത്വം വഹിക്കുന്ന ഐ.സി.സി പുരുഷ ടി20 ലോകകപ്പിന് മുന്നോടിയായുള്ള ഒരുക്കങ്ങളുടെ ഭാഗമെന്ന നിലയിലാണ് ഈ മാറ്റം.
പഹൽഗാം ഭീകരാക്രമണത്തിനു പിന്നാലെ ഏഷ്യാ കപ്പ് ടി20 ടൂർണമെന്റ് ആതിഥേയത്വം സംബന്ധിച്ച് അനിശ്ചിതത്വം നിലനിന്നിരുന്നു. ദുബായ്, അബുദാബി എന്നിവിടങ്ങളിൽ ടൂർണമെന്റ് നടത്താൻ തയ്യാറാണെന്ന് ബി.സി.സി.ഐ അറിയിച്ചിട്ടുണ്ട്. എട്ട് ടീമുകൾ പങ്കെടുക്കുന്ന ഏഷ്യാ കപ്പിന്റെ ആതിഥേയത്വാവകാശം ബി.സി.സി.ഐക്കാണ്. പഹൽഗാം ഭീകരാക്രമണത്തിനു പിന്നാലെ ഇന്ത്യ ടൂർണമെന്റിന് ആതിഥേയത്വം വഹിക്കില്ലെന്ന് അറിയിച്ചിരുന്നു.