നമ്മള്‍ എല്ലാ ദിവസവും പച്ചക്കറികള്‍ കഴിക്കാറുണ്ട്. അതില്‍ തന്നെ ഉരുളക്കിഴങ്ങും കഴിക്കാറുണ്ട്. കറിവച്ചും പുഴുങ്ങിയും പലഹാരമുണ്ടാക്കിയും എല്ലാം. പാചകത്തിനു വളരെ എളുപ്പത്തില്‍ ഉപയോഗിക്കാവുന്ന പച്ചക്കറിയാണ് ഉരുളക്കിഴങ്ങ്. എന്നാല്‍ ഈ ഉരുളക്കിഴങ്ങ് നിങ്ങളുടെ ജീവനു ഭീഷണിയായാലോ..? ആരോഗ്യകരമെന്നു പറയപ്പെടുന്ന ഉരുളക്കിഴങ്ങ് കഴിച്ചു 27 കാരന്‍ ആശുപത്രിയിലായ വാര്‍ത്ത എല്ലാവരെയും ഞെട്ടിച്ചിരുന്നു.

ഉരുളക്കിഴങ്ങു കഴിച്ച ശേഷം ഈ യുവാവിന്റെ അവസ്ഥ വഷളാവുകയും യുവാവിനെ ഐസിയുവില്‍ പ്രവേശിപ്പിക്കേണ്ടിയും വന്നു. ആരോഗ്യകരമെന്നു കരുതപ്പെടുന്ന ഉരുളക്കിഴങ്ങ് ശരീരത്തിന് എങ്ങനെ വിഷമായി മാറി എന്നത് നമുക്ക് നോക്കാം.  

  
ഏറെ ഇഷ്ടത്തോടെയാണ് ഉരുളക്കിഴങ്ങ് കറിയും വറുത്തതും പൊരിച്ചതുമൊക്കെ നമ്മള്‍ കഴിക്കാറുള്ളത്. എന്നാല്‍ എപ്പോഴാണ് ഇത് നമ്മുടെ ജീവിതത്തില്‍ ശത്രുവാകുന്നത് എന്ന് ചിന്തിച്ചിട്ടുണ്ടോ..?  ഛര്‍ദിയും തലകറക്കവുമായി അബോധാവസ്ഥയിലാണ് 27 വയസുള്ള യുവാവ് ആശുപത്രിയിലെത്തുന്നത്. അയാളുടെ രക്തസമ്മര്‍ദ്ദം വളരെ കുറവായിരുന്നു. ഉടനെ അദ്ദേഹത്തെ ഐസിയുവിലേക്ക് പ്രവേശിപ്പിക്കുകയായിരുന്നു. കാരണം കണ്ടെത്തിയ ഡോക്ടര്‍മാര്‍ ഞെട്ടി. യുവാവ് മുളപ്പിച്ച പച്ച ഉരുളക്കിഴങ്ങ് കഴിച്ചതായിരുന്നു കാരണം. 

മുളപ്പിച്ച ഉരുളക്കിഴങ്ങിലുള്ള അപകടം

മുളപ്പിച്ചതോ പച്ചയോ ആയ ഉരുളക്കിഴങ്ങില്‍ സോളനൈന്‍ എന്ന അപകടകരമായ ഒരു വിഷവസ്തു അടങ്ങിയിട്ടുണ്ട്. ഈ വിഷ വസ്തു നമ്മുടെ നാഡികളെയും ദഹനവ്യവസ്ഥയെയും ആക്രമിക്കുന്നു. ഉരുളക്കിഴങ്ങില്‍ സോളനൈന്‍ സ്വാഭാവികമായും ഉണ്ട്. എന്നാല്‍ ഉരുളക്കിഴങ്ങ് മുളയ്ക്കുമ്പോഴും പച്ചയായി മാറുമ്പോഴും അതിലെ സോളനൈനിന്റെ അളവ് വളരെയധികം വര്‍ധിക്കുന്നതാണ്. 

മുളപ്പിച്ചതോ പച്ചയോ ആയ ഉരുളക്കിഴങ്ങ് ഒരിക്കലും കഴിക്കരുത്. അങ്ങനെ മുളച്ചതോ പച്ചനിറമുള്ളതോ ആയ ഉരുളക്കിഴങ്ങാണ് കൈയിലുള്ളതെങ്കില്‍ അത് കളയുക. ഒരിക്കലും ഉപയോഗിക്കരുത്. 

വെയിലത്ത് വയ്ക്കുന്നത്

ഉരുളക്കിഴങ്ങ് വെയിലത്ത് വയ്ക്കുമ്പോള്‍ അവയിലെ സോളനൈനിന്റെ അളവ് കൂടുന്നതായിരിക്കും. അതിനാല്‍ ഉരുളക്കിഴങ്ങ് എപ്പോഴും ഇരുട്ടുള്ളതും വരണ്ടതുമായ സ്ഥലത്ത് വയ്ക്കാന്‍ ശ്രദ്ധിക്കുക. 

ALSO READ: കറങ്ങിക്കൊണ്ടിരിക്കുന്ന ഹോട്ടല്‍ കണ്ടിട്ടുണ്ടോ ...? ഭക്ഷണപ്രിയരും യാത്രാ പ്രിയരുമാണോ നിങ്ങള്‍..?  ബെര്‍ലിനിലുണ്ട് അതിമനോഹരമായ കറങ്ങുന്ന റസ്റ്ററന്റ്

സോളനൈനിന്റെ ലക്ഷണങ്ങള്‍  തിരിച്ചറിയുക

സോളനൈന്‍ കഴിക്കുന്നത് ഓക്കാനത്തിനും ചര്‍ദ്ദി, വയര്‍വേദന, വയറിളക്കം, തലകറക്കം എന്നിവയക്കൊക്കെ കാരണമാകും. കഠിനമായാല്‍ ഇവ നാഡിക്ക് കേടുപാടുകള്‍ വരുത്തുകയും മരണം പോലും സംഭവിക്കുകയും ചെയ്യാം. 

ഒഴിവാക്കാന്‍ എന്താണ് ചെയ്യേണ്ടത്..? 

ശരിയായ രീതിയില്‍ ഉരുളക്കിഴങ്ങ് സൂക്ഷിക്കുക. ഇത് ഇരുണ്ട അല്ലെങ്കില്‍ വരണ്ട സ്ഥലങ്ങളില്‍ സൂക്ഷിക്കുക. പാന്‍ട്രി അല്ലെങ്കില്‍ കാബിനറ്റ് പോലുള്ളവയില്‍.

ചീഞ്ഞവ- ഉരുളക്കിഴങ്ങ് ചീഞ്ഞു പോയിട്ടുണ്ടെങ്കിലോ മുള വന്നിട്ടുണ്ടെങ്കിലോ അതില്‍ പച്ച നിറത്തിലുള്ള പാടുകള്‍ ഉണ്ടെങ്കിലോ രണ്ടാമതൊന്ന് ആലോചിക്കാന്‍ നില്‍ക്കരുത്. ഉടനെ വലിച്ചെറിയുക. 

ലക്ഷണം കണ്ടാല്‍
ഉരുളക്കിഴങ്ങ് കഴിച്ചതിനു ശേഷം ഛര്‍ദിയോ തലകറക്കമോ കണ്ടാല്‍ ഉടന്‍ തന്നെ ഡോക്ടറെ കാണാന്‍ മടിക്കരുത്.