തിരുവനന്തപുരം: എം.ടെക് പാസാകാത്ത എസ്.എഫ്.ഐ നേതാവിന് പി.എച്ച്.ഡി പ്രവേശനം നൽകിയതായി പരാതി. സാങ്കേതിക സർവകലാശാലാ സിൻഡിക്കേറ്റ് അംഗവും എസ്.എഫ്‌.ഐ നേതാവുമായ ആഷിഖ് ഇബ്രാഹിംകുട്ടിക്കാണ് പ്രവേശനം നൽകിയത്. തൃശൂർ ഗവ. എൻജിനീയറിങ് കോളജിലായിരുന്നു പ്രവേശനം.സാങ്കേതിക സർവകലാശാലാ വി.സിയുടെ ചുമതലയുണ്ടായിരുന്ന ഡോ.സജി ഗോപിനാഥിന്റെ പ്രത്യേക ഉത്തരവിന്റെ അടിസ്ഥാനത്തിൽ പി.എച്ച്.ഡി പ്രവേശനപരീക്ഷ എഴുതാൻ ചട്ടവിരുദ്ധമായി ആഷിഖിന് അനുമതി നൽകുകയായിരുന്നുവെന്ന ആരോപണവുമായി സേവ് യൂനിവേഴ്‌സിറ്റി കാംപയിൻ കമ്മിറ്റി രംഗത്തെത്തി. 

എം.ടെക് ഒന്നാം സെമസ്റ്റർ പരീക്ഷ പാസായില്ലെന്ന വിവരം മറച്ചുവച്ച് സിൻഡിക്കേറ്റ് അംഗമെന്ന സ്വാധീനം ഉപയോഗിച്ചാണ് പ്രവേശനപരീക്ഷ എഴുതാൻ സർവകലാശാലയിൽ നിന്ന് അനുമതി നേടിയത്. എല്ലാ സെമസ്റ്ററും പാസായ അവസാന സെമസ്റ്റർ പരീക്ഷ എഴുതിക്കഴിഞ്ഞ വിദ്യാർഥികൾക്ക് മാത്രമാണ് പി.എച്ച്.ഡി പ്രവേശനപരീക്ഷ എഴുതാൻ യൂനിവേഴ്‌സിറ്റി ചട്ടപ്രകാരം വ്യവസ്ഥയുള്ളത്. 2024 ഒാഗസ്റ്റിലാണ് പ്രവേശനപരീക്ഷ നടന്നത്. എന്നാൽ, ആഷിഖ് പ്രവേശനപരീക്ഷ എഴുതിക്കഴിഞ്ഞ ശേഷവും ഒന്നാം സെമസ്റ്ററിൽ മതിയായ ഹാജരില്ലാത്തതിനാൽ വീണ്ടും കോളജിൽ പഠനം തുടരുകയായിരുന്നു. സർവകലാശാലാ ഡോക്ടറൽ കമ്മിറ്റി കൂടുന്നതിനുമുമ്പ് മാർക്ക്ലിസ്റ്റുകൾ പരിശോധിച്ചപ്പോൾ റിസർച്ച് സെക് ഷനാണ് ക്രമക്കേട് കണ്ടെത്തിയത്. 

പ്രവേശനപരീക്ഷ എഴുതുമ്പോഴും പ്രവേശനസമയത്തും എം.ടെക് പാസായിട്ടില്ലെന്നും പ്രവേശന പരീക്ഷക്ക് അനുമതി നൽകിയത് ചട്ടവിരുദ്ധമെന്നുമാണ് റിസർച്ച് സെക്ഷൻ കണ്ടെത്തിയത്. റിസർച്ച് ഡീനിനെ തുടരാൻ അനുവദിക്കില്ലെന്ന് യുവനേതാവ് ഭീഷണിപ്പെടുത്തിയതായും പരാതിയുണ്ട്. ചട്ടവിരുദ്ധമായാണ് പ്രവേശനപരീക്ഷ എഴുതിയതെന്നുള്ള രേഖകൾ വി.സിക്ക് റിസർച്ച് ഡീൻ കൈമാറിയിട്ടുണ്ട്. ഇതിനിടെ സി.പി.എം ഉന്നതകേന്ദ്രങ്ങൾ ഇടപെട്ട് ഐ.എച്ച്.ആർ.ഡിയിൽ നിന്നുള്ള ഡെപ്യൂട്ടേഷൻ വിലക്കി ഡീനിന്റെ സേവനം നിർത്തലാക്കി. 

എസ്.എഫ്.ഐ നേതാവിന് ചട്ടവിരുദ്ധമായി നൽകിയ പി.എച്ച്.ഡി പ്രവേശനം റദ്ദാക്കണമെന്നും പ്രവേശനം നൽകിയ തൃശൂർ ഗവ.കോളജ് പ്രിൻസിപ്പലിനെതിരേ നടപടിയെടുക്കണമെന്നും ആവശ്യപ്പെട്ട് സേവ് യൂനിവേഴ്‌സിറ്റി കാംപയിൻ കമ്മിറ്റി വി.സിക്ക് നിവേദനം നൽകി.