തിരുവനന്തപുരം: പാലക്കാട് ആർഎസ്എസ് നിയന്ത്രണത്തിലുള്ള സ്‌കൂളിൽ സ്‌ഫോടക വസ്തു പൊട്ടിത്തെറിച്ച കേസ് അന്വേഷിക്കാൻ പ്രത്യേക സംഘത്തെ നിയോഗിച്ചു. പാലക്കാട് ടൗൺ നോർത്ത് സിഐയുടെ നേതൃത്വത്തിലാണ് കേസ് അന്വേഷിക്കുക. പാലക്കാട് വ്യാസാ വിദ്യാപീഠം പ്രീപ്രൈമറി സിബിഎസ്ഇ സ്കൂളിന് സമീപം സ്ഫോടക വസ്തു എങ്ങനെ എത്തി എന്ന കാര്യമാകും അന്വേഷിക്കുക. 

നിർമ്മാണം സംബന്ധിച്ചും പൊലിസ് വിവരങ്ങൾ ശേഖരിക്കും. ഉപജില്ല വിദ്യാഭ്യാസ ഓഫീസ് പാലക്കാട് വ്യാസാ വിദ്യാപീഠം പ്രീപ്രൈമറി സിബിഎസ്ഇ സ്കൂളിന് സംഭവത്തിൽ കാരണം കാണിക്കൽ നോട്ടീസ് നൽകിയിട്ടുണ്ട്. ബുധനാഴ്ചയാണ് സ്‌കൂളിൽ സ്ഫോടനം നടന്നത്. അപകടത്തിൽ പത്ത് വയസുകാരനും മറ്റൊരു സ്ത്രീക്കും പരിക്കേറ്റിരുന്നു. സ്‌കൂൾ കോമ്പൗണ്ടിനകത്ത് സ്‌ഫോടക വസ്തുക്കൾ എങ്ങനെ എത്തിയെന്നതടക്കം ദുരൂഹത നിലനിൽക്കുന്നുണ്ട്. ആർഎസ്എസ് ശാഖ നടക്കുന്ന സ്ഥലമാണ് സ്‌കൂൾ. സ്ഫോടന ദിവസവും ഇവിടെ ശാഖ നടന്നിരുന്നു.

ALSO READ: പാലക്കാട് ആര്‍എസ്എസ് നിയന്ത്രണത്തിലുള്ള സ്‌കൂളിലെ സ്‌ഫോടനം: കര്‍ശന നടപടിയെന്ന് മന്ത്രി

സംഭവത്തിൽ, കർശന നടപടി എടുക്കുമെന്ന് വിദ്യാഭ്യാസ മന്ത്രി വി ശിവൻകുട്ടി കഴിഞ്ഞ ദിവസം പ്രതികരിച്ചിരുന്നു. വിശദമായ അന്വേഷണം നടത്തി റിപ്പോർട്ട് നൽകാൻ പൊതുവിദ്യാഭ്യാസ ഡയറക്ടർക്ക് നിർദേശം നൽകിയതായും മന്ത്രി ഫേസ്ബുക്കിൽ കുറിച്ചു. സംഭവത്തെ വളരെ ഗൗരവമായാണ് സംസ്ഥാന സർക്കാർ കാണുന്നത്. നിയമപരമായി കർശന നടപടികൾ ഉണ്ടാകും. ഒപ്പം തന്നെ ഇക്കാര്യം അന്വേഷിച്ച് റിപ്പോർട്ട് നൽകാൻ പൊതുവിദ്യാഭ്യാസ ഡയറക്ടർക്ക് നിർദ്ദേശം നൽകിയിട്ടുണ്ട് എന്നും മന്ത്രി പറഞ്ഞു.