തിരുവനന്തപുരം: കേരള ക്രിക്കറ്റ് ലീഗിൽ തൃശൂർ ടൈറ്റൻസിന് വിജയത്തുടക്കം. ആലപ്പി റിപ്പിൾസിനെ ഏഴ് വിക്കറ്റുകൾക്കാണ് തൃശൂർ പരാജയപ്പെടുത്തിയത്. തിരുവനന്തപുരം ഗ്രീൻഫീൽഡ് സ്റ്റേഡിയത്തിൽ നടന്ന മത്സരത്തിൽ തൃശൂർ ബൗളിംഗ് തെരഞ്ഞെടുക്കുകയായിരുന്നു. ആദ്യം ബാറ്റ് ചെയ്ത ആലപ്പി റിപ്പിൾസ് 20 ഓവറിൽ ഏഴ് വിക്കറ്റ് നഷ്ടത്തിൽ 151 റൺസാണ് നേടിയത്. വിജയലക്ഷ്യം പിന്തുടർന്നിറങ്ങിയ തൃശൂർ ടൈറ്റൻസ് മൂന്ന് വിക്കറ്റ് നഷ്ടത്തിൽ 16.3 ഓവറിൽ ലക്ഷ്യം മറികടക്കുകയായിരുന്നു. 

അർദ്ധ സെഞ്ച്വറി നേടി തിളങ്ങിയ ആനന്ദ് കൃഷ്ണൻ, അഹമ്മദ് ഇമ്രാൻ എന്നിവരുടെ കരുത്തിലാണ് തൃശൂർ വിജയം സ്വന്തമാക്കിയത്. 39 പന്തിൽ 63 റൺസ് നേടിയായാണ് ആനന്ദ് കൃഷ്ണൻ തിളങ്ങിയത്. രണ്ട് ഫോറുകളും അഞ്ചു കൂറ്റൻ സിക്സുകളുമാണ് താരം നേടിയത്. അഹമ്മദ് ഇമ്രാൻ 44 പന്തിൽ നിന്നും 61 റൺസും സ്വന്തമാക്കി. എട്ട് ഫോറുകൾ അടങ്ങുന്നതായിരുന്നു താരത്തിന്റെ പ്രകടനം. 

ആലപ്പിയുടെ ബൗളിങ്ങിൽ ഐപിഎല്ലിൽ മുംബൈ ഇന്ത്യൻസിനായി മികച്ച പ്രകടനം നടത്തിയ വിഘ്‌നേഷ് പുത്തൂർ രണ്ട് വിക്കറ്റുകൾ നേടി തിളങ്ങി. ശ്രീഹരി എസ് നായർ ഒരു വിക്കറ്റും നേടി. 

നേരത്തെ ആദ്യം ബാറ്റ് ചെയ്ത ആലപ്പി റിപ്പിൾസ് ക്യാപ്റ്റൻ മുഹമ്മദ് അസറുദീന്റെ പ്രകടനമാണ് മാന്യമായ സ്കോർ നേടുന്നതിൽ നിർണായകമായത്. 38 പന്തിൽ നിന്നും 56 റൺസാണ് അസറുദീൻ നേടിയത്. മൂന്ന് വീതം ഫോറുകളും സിക്സുകളും ആണ് ആലപ്പി ക്യാപ്റ്റന്റെ ബാറ്റിൽ നിന്നും പിറന്നത്. മന്നംബെത്ത് ശ്രീരൂപ് 23 പന്തിൽ നിന്നും പുറത്താവാതെ 30 റൺസും നേടി മികച്ചു നിന്നും. മൂന്ന് ഫോറുകളും ഒരു സിക്സുമാണ് താരം നേടിയത്.  

തൃശൂർ ടൈറ്റൻസിനായി സിബിൻ പി ഗിരീഷ് നാല് വിക്കറ്റുകൾ നേടി തിളങ്ങി. എംഡി നിതീഷ് രണ്ട് വിക്കറ്റുകളും മുഹമ്മദ് ഇസ്ഹാഖ് ഒരു വിക്കറ്റും വീഴ്ത്തി.    

Thrissur Titans recorded a win in the Kerala Cricket League. Thrissur defeated Alleppey Ripples by seven wickets.