പാലക്കാട് ആര്‍എസ്എസ് നിയന്ത്രണത്തിലുള്ള സ്‌കൂളില്‍ നടന്ന ബോംബ് സ്‌ഫോടനം മറച്ച് വക്കാനുള്ള ആസൂത്രിതമായ ശ്രമം നടക്കുന്നുവെന്ന് കോണ്‍ഗ്രസ് വക്താവ് സന്ദീപ് വാര്യര്‍. മുനിസിപ്പല്‍ ഇലക്ഷന്‍ നടക്കാനിരിക്കുന്ന സാഹചര്യത്തില്‍ പാലക്കാട് നഗരത്തില്‍ ആസൂത്രിതമായ സാമുദായിക കലാപം ലക്ഷ്യമിട്ട് സംഘപരിവാര്‍ ആയുധ ശേഖരണം നടക്കുന്നതായി സംശയിക്കേണ്ടിയിരിക്കുന്നുവെന്നും അദ്ദേഹം പേസ്ബുക്ക് കുറിപ്പില്‍ ചൂണ്ടിക്കാട്ടി. ശ്രീകൃഷ്ണ ജയന്തി ശോഭയാത്ര, ഗണേശോത്സവം എന്നിവ നടക്കാനിരിക്കുന്ന സാഹചര്യത്തില്‍ എന്ത് നെറികേടും കാണിക്കാന്‍ ഇവര്‍ മടിക്കില്ലെന്ന് മുന്നറിയിപ്പ് നല്‍കിയ സന്ദീപ് വാര്യര്‍ കേരളത്തെ കലാപഭൂമിയാക്കാന്‍ സംഘപരിവാറിനെ അനുവദിക്കരുതെന്നും കൂട്ടിച്ചേര്‍ത്തു. 

കഴിഞ്ഞ ദിവസം വൈകുന്നേരം പാലക്കാട് വ്യാസ വിദ്യാപീഠം പ്രൈമറി സിബിഎസ്ഇ സ്‌കൂളിന് സമീപത്ത് നിന്നാണ് സ്‌ഫോടക വസ്തുക്കള്‍ കണ്ടെടുത്തത്. ആര്‍എസ്എസ് നിയന്ത്രണത്തിലുള്ള ഈ സ്‌കൂളിന്റെ കവാടത്തിന് സമീപം 10 വയസ്സുകാരനായ ഒരു കുട്ടി ഒരു വസ്തുവിനെ പന്താണെന്ന് തെറ്റിദ്ധരിച്ച് തട്ടിത്തെറിപ്പിച്ചപ്പോള്‍ വലിയ ശബ്ദത്തോടെ അത് പൊട്ടിത്തെറിക്കുകയായിരുന്നു. ഇതില്‍ കുട്ടിക്കും സമീപത്തുണ്ടായിരുന്ന ഒരു സ്ത്രീക്കും പരിക്കേറ്റു.

ALSO READ: 'ഗസ്സയില്‍ കടുത്ത ക്ഷാമം, പട്ടിണി' ഒടുവില്‍ ഔദ്യോഗിക പ്രഖ്യാപനവുമായി യു.എന്‍ ഏജന്‍സി

സംഭവത്തില്‍ പാലക്കാട് ടൗണ്‍ നോര്‍ത്ത് പൊലിസ് എക്‌സ്‌പ്ലോസീവ് സബ്സ്റ്റന്‍സസ് ആക്ട്, ജുവനൈല്‍ ജസ്റ്റിസ് ആക്ട് എന്നിവ പ്രകാരം കേസെടുത്ത് അന്വേഷണം ആരംഭിച്ചിട്ടുണ്ട്.

 സ്‌കൂള്‍ വളപ്പില്‍ ഉണ്ടായ സ്‌ഫോടനവുമായി ബന്ധപ്പെട്ട് ആര്‍എസ്എസിനെതിരെ ഗുരുതര ആരോപണങ്ങളുമായി വിദ്യാഭ്യാസ മന്ത്രി വി ശിവന്‍കുട്ടിയും രംഗത്തെത്തിയിരുന്നു. സ്‌കൂള്‍ കോമ്പൗണ്ടില്‍ നാല് ബോംബുകള്‍ കണ്ടെത്തിയതായും, ഈ സ്ഥലം ആര്‍.എസ്.എസിന്റെ ക്യാംപ് നടത്താനുള്ള കേന്ദ്രമാണെന്നും മന്ത്രി ആരോപിച്ചു. സ്‌ഫോടനത്തില്‍ ആര്‍.എസ്.എസിന് പങ്കുണ്ടെന്നും, ഇത്തരം പ്രവര്‍ത്തനങ്ങള്‍ ഒരു കാരണവശാലും അനുവദിക്കില്ലെന്നും മന്ത്രി വ്യക്തമാക്കി. സംഭവത്തില്‍ വിശദമായ അന്വേഷണം നടന്നുവരികയാണെന്നും അദ്ദേഹം കൂട്ടിച്ചേര്‍ത്തു.

വിദ്യാഭ്യാസ സ്ഥാപനത്തിന്റെ പരിസരത്ത് സ്‌ഫോടക വസ്തുക്കള്‍ കണ്ടെടുത്ത സാഹചര്യത്തില്‍, സ്‌കൂളിന് സര്‍ക്കാര്‍ നല്‍കിയിരുന്ന എന്‍.ഒ.സി (നോ ഒബ്ജക്ഷന്‍ സര്‍ട്ടിഫിക്കറ്റ്) പിന്‍വലിക്കാതിരിക്കാന്‍ കാരണമുണ്ടെങ്കില്‍ അത് വ്യക്തമാക്കണമെന്ന് ആവശ്യപ്പെട്ട് സ്‌കൂള്‍ അധികൃതര്‍ക്ക് നോട്ടിസ് നല്‍കിയിട്ടുണ്ടെന്നും മന്ത്രി അറിയിച്ചു. 

സന്ദീപ് വാര്യരുടെ പോസ്റ്റിന്റെ പൂര്‍ണരൂപം
പാലക്കാട് ആര്‍എസ്എസ് നിയന്ത്രണത്തിലുള്ള സ്‌കൂളില്‍ നടന്ന ബോംബ് സ്‌ഫോടനം മറച്ച് വക്കാനുള്ള ആസൂത്രിതമായ ശ്രമം നടക്കുന്നു. മുനിസിപ്പല്‍ ഇലക്ഷന്‍ നടക്കാനിരിക്കുന്ന സാഹചര്യത്തില്‍ പാലക്കാട് നഗരത്തില്‍ ആസൂത്രിതമായ സാമുദായിക കലാപം ലക്ഷ്യമിട്ട് സംഘപരിവാര്‍ ആയുധ ശേഖരണം നടക്കുന്നതായി സംശയിക്കേണ്ടിയിരിക്കുന്നു.  ശ്രീകൃഷ്ണ ജയന്തി ശോഭയാത്ര, ഗണേശോത്സവം എന്നിവ നടക്കാനിരിക്കുന്ന സാഹചര്യത്തില്‍ എന്ത് നെറികേടും കാണിക്കാന്‍ ഇവര്‍ മടിക്കില്ല .  കേരളത്തെ കലാപഭൂമിയാക്കാന്‍ സംഘപരിവാറിനെ അനുവദിക്കരുത്.