ന്യൂഡൽഹി: ഉത്തരാഖണ്ഡിലെ ചമോലി ജില്ലയിൽ വീണ്ടും മേഘവിസ്‌ഫോടനം. വെള്ളിയാഴ്ച രാത്രിയോടെ ഉണ്ടായത് മേഘവിസ്ഫോടനത്തിൽ നിരവധി ആളുകളെ കാണാതായതായി സംശയിക്കുന്നു. നിരവധി വീടുകളും കെട്ടിടങ്ങളും തകർന്നു. തരാലി മാർക്കറ്റ് ഏരിയയും തരാലി തഹസിൽ സമുച്ചയവും അവശിഷ്ടങ്ങളാൽ മൂടിയിരിക്കുകയാണെന്ന് ഉദ്യോഗസ്ഥർ പറഞ്ഞു. എൻ‌ഡി‌ആർ‌എഫ്, എസ്‌ഡി‌ആർ‌എഫ് സംഘങ്ങൾ സ്ഥലത്ത് രക്ഷാപ്രവർത്തനം നടത്തുകയാണ്.

കവിത എന്ന 20 വയസ്സുള്ള ഒരു സ്ത്രീ അവശിഷ്ടങ്ങൾക്കിടയിൽ കുടുങ്ങിക്കിടക്കുന്നതായും ജോഷി എന്ന മറ്റൊരാളെ കാണാതായതായും ഉദ്യോഗസ്ഥർ പറഞ്ഞു. മറ്റുള്ളവരെ കുറിച്ചുള്ള വിവരങ്ങൾ ലഭ്യമായിട്ടില്ല. സബ് ഡിവിഷണൽ മജിസ്‌ട്രേറ്റിന്റെ (എസ്ഡിഎം) ഔദ്യോഗിക വസതി, കടകൾ, വാഹനങ്ങൾ എന്നിവയുൾപ്പെടെ നിരവധി താമസസ്ഥലങ്ങൾ അവശിഷ്ടങ്ങളാൽ മൂടിയിരിക്കുകയാണ്.

'പെട്ടെന്നുള്ള വെള്ളപ്പൊക്കം കാരണം റോഡ് തടസ്സപ്പെട്ടിരിക്കുന്നു. ആളുകൾ വളരെയധികം പ്രശ്നങ്ങൾ നേരിടുന്നു. ദുരിതാശ്വാസ ക്യാമ്പുകൾ തുറന്നിട്ടുണ്ട്. ജില്ലാ മജിസ്ട്രേറ്റ് സ്ഥലത്തുണ്ട്' ചമോലി എഡിഎം വിവേക് ​​പ്രകാശ് എഎൻഐയോട് പറഞ്ഞു.

പിത്തോറഗഡിൽ, മണ്ണിടിച്ചിൽ കാരണം താൽ-മുൻസാരി, മുൻസാരി-മിലാം റോഡുകൾ അടച്ചിട്ടതായി ഉദ്യോഗസ്ഥർ സ്ഥിരീകരിച്ചു. മഴയ്ക്കും മണ്ണിടിച്ചിലിനും സാധ്യതയുള്ള പ്രദേശങ്ങളിൽ താമസക്കാർ ജാഗ്രത പാലിക്കണമെന്ന് പൊലിസ് അഭ്യർത്ഥിച്ചു. ഡെറാഡൂൺ, തെഹ്രി, പൗരി, ചമോലി, രുദ്രപ്രയാഗ്, നൈനിറ്റാൾ, അൽമോറ തുടങ്ങിയ ജില്ലകളിൽ ഇടിമിന്നൽ, മിന്നൽ, അതിശക്തമായ മഴ എന്നിവയ്ക്ക് സാധ്യതയുണ്ടെന്ന് ഇന്ത്യൻ കാലാവസ്ഥാ വകുപ്പ് (IMD) സംസ്ഥാനത്തിന് ഓറഞ്ച് അലേർട്ട് പ്രഖ്യാപിച്ചു. ശനിയാഴ്ച ഉച്ചവരെയാണ് ജാഗ്രത നിർദേശം.

അതേസമയം, ഹർസിൽ പ്രദേശത്ത് വെള്ളപ്പൊക്കത്തെ തുടർന്ന് പുതുതായി രൂപംകൊണ്ട തടാകത്തിലെ വെള്ളം വറ്റിക്കാൻ എൻഡിആർഎഫും എസ്ഡിആർഎഫും ഉൾപ്പെടെയുള്ള രക്ഷാ ഏജൻസികൾ പ്രവർത്തനം ആരംഭിച്ചു.