സിയാദ് താഴത്ത്   

കൊച്ചി: അറസ്റ്റിന് ശേഷമല്ല,  പൊലിസ് കസ്റ്റഡിയിലെടുത്ത് 24 മണിക്കൂറിനുള്ളിലാണ് ആളെ മജിസ്‌ട്രേറ്റിന് മുന്നിൽ ഹാജരാക്കേണ്ടതെന്ന നിർണായക ഉത്തരവുമായി ഹൈക്കോടതി.  ഒരാളെ കസ്റ്റഡിയിലെടുത്ത് തോന്നുമ്പോൾ അറസ്റ്റ് രേഖപ്പെടുത്തി പിന്നീടുള്ള 24 മണിക്കൂറല്ല കണക്കാക്കേണ്ടതെന്നും,  പൊലിസ് പിടികൂടിയ ശേഷം  ഒരാളെ മജിസ്‌ട്രേറ്റിന് മുന്നിൽ ഹാജരാക്കുന്നതിനുള്ള  സമയം ആരംഭിക്കുന്നത് ആ വ്യക്തിയെ കസ്റ്റഡിയിലെടുത്തത്  മുതലാണെന്നും ജസ്റ്റിസ് ബെച്ചുകുര്യൻ തോമസ് വ്യക്തമാക്കി. കസ്റ്റഡിക്ക് ശേഷം  നിയമവിരുദ്ധമായി മണിക്കൂറുകളോളമോ ദിവസങ്ങളോ ചോദ്യംചെയ്യുന്ന പൊലിസ് രീതിക്കെതിരേയുള്ള  നിർണായക വിധിയാണ് ഹൈക്കോടതിയുടേത്.  വ്യക്തികളെ കസ്റ്റഡിയിലെത്ത്  അന്വേഷണത്തിന്റെ മറവിൽ അറസ്റ്റ് രേഖപ്പെടുത്താതിരിക്കുന്ന ഇത്തരം നടപടികൾ പലപ്പോഴും നിയമവിരുദ്ധമായി മാറുകയാണെന്നും കോടതി ചൂണ്ടിക്കാട്ടി.     

അനിയന്ത്രിതമായ അധികാരത്തിന്റെ കാലഘട്ടങ്ങളിലാണ് സാധാരണയായി ഇത്തരത്തിൽ പൊലിസ് ക്രൂരതകൾ സംഭവിക്കുന്നത്. പരിശോധനയില്ലെങ്കിൽ, രേഖപ്പെടുത്താത്ത അത്തരം കസ്റ്റഡി മനുഷ്യാവകാശ ലംഘനങ്ങൾക്ക് കാരണമാകുമെന്ന് ഹൈക്കോടതി പറഞ്ഞു. അറസ്റ്റ് ചെയ്യപ്പെട്ട ആളെ  24 മണിക്കൂറിനുള്ളിൽ തൊട്ടടുത്ത മജിസ്‌ട്രേറ്റിന് മുന്നിൽ ഹാജരാക്കണമെന്ന് ഭരണഘടന അനുശാസിക്കുന്നുണ്ടെന്നും ഹൈക്കോടതി ഓർമിപ്പിച്ചു. അറസ്റ്റ് ചെയ്ത സ്ഥലത്ത് നിന്ന് മജിസ്‌ട്രേറ്റിന്റെ കോടതിയിൽ എത്താൻ ആവശ്യമായ സമയം ഒഴികെ, മജിസ്‌ട്രേറ്റിന്റെ അനുമതിയില്ലാതെ അറസ്റ്റ് ചെയ്യപ്പെട്ട വ്യക്തിയെ ആ സമയപരിധിക്കപ്പുറം തടങ്കലിൽ വയ്ക്കുന്നതിന് കർശനമായ വിലക്കുണ്ട്.

ALSO READ: കുവൈത്തിലെ വിഷമദ്യ ദുരന്തം: മരണം 13 ആയി, അഞ്ചുപേര്‍ മലയാളികളെന്ന് സൂചന; 21 പേര്‍ക്ക് കാഴ്ച നഷ്ടമായി; എംബസി ഹെല്‍പ് ലൈന്‍ തുടങ്ങി 
 
മയക്കുമരുന്ന് കേസിൽ പ്രതിയായ പശ്ചിമ ബംഗാൾ സ്വദേശി ബിശ്വജിത് മണ്ഡലിന് ജാമ്യം അനുവദിച്ചുകൊണ്ടുള്ള ഉത്തരവിലാണ് ഹൈക്കോടതിയുടെ സുപ്രധാന നിർദേശം. നിയമം എല്ലാവർക്കും ഒരുപോലെ ബാധകമാണെന്ന് വ്യക്തമാക്കിയ കോടതി ഏറ്റവും കുപ്രസിദ്ധനായ കുറ്റവാളിക്ക് പോലും നീതിപൂർവകമായ പരിഗണനയ്ക്ക് അർഹതയുണ്ടെന്നും വ്യക്തമാക്കി. ഈ കേസിൽ ഹരജിക്കാരനെ കഴിഞ്ഞ ജനുവരി 25ന് ഉച്ചയ്ക്ക് 3 മണിക്കാണ് കസ്റ്റഡിയിലെടുത്തത്. പിറ്റേന്ന്  ഉച്ചയ്ക്ക് 2 മണിക്ക് അറസ്റ്റ് രേഖപ്പെടുത്തി. എന്നാൽ അന്ന് രാത്രി 8 മണിക്ക് മാത്രമാണ് മജിസ്‌ട്രേറ്റിന് മുന്നിൽ ഹാജരാക്കിയതെന്നും മഹസറിൽ വെളിപ്പെടുത്തുന്നു. 24 മണിക്കൂർ കാലയളവിനപ്പുറം മജിസ്‌ട്രേറ്റിന് മുന്നിൽ ഹാജരാക്കാതെ അനധികൃതമായി കസ്റ്റഡിയിൽ സൂക്ഷിച്ചത് നിയമവിരുദ്ധമായ തടങ്കലാണെന്ന് വ്യക്തമാക്കിയ കോടതി പ്രതിക്ക് ജാമ്യം അനുവദിക്കുകയായിരുന്നു.

The High Court has issued a crucial order stating that a person must be produced before a magistrate within 24 hours of being taken into police custody, not after the formal arrest.