കുവൈത്ത് സിറ്റി: താല്‍ക്കാലിക വിസയിലോ സന്ദര്‍ശ വിസയിലോ രാജ്യത്തേക്ക് എത്തുന്നവര്‍ക്ക് ഇനിമുതല്‍ പബ്ലിക് ഹോസ്പിറ്റലുകളിലോ സ്‌പെഷ്യാലിറ്റി സെന്ററുകളിലോ പ്രൈമറി ക്ലിനിക്കുകളിലോ ആരോഗ്യ സേവനങ്ങള്‍ ലഭിക്കില്ലെന്ന് കുവൈത്ത് ആര്യോഗ്യ മന്ത്രാലയം അറിയിച്ചു. ദേശീയ ആരോഗ്യ സംവിധാനത്തിന്റെ പരിധിയില്‍ വരുന്ന പൗരന്മാര്‍ക്കും താമസക്കാര്‍ക്കും വേണ്ടിയുള്ള വിഭവങ്ങള്‍ സംരക്ഷിക്കാന്‍ ലക്ഷ്യമിട്ടാണ് നിരോധനം ഏര്‍പ്പെടുത്തിയിരിക്കുന്നത്.

ALSO READ: പ്രവാസികള്‍ക്ക് സൗജന്യ നിയമോപദേശം: പ്രവാസി ലീഗല്‍ സെല്‍ - കുവൈത്ത് അല്‍ ദോസ്തൗര്‍ ധാരണയില്‍ 

ആരോഗ്യമന്ത്രി ഡോ. അഹമ്മദ് അല്‍ അവാദിയാണ് പുതിയ തീരുമാനം പ്രഖ്യാപിച്ചത്. രാജ്യത്തെ ആരോഗ്യ മേഖലയുടെ സ്ഥിരത നിലനിര്‍ത്തുക, സേവന നിലവാരം ഉയര്‍ത്തുക, ആവശ്യമുള്ളവര്‍ക്ക് ചികിത്സാ സംവിധാനങ്ങള്‍ ലഭ്യമാക്കുക എന്നിവയാണ് പുതിയ നടപടിയുടെ ലക്ഷ്യങ്ങളെന്ന് മന്ത്രാലയം പുറത്തിറക്കിയ പ്രസ്താവനയില്‍ പറയുന്നു. 

ALSO READ: അറേബ്യൻ ഗൾഫ് സ്ട്രീറ്റ് പൂർണ്ണമായും അടച്ചു; അടച്ചിടൽ ഞായറാഴ്ച (ഓഗസ്റ്റ് 24) രാവിലെ ആറ്മണി വരെ 

പ്രവര്‍ത്തനങ്ങളിലെ കാര്യക്ഷമതയും പൗരന്മാരിലേക്ക് സേവനങ്ങളുടെ ഗുണങ്ങള്‍ എത്തിക്കുന്നതും സന്തുലിതമാക്കാന്‍ ശ്രമിക്കുന്ന സമഗ്ര ആരോഗ്യ ദര്‍ശനത്തിന്റെ ഭാഗമായാണ് നയംമാറ്റം. ആരോഗ്യ രംഗത്തെ തിരക്ക് തടയുന്നതിനും സൗകര്യങ്ങളിലുള്ള സമ്മര്‍ദം കുറയ്ക്കുന്നതിലൂടെയും രോഗികളുടെ സംതൃപ്തി മെച്ചപ്പെടുത്താന്‍ നയംമാറ്റത്തിലൂടെ കഴിയുമെന്നാണ് മന്ത്രലായം പ്രതീക്ഷിക്കുന്നത്. അഹ്മദി ഗവര്‍ണറേറ്റിലെ താമസക്കാരുമായും പ്രതിനിധികളുമായും ഡോ. അഹമ്മദ് വ്യാഴാഴ്ച കൂടിക്കാഴ്ച നടത്തിയിരുന്നു. അഹ്മദി ഹെല്‍ത്ത്‌ ജില്ലയെ ഒരു സമ്പൂര്‍ണ്ണ മെഡിക്കല്‍ നഗരമാക്കി മാറ്റുന്നതിനുള്ള നിര്‍ദ്ദേശവും നിലവിലുള്ള സബാഹ് അല്‍ അഹ്മദ് മെഡിക്കല്‍ സിറ്റി പദ്ധതിയെ സംബന്ധിച്ചും കൂടിക്കാഴ്ചയില്‍ ചര്‍ച്ചയായി. 

Kuwait has officially banned access to public health services for individuals entering the country on visit visas. The decision affects all non-residents and aims to regulate healthcare resource usage.