തൃശൂർ: തൃശൂരിൽ വീണ്ടും ഇറിഡിയം തട്ടിപ്പ്‌ നടത്തി കോടികൾ തട്ടി. ആലപ്പുഴ സ്വദേശികളുടെ ഒന്നരക്കോടിയോളം രൂപയാണ് നഷ്ടമായത്. സംഭവത്തിൽ ഇരിങ്ങാലക്കുട പൊലിസിൽ പരാതി നൽകി. വാടാനപ്പിള്ളിയിലെ ഒരു ക്ഷേത്രത്തിലെ ഇറിഡിയം വിറ്റ പണം ലഭിക്കുന്നതുമായ ബന്ധപ്പെട്ടാണ് തട്ടിപ്പ് നടന്നത്.

വാടാനപ്പിള്ളിയിലുള്ള നല്ലച്ഛൻ കാവ് ക്ഷേത്രത്തിലെ താഴികക്കുടത്തിൽ ഏറെ വിലപിടിപ്പുള്ള ഇറിഡിയം ഉണ്ടെന്നും ഇത് അമേരിക്കൻ ഗവൺമെന്റിന് വിറ്റതാണെന്നും പറഞ്ഞായിരുന്നു തട്ടിപ്പ്. വില്പന തുകയായ 47.5 ലക്ഷം കോടി ഡോളർ റിസർവ് ബാങ്കിൽ ഉണ്ടെന്ന് കാണിച്ചാണ് തട്ടിപ്പ്. ഇത് ലഭിച്ചാൽ ലാഭം നൽകാമെന്ന് പറഞ്ഞാണ് തട്ടിപ്പ് നടന്നത്.

2022 മുതൽ വിവിധ ഘട്ടങ്ങളിലായി 121 പേരിൽ നിന്നായി ഒന്നരക്കോടിയോളം രൂപ തട്ടിയെന്നാണ് പരാതിയിൽ പറയുന്നത്. ഇരിങ്ങാലക്കുട സ്വദേശിയായ റോഷൻ എന്ന വ്യക്തിയും കുടുംബവുമടക്കം എഴുപേർ ചേർന്ന് തട്ടിപ്പ് നടത്തിയെന്നാണ് പരാതി. ചേർത്തല സ്വദേശിനികളായ വയലാർ കൊട്ടാരത്തിൽ വീട്ടിൽ ജിഷമോൾ, വേട്ടക്കൽ നാരായണാലയത്തിൽ കവിത എന്നിവരാണ് ഇരിങ്ങാലക്കുട പൊലിസിൽ പരാതി നൽകിയത്.