കോഴിക്കോട്: സംസ്ഥാനത്ത് ആശങ്കയുണർത്തി വീണ്ടും അമീബിക് മസ്തിഷ്ക ജ്വരം സ്ഥിരീകരിച്ചു. മലപ്പുറം സ്വദേശിനിയായ 55 വയസ്സുകാരിയിലാണ് രോഗം കണ്ടെത്തിയത്. ഇവരെ ചികിത്സയ്ക്കായി കോഴിക്കോട് മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. രോഗലക്ഷണങ്ങൾ കണ്ടതിനെ തുടർന്ന് നടത്തിയ പരിശോധനയിലാണ് രോഗം സ്ഥിരീകരിച്ചത്.

നിലവിൽ മലപ്പുറത്ത് നിന്നുള്ള മൂന്ന് പേരാണ് രോഗം ബാധിച്ച് ചികിത്സയിൽ കഴിയുന്നുത്. ഇവരുടെ ആരോഗ്യനില തൃപ്തികരമാണെന്ന് ആശുപത്രി അധികൃതർ അറിയിച്ചു. ഇതിനു പുറമേ, കോഴിക്കോട് സ്വദേശികളായ മൂന്ന് പേരും രോഗം ബാധിച്ച് ചികിത്സയിലുണ്ട്. എന്നാൽ, രോഗത്തിന്റെ ഉറവിടം ഇതുവരെ കണ്ടെത്താനായിട്ടില്ല. രോഗബാധിതരുടെ സാമ്പിളുകൾ ശേഖരിച്ചെങ്കിലും പരിശോധനാഫലം ലഭ്യമായിട്ടില്ല. രോഗലക്ഷണങ്ങളോടെ ഒരാൾ കൂടി ചികിത്സയിൽ തുടരുന്നുണ്ട്.

ALSO READ: തിരുവനന്തപുരത്ത് പൊലിസുകാരന് കുത്തേറ്റു: മുഖത്ത് വെട്ടേറ്റ പാടുകളും; ഗുരുതരാവസ്ഥയിൽ

അതിനിടെ, കോഴിക്കോട് മെഡിക്കൽ കോളജിൽ ചികിത്സയിൽ കഴിയുന്ന ഓമശ്ശേരി സ്വദേശിയായ മൂന്ന് മാസം പ്രായമുള്ള കുഞ്ഞ് ഗുരുതരാവസ്ഥയിൽ തുടരുകയാണ്. കിണർ വെള്ളത്തിൽ നിന്നാണ് കുഞ്ഞിന് രോഗം ബാധിച്ചതെന്നാണ് ആരോഗ്യവകുപ്പിന്റെ പ്രാഥമിക നിഗമനം. നേരത്തെ, താമരശ്ശേരിയിൽ അമീബിക് മസ്തിഷ്ക ജ്വരം ബാധിച്ച് നാലാം ക്ലാസുകാരി മരണപ്പെട്ടിരുന്നു.

Amoebic meningitis has been confirmed again in Kerala, with a 55-year-old woman from Malappuram admitted to Kozhikode Medical College. Three others from Malappuram and three from Kozhikode are also under treatment