തിരുനാവായ (മലപ്പുറം): പി.എസ്.സി റാങ്ക് ലിസ്റ്റ് നിലവിൽവന്നിട്ടും പൊലിസ് തസ്തികകളിൽ നിയമനം നടക്കുന്നില്ല. പൊലിസ് കോൺസ്റ്റബിൾ തസ്തികകളിലെ ഒഴിവുകൾ പി.എസ്‌.സിയിൽ റിപ്പോർട്ട് ചെയ്യാതെ നീട്ടിക്കൊണ്ടുപോകുന്നതാണ് ഇതിനു കാരണം. ഏഴു ബറ്റാലിയനിലായി പൊലിസ് കോൺസ്റ്റബിൾ റാങ്ക് ലിസ്റ്റ് നിലവിൽ വന്നത് ഈ വർഷം ഏപ്രിൽ 16നാണ്. 3,115 പേരെ റാങ്ക് ലിസ്‌റ്റിൽ ഉൾപ്പെടുത്തിയിട്ടുണ്ട്. ഒരു ബറ്റാലിയനിലും ഒന്നാം റാങ്ക് ലഭിച്ചയാൾക്കുപോലും നിയമനം നൽകിയിട്ടില്ല. ഒരു വർഷ കാലാവധിയുള്ള റാങ്ക് ലിസ്റ്റുകളുടെ സമയപരിധിയുടെ നാലിൽ ഒന്ന് തീർന്നിട്ടും നിയമനനടപടികൾ ആരംഭിക്കാത്തതിൽ ഉദ്യോഗാർഥികൾ നിരാശയിലാണ്.

തിരുവനന്തപുരം, തൃശൂർ,  കാസർകോട് ബറ്റാലിയനുകളിലായി 10 എൻ.ജെ.ഡി ഒഴിവുകൾ മാത്രമാണ് റിപ്പോർട്ട് ചെയ്‌തിട്ടുള്ളത്. മുൻ റാങ്ക് ലിസ്റ്റിൽ നിന്ന് എല്ലാ ബറ്റാലിയനിലുമായി 2,623 പേർക്കാണു നിയമന ശുപാർശ ലഭിച്ചത്. ഈ വർഷം ഏപ്രിൽ 21നു നിലവിൽവന്ന വനിതാ പൊലിസ് കോൺസ്റ്റബിൾ റാങ്ക് ലിസ്‌റ്റിൽ 370 പേരെയാണ് ഉൾപ്പെടുത്തിയിട്ടുള്ളത്. ഇതുവരെ ഒറ്റ ഒഴിവും റിപ്പോർട്ട് ചെയ്‌തിട്ടില്ല. മുൻ ലിസ്റ്റിൽ നിന്ന് 361 പേർക്കു നിയമന ശുപാർശ ലഭിച്ചിരുന്നു. സംസ്ഥാന തലത്തിലാണ് ഈ തസ്തികയിൽ നിയമനം നടക്കുക. 

ALSO READ: പ്രതിഷേധത്തെത്തുടര്‍ന്ന് ദിവസവും 10 മണിക്കൂര്‍ ആക്രമണം നിര്‍ത്താന്‍ തീരുമാനിച്ച് ഇസ്‌റാഈല്‍; പിന്നാലെ ഗസ്സയിലേക്ക് സഹായമെത്തിച്ച് യുഎഇയും ജോര്‍ദാനും | Israel War on Gaza 

മുൻ റാങ്ക് ലിസ്റ്റുകളെ അപേക്ഷിച്ച് ഇത്തവണ ലിസ്‌റ്റിൽ ഉൾപ്പെടുത്തിയവരുടെ എണ്ണം വളരെ കുറവാണ്. നിയമനം കുറയുന്നതിനനുസരിച്ചു ലിസ്‌റ്റിൽ ഉൾപ്പെടുത്തുന്നവരുടെ എണ്ണം കുറച്ച് പി.എസ്‌.സി സർക്കാരിനെ സഹായിക്കുകയാണെന്നാണ് ഉദ്യോഗാർഥികളുടെ പരാതി. വിവിധ കമ്മിഷനുകൾ നിർദേശിച്ചത് പ്രകാരം ജോലിഭാരത്തിനനുസരിച്ചു തസ്‌തിക സൃഷ്ടിക്കാത്തതും സേനയിലെ വനിതാ പ്രാതിനിധ്യം വർധിപ്പിക്കാനുള്ള തീരുമാനം നടപ്പാക്കാത്തതുമെല്ലാമാണ് ഉദ്യോഗാർഥികൾക്ക് തിരിച്ചടിയാകുന്നത്. വർഷംതോറും വിജ്‌ഞാപനം പ്രസിദ്ധീകരിച്ച് റാങ്ക് പട്ടിക തയാറാക്കി, പിന്നീട് നിയമനം നടത്താതെ ഉദ്യോഗാർഥികളെ കമ്പളിപ്പിക്കുന്ന നടപടി അവസാനിപ്പിക്കണമെന്ന ആവശ്യമാണ് ഉയർന്നുവന്നിട്ടുള്ളത്.