കാനഡയിൽ, നോവ സ്കോട്ടിയയിലെ കോക്സ്ഹീത്ത് മലയോര പ്രദേശത്തെ കാട്ടിൽ പ്രവേശിച്ചതിന് മുൻ കനേഡിയൻ സൈനികനായ ജെഫ് എവ്‌ലിക്കിന് 18,36,215.89 രൂപ (28,872 കനേഡിയൻ ഡോളർ) പിഴ ചുമത്തി. ഈ സംഭവത്തിന്റെ വീഡിയോ സാമൂഹ്യമാധ്യമമായ എക്സിൽ വ്യാപകമായി പ്രചരിച്ചതോടെ, ഉദ്യോഗസ്ഥർക്കെതിരെ ശക്തമായ പ്രതിഷേധം ഉയർന്നു.

ജെഫ് തന്റെ വീഡിയോയിൽ പറയുന്നത്, താൻ ഡിപാർട്ട്മെന്റ് ഓഫ് നാച്ചുറൽ റിസോഴ്സസിന്റെ കീഴിലുള്ള ഒരു മലയോര പാതയിലാണ് സഞ്ചരിച്ചതെന്നാണ്. "നോവ സ്കോട്ടിയയിലെ കാട്ടിൽ കയറിയതിന് എനിക്ക് 28,872.50 ഡോളർ പിഴ വിധിച്ചു," ജെഫ് എക്സിൽ പങ്കുവെച്ച വീഡിയോയിൽ വ്യക്തമാക്കി. കൺസർവേഷൻ ഓഫീസർമാരുടെ കെട്ടിടത്തിന് സമീപമുള്ള കാട്ടിൽ പ്രവേശിച്ചാൽ 25,000 ഡോളർ പിഴ ഈടാക്കുമെന്നും അദ്ദേഹം കൂട്ടിച്ചേർത്തു.

വീഡിയോയിൽ, ജെഫ് ഒരു പോലീസ് ഉദ്യോഗസ്ഥനുമായി സംസാരിക്കുന്നതും കാണാം. വളരെ മാന്യമായി, താൻ കാട്ടിലേക്ക് പോകാൻ ഒരുങ്ങുകയാണെന്ന് അദ്ദേഹം ഉദ്യോഗസ്ഥനോട് പറയുന്നു. സംഭാഷണം തുടർന്നതിന് ശേഷം, ജെഫ് കാട്ടിലേക്ക് പ്രവേശിക്കുകയും പിന്നീട് 28,872.50 ഡോളർ പിഴ ഈടാക്കപ്പെടുകയും ചെയ്തു.

ഈ പിഴയ്‌ക്കെതിരെ കോടതിയെ സമീപിക്കുമെന്ന് ജെഫ് പ്രഖ്യാപിച്ചു. വീഡിയോ വൈറലായതോടെ, ഉദ്യോഗസ്ഥരുടെ നടപടിക്കെതിരെ വൻ വിമർശനവും പ്രതിഷേധവും ഉയർന്നു. "കാട്ടിൽ കയറിയതിന് ഇത്ര വലിയ പിഴ എന്തിനാണ്?" എന്ന് പലരും ചോദിച്ചു. "കാനഡ ഒരു ഡിസ്റ്റോപ്പിയൻ ലോകമായി മാറിയെന്ന് വിശ്വസിക്കാൻ കഴിയുന്നില്ല," എന്ന് ചിലർ അഭിപ്രായപ്പെട്ടു. ഈ നടപടിക്കെതിരെ നിയമനടപടി സ്വീകരിക്കണമെന്നും നിരവധി പേർ ആവശ്യപ്പെട്ടു.