ന്യൂയോർക്ക്: യു.എസ് പ്രസിഡന്റ് ഡൊണാൾഡ് ട്രംപിന്റെ മുൻ ദേശീയ സുരക്ഷാ ഉപദേഷ്ടാവും പിന്നീട് പതിവ് വിമർശകനുമായി മാറിയ ജോൺ ബോൾട്ടന്റെ വീട്ടിൽ റെയ്ഡ്. അമേരിക്കയിലെ ഫെഡറൽ ബ്യൂറോ ഓഫ് ഇൻവെസ്റ്റിഗേഷൻ (എഫ്ബിഐ) യാണ് പരിശോധന നടത്തിയത്.

ബോൾട്ടൺ രഹസ്യ വിവരങ്ങൾ കൈകാര്യം ചെയ്തതിനെക്കുറിച്ചുള്ള ദേശീയ സുരക്ഷാ അന്വേഷണത്തിന്റെ ഭാഗമായാണ് റെയ്ഡ് എന്ന് വാർത്താ ഏജൻസികൾ റിപ്പോർട്ട് ചെയ്തു. വാഷിംഗ്ടൺ ഡിസിയിലുള്ള ബോൾട്ടന്റെ വീടിന് പുറത്ത് പൊലിസ് കാറുകൾ നിലയുറപ്പിച്ചിരിക്കുന്നതായുള്ള ചിത്രങ്ങൾ പ്രചരിച്ചതിന് പിന്നാലെയാണ് റെയ്ഡ് സ്ഥിരീകരിച്ചത്.

ആരും നിയമത്തിന് അതീതരല്ല എന്നാണ് സംഭവത്തിന് പിന്നാലെ എഫ്ബിഐ ഡയറക്ടർ കാഷ് പട്ടേൽ സോഷ്യൽ മീഡിയ പോസ്റ്റിൽ പങ്കുവെച്ചത്. എഫ്ബിഐ ഏജന്റുമാർ ദൗത്യത്തിലാണ് എന്ന് ബോൾട്ടനെ വ്യക്തമായി പരാമർശിക്കാതെ സോഷ്യൽ മീഡിയ പോസ്റ്റിൽ അദ്ദേഹം കൂട്ടിച്ചേർത്തു.

അതേസമയം, ബോൾട്ടന്റെ വീട്ടിൽ നടന്ന റെയ്ഡിനെക്കുറിച്ച് തനിക്ക് അറിവില്ലെന്ന് ട്രംപ് പറഞ്ഞു. ഞാനും ഇന്ന് രാവിലെ ഞാൻ അത് ടെലിവിഷനിലാണ് കണ്ടത് എന്നാണ് ട്രംപ് മാധ്യമപ്രവർത്തകരോട് പറഞ്ഞത്. എന്നാൽ താൻ ജോൺ ബോൾട്ടന്റെ ആരാധകനല്ലെന്നും അദ്ദേഹം ശരിക്കും ഒരു തരം താഴ്ന്ന വ്യക്തിയാണ് എന്നും ട്രംപ് പറഞ്ഞു.

ട്രംപിന്റെ ആദ്യ ടേമിൽ അദ്ദേഹത്തോടൊപ്പം ജോലി ചെയ്തതിന് പിന്നാലെയാണ്, ഐക്യരാഷ്ട്രസഭയിലെ മുൻ യുഎസ് അംബാസഡർ കൂടിയായ ബോൾട്ടൺ അദ്ദേഹത്തിന്റെ കടുത്ത വിമർശകനായി മാറിയത്.