ന്യൂഡൽഹി: ഡൽഹിയിലെ ഹരി നഗറിൽ ഇന്ന് രാവിലെ പെയ്ത കനത്ത മഴയിൽ മതിൽ ഇടിഞ്ഞുവീണ് ഏഴ് പേർ മരിച്ചതായി റിപ്പോർട്ട്. രണ്ട് കുട്ടികളും രണ്ട് സ്ത്രീകളും മൂന്ന് പുരുഷന്മാരുമാണ് മരിച്ചത്. ഷബീബുൾ (30), റബീബുൾ (30), മുട്ടു അലി (45), റുബീന (25), ഡോളി (25), റുഖ്‌സാന (6), ഹസീന (7) എന്നിവരാണ് മരിച്ചത്. തെക്കുകിഴക്കൻ ഡൽഹിയിലെ ജയ്ത്പൂരിലാണ് അപകടം.

കനത്ത മഴയെത്തുടർന്ന് ഒരു കെട്ടിടത്തിന്റെ മതിൽ നിരവധി ജുഗ്ഗികളുടെ മുകളിലേക്ക് മറിഞ്ഞുവീണാണ് അപകടമുണ്ടായത്. തകർന്നത് ഒരു ക്ഷേത്രത്തിന്റെ മതിൽ ആണെന്നും വിവരം ഉണ്ട്. വലിയ മതിൽ വീണതോടെ ജുഗ്ഗികൾക്ക് അകത്തുണ്ടായിരുന്ന എട്ട് പേർ മണ്ണിനടിയിൽ കുടുങ്ങുകയായിരുന്നു.

രാവിലെ 9.16 ന് സംഭവത്തെക്കുറിച്ച് അഗ്നിശമന സേനയ്ക്ക് ഒരു കോൾ ലഭിച്ചു. തുടർന്ന് മൂന്ന് ഫയർ ട്രക്കുകൾ പൊലിസ് സംഘങ്ങൾക്കൊപ്പം സ്ഥലത്തെത്തിയതായി ഡൽഹി ഫയർ സർവിസ് അറിയിച്ചു. പിന്നാലെ മണ്ണിനടിയിൽ ഉള്ളവരെ പുറത്തെടുത്ത് ആശുപത്രിയിൽ എത്തിച്ചെങ്കിലും ഏഴ് പേർ മരണപ്പെടുകയായിരുന്നു.

അപകടത്തിൽ ഒരാൾക്ക് പരുക്കേറ്റു. ഇയാൾ ആശുപത്രിയിൽ ചികിത്സയിലാണ്. മതിൽ തകരാനിടയാക്കിയ കൃത്യമായ കാരണം ഇതുവരെ കണ്ടെത്താനായിട്ടില്ലെന്ന് ഉദ്യോഗസ്ഥർ പറഞ്ഞു.

ഇന്നലെ രാത്രിയിലിടനീളം കനത്ത മഴയാണ് ഡൽഹിയിൽ പെയ്യുന്നത്. ഇത് പല പ്രദേശങ്ങളിലും വെള്ളക്കെട്ടിന് കാരണമായി. ശനിയാഴ്ച രാവിലെ 8.30 വരെയുള്ള 24 മണിക്കൂറിനുള്ളിൽ ഡൽഹിയിലെ സഫ്ദർജംഗിലെ പ്രാഥമിക കാലാവസ്ഥാ കേന്ദ്രത്തിൽ 78.7 മില്ലിമീറ്റർ മഴയും, പ്രഗതി മൈതാനത്ത് 100 മില്ലിമീറ്റർ മഴയും, ലോധി റോഡിൽ 80 മില്ലിമീറ്റർ മഴയും രേഖപ്പെടുത്തിയതായി കാലാവസ്ഥാ വകുപ്പ് അറിയിച്ചു.