മലപ്പുറം: ക്ലാസിലിരുന്നാൽ ബോർഡിൽ എഴുതുന്നതൊന്നും മറ്റുള്ളവരെപ്പോലെ കാണാനാവില്ല. മറ്റു കുട്ടികൾക്കും അധ്യാപകർക്കും ഞങ്ങളെ സഹായിക്കാനുമാകില്ല. ബ്രെയിൽ ലിപി പാഠപുസ്തകങ്ങൾ ലഭിച്ചാൽ മാത്രമേ ക്ലാസിലിരുന്ന് പഠിക്കാൻ പറ്റൂ മലപ്പുറം വൈദ്യരങ്ങാടി ബൈത്തുൽ മുറാദ് വി.പി സിദ്ദീഖ്-റൈഹാനത്ത് ദമ്പതികളുടെ മകൾ ആയിഷ സമീഹ ഇതുപറയുമ്പോൾ കണ്ണിൽ നനവു പടരുന്നു. കഴിഞ്ഞ ജൂണിൽ പാഠപുസ്തകങ്ങൾ ആവശ്യപ്പെട്ട് അവൾ വിദ്യാഭ്യാസ മന്ത്രിക്ക് കത്തയച്ചിരുന്നു. തുടർന്ന് പുസ്തകങ്ങൾ അച്ചടിക്കാൻ മന്ത്രി നിർദേശം നൽകി. എന്നാൽ ക്ലാസ് തുടങ്ങി മൂന്നു മാസം പിന്നിട്ടിട്ടും അച്ചടി തുടങ്ങിയിട്ടില്ല.

പാഠപുസ്തകങ്ങളില്ലാതെ പഠിക്കേണ്ട ഗതികേടിലാണ് ആയിഷ സമീഹയെപ്പോലെ കാഴ്ച പരിമിതിയുള്ള നിരവധി ഹയർസെക്കൻഡറി വിദ്യാർഥികൾ. മുൻപ് 12 വരെ ക്ലാസുകളിലേക്ക് ബ്രെയിൽ ലിപിയിൽ പുസ്തകങ്ങൾ അച്ചടിച്ചിരുന്നു. എന്നാൽ പിന്നീട് ഹയർസെക്കൻഡറികളിൽ നിർത്തലാക്കി. എസ്.സി.ഇ.ആർ.ടി പ്രസിലാണ് പുസ്തകങ്ങൾ അച്ചടിച്ചിരുന്നത്. പിന്നീട് കേരള ഫെഡറേഷൻ ഓഫ് ദ ബ്ലൈയിന്റ് എന്ന സംഘടനക്ക് നൽകി. എന്നാൽ സർക്കാറിൽനിന്ന് ഇവർക്ക് ഇതുവരെ അനുമതി ലഭിച്ചിട്ടില്ല.10-ാം ക്ലാസിൽ മികച്ച നേട്ടം കൈവരിച്ച സമീഹ ഹ്യൂമാനിറ്റീസ് കോഴ്‌സിലാണ് പഠിക്കുന്നത്.