ആയഞ്ചേരി: ജനാധിപത്യത്തിന്റെ ബാലപാഠങ്ങള്‍ പകര്‍ന്നു നല്‍കി നടത്തിയ മദ്‌റസാ ലീഡര്‍ തെരഞ്ഞെടുപ്പ് വിദ്യാര്‍ഥികള്‍ക്കു നവ്യാനുഭവമായി. വള്ള്യാട് ഇസ്സത്തുല്‍ ഇസ്‌ലാം ഹയര്‍ സെക്കന്‍ഡറി മദ്‌റസയിലാണു തെരഞ്ഞെടുപ്പ് നടന്നത്.
തെരഞ്ഞെടുപ്പ് വിജ്ഞാപനം, നാമനിര്‍ദേശ പത്രിക സമര്‍പ്പിക്കല്‍, സൂക്ഷ്മ പരിശോധന, പത്രിക പിന്‍വലിക്കല്‍ തുടങ്ങി പൂര്‍ണമായും പൊതുതെരഞ്ഞെടുപ്പിന്റെ മാതൃകയിലായിരുന്നു ലീഡര്‍ തെരഞ്ഞെടുപ്പ് നടന്നത്.
വിവിധ ഇടങ്ങളില്‍ സജ്ജീകരിച്ച പോളിങ് ബൂത്തുകളില്‍ പ്രിസൈഡിങ് ഓഫിസര്‍മാരും പോളിങ് ഏജന്റുമാരും സുരക്ഷാ ഉദ്യോഗസ്ഥരും തെരഞ്ഞെടുപ്പ് നിയന്ത്രിച്ചു.