ദുബൈ: സേവനത്തിന്റെ മഹത്വത്തെയും സാമൂഹിക പ്രതിബദ്ധതയെയും ഉയർത്തിപ്പിടിച്ച്, ദുബൈയുടെ മാനുഷിക മുഖത്തിന് കൂടുതൽ തിളക്കം നൽകാൻ ജി.ഡി.ആർ.എഫ്.എ ദുബൈയും 'താങ്ക്യൂ ഫോർ യുവർ ഗിവിങ്' വളണ്ടിയർ ടീമും കൈ കോർക്കുന്നു. ദേശീയ സംരംഭങ്ങളെ പിന്തുണയ്ക്കുന്നതിനും ജീവകാരുണ്യ പ്രവർത്തനങ്ങൾക്ക് പുതിയ ഊർജം പകരുന്നതിനും ലക്ഷ്യമിട്ട് ഇരു വിഭാഗങ്ങളും തമ്മിൽ കഴിഞ്ഞ ദിവസം ധാരണാപത്രത്തിൽ ഒപ്പുവച്ചു.

എമിറേറ്റിൽ സാമൂഹിക ഉന്നമനം സാധ്യമാക്കാനും ജീവിത നിലവാരം ഉയർത്താനുമുള്ള ശ്രമങ്ങൾക്ക് കരുത്തേകാനും സന്നദ്ധ പ്രവർത്തനങ്ങളുടെ വ്യാപ്തി വർധിപ്പിക്കാനും വഴിയൊരുക്കുന്ന ധാരണാപത്രത്തിൽ ജി.ഡി.ആർ.എഫ്.എ ദുബൈക്ക് വേണ്ടി ഹ്യൂമൻ റിസോഴ്‌സ് ആൻഡ് ഫിനാൻസ് സെക്ടറിലെ അസിസ്റ്റന്റ് ഡയരക്ടർ ജനറൽ മേജർ ജനറൽ അവദ് മുഹമ്മദ് ഗാനിം സായിദ് അൽ അവൈമും, 'താങ്ക്യൂ ഫോർ യുവർ ഗിവിങ്' ടീമിന് വേണ്ടി സ്ഥാപകനും തലവനുമായ സൈഫ് അൽ റഹ്മാൻ അമീറുമാണ് ഒപ്പുവച്ചത്.

'സന്തോഷവും മെച്ചപ്പെട്ട ജീവിത നിലവാരവും എല്ലാവർക്കും ഒരുപോലെ നൽകുന്ന ഒരാഗോള നഗരമായി ദുബൈയെ നിലനിർത്തുന്നതിൽ സാമൂഹിക ഉത്തരവാദിത്തം വലിയ പങ്കുവഹിക്കുന്നുണ്ട്. സന്നദ്ധ സംഘടനകളുമായി ചേർന്ന് പ്രവർത്തിക്കുന്നതിലൂടെ ഈ ലക്ഷ്യം കൂടുതൽ വേഗത്തിൽ കൈവരിക്കാൻ കഴിയുമെന്ന് ഞങ്ങൾ വിശ്വസിക്കുന്നു' -ചടങ്ങിൽ ഒപ്പുവയ്ക്കവേ മേജർ ജനറൽ അൽ അവൈം പറഞ്ഞു.

മനുഷ്യത്വപരമായ സംരംഭങ്ങളെ പിന്തുണയ്ക്കുന്നതിൽ എന്നും മാതൃക കാണിച്ചിട്ടുള്ള ജി.ഡി.ആർ.എഫ്.എ ദുബൈയുമായി സഹകരിക്കുന്നതിൽ തങ്ങൾ അഭിമാനിക്കുന്നുവെന്നും സമൂഹത്തിൽ കൂടുതൽ നല്ല മാറ്റങ്ങൾ കൊണ്ടുവരാൻ ഒരുമിച്ച് പ്രവർത്തിക്കാൻ തങ്ങൾ പ്രതിജ്ഞാബദ്ധമാണെന്നും സൈഫ് അൽ റഹ്മാൻ അമീറും അഭിപ്രായപ്പെട്ടു.

സഹകരണത്തിന്റെ ഭാഗമായി സാമൂഹിക പരിപാടികൾ സംഘടിപ്പിക്കുക, വിവരങ്ങൾ പങ്കുവക്കുക, ലഭ്യമായ വിഭവങ്ങൾ പരമാവധി ഉപയോഗപ്പെടുത്തുക, സന്നദ്ധ പ്രവർത്തനങ്ങൾക്ക് കൂടുതൽ പ്രചാരം നൽകാനുള്ള മാർഗങ്ങൾ പ്രയോജനപ്പെടുത്തുക എന്നിവയും ലക്ഷ്യമിടുന്നു.

സാമൂഹിക പ്രതിബദ്ധത, തന്ത്രപരമായ പങ്കാളിത്തം, മാനുഷിക മൂല്യങ്ങളെ പ്രോത്സാഹിപ്പിക്കാനുള്ള നിതാന്ത ശ്രമങ്ങൾ എന്നിവയിലൂടെ ജി.ഡി.ആർ.എഫ്.എ ദുബൈ മനുഷ്യത്വപരമായ ഇടപാടുകളെ കൂടുതൽ പ്രോത്സാഹിപ്പിക്കുന്നു. ഈ കൂട്ടായ്മ ദുബൈ സമൂഹത്തിൽ കൂടുതൽ ഐക്യവും സഹവർത്തിത്വവും വളർത്തുമെന്നും, മനുഷ്യ ബന്ധങ്ങൾക്ക് കൂടുതൽ ഊഷ്മളത പകരുമെന്നും അധികൃതർ വിശദീകരിച്ചു.

Social Upliftment: GDRFA Dubai and the 'Thank You for Your Giving' team join hands