കുന്ദമംഗലം: രക്തത്തിന് മതവും ജാതിയുമില്ല എന്ന സന്ദേശം ഉയര്‍ത്തിപിടിച്ച് കാരന്തൂര്‍ സീടെക് ആര്‍ട്‌സ് ആന്റ് സയന്‍സ് കോളജ് പൂര്‍വ വിദ്യാര്‍ഥി സംഘടനയായ സ്‌നേഹസ്പര്‍ശവും കാരന്തൂര്‍ മഹല്ല് കമ്മിറ്റിയുടേയും കാരന്തൂര്‍ ഹര ഹര ക്ഷേത്ര കമ്മിറ്റിയുടേയും കുന്ദമംഗലം സെന്റ് ജോസഫ്  ചര്‍ച്ചിന്റെയും സംയുക്താഭിമുഖ്യത്തില്‍ കോഴിക്കോട് മെഡിക്കല്‍കോളജ് ആശുപത്രിയുടെ സഹകരണത്തോടെ സംഘടിപ്പിച്ച മെഗാ രക്തദാന ക്യാമ്പ് മത സൗഹാര്‍ദ്ദത്തിന്റെയും മനുഷ്യ സ്‌നേഹത്തിന്റെയും മാതൃകയായി.
 കുന്ദമംഗലം ബ്ലോക്ക് പഞ്ചായത്ത് പ്രസിഡന്റ് രമ്യ ഹരിദാസ് ഉദ്ഘാടനം ചെയ്തു. സീടെക് പ്രിന്‍സിപ്പല്‍ പി.എന്‍ ശശിധരന്‍ അധ്യക്ഷനായി. കാരന്തൂര്‍ മഹല്ല് കമ്മിറ്റി പ്രസിഡന്റ് ബീരാന്‍ ഹാജി, ഹര ഹര ക്ഷേത്ര കമ്മിറ്റി രക്ഷാധികാരി പള്ളിക്കല്‍ കൃഷണന്‍ മാസ്റ്റര്‍, കുന്ദമംഗലം സെന്റ്  ജോസഫ് ചര്‍ച്ച് വികാരി ബെന്നി, കുന്ദമംഗലം പ്രസ്‌ക്ലബ് ട്രഷറര്‍ സി. ഷാജി സംസാരിച്ചു. രക്തദാന സന്ദേശ യാത്ര സബ് ഇന്‍സ്‌പെക്ടര്‍ പി യൂസുഫ് ഫ്‌ളാഗ്ഓഫ് ചെയ്തു. സ്‌നേഹസ്പര്‍ശം സെക്രട്ടറി ഷിജു കെപി ഉള്ളിയേരി സ്വാഗതവും സ്റ്റുഡന്‍സ് കണ്‍വീനര്‍ ഷാനിദ്  നന്ദിയും പറഞ്ഞു.