കോഴിക്കോട്: ലഹരിമരുന്ന് വാങ്ങാൻ പണം കണ്ടെത്തുന്നതിനായി പ്ലസ് ടു വിദ്യാർഥി തന്റെ സുഹൃത്തായ പെൺകുട്ടിയെ ഭീഷണിപ്പെടുത്തി വീട്ടിൽ നിന്ന് പണവും സ്വർണവും എടുപ്പിച്ചതായി പരാതി. കോഴിക്കോട് നരിക്കുനിയിലാണ് ഈ ഞെട്ടിക്കുന്ന സംഭവം. പെൺകുട്ടിയുടെ പെരുമാറ്റത്തിൽ  സംശയം തോന്നിയ വീട്ടുകാർ കാര്യങ്ങൾ വിശദമായി അന്വേഷിച്ചതോടെയാണ് സംഭവം പുറത്ത് വന്നത്. 

പെൺകുട്ടിയുടെ സ്വകാര്യ ചിത്രങ്ങൾ പുറത്തുവിടുമെന്ന് ഭീഷണിപ്പെടുത്തിയാണ് പ്രായപൂർത്തിയാകാത്ത പ്രതി, വീട്ടിൽ നിന്ന് പണവും സ്വർണവും എടുക്കാൻ നിർബന്ധിച്ചതെന്ന് പെൺകുട്ടിയുടെ ബന്ധുക്കൾ ആരോപിക്കുന്നു. വീട്ടിൽ നിന്ന് തുടർച്ചയായി പണം നഷ്ടപ്പെടുന്നത് ശ്രദ്ധയിൽപ്പെട്ടതോടെ രക്ഷിതാക്കൾ വിശദമായി അന്വേഷിച്ചപ്പോഴാണ് പെൺകുട്ടി സത്യങ്ങൾ തുറന്നുപറഞ്ഞത്. കുറ്റാരോപിതനായ വിദ്യാർഥി ലഹരി മാഫിയയുടെ കണ്ണിയാണെന്നും പെൺകുട്ടിയുടെ കുടുംബം ആരോപിച്ചു. ഇരുവരും പ്രൈമറി ക്ലാസിൽ ഒന്നിച്ച് പഠിച്ചവരാണ്.

ALSO READ: ഷാഫി പറമ്പിലിന്റെയും രാഹുൽ മാങ്കൂട്ടത്തിലിന്റെയും സാമ്പത്തിക ഇടപാടുകൾ: അന്വേഷണം ആവശ്യപ്പെട്ട് എഐവൈഎഫ്; ഡിജിപിക്ക് പരാതി

പെൺകുട്ടി പഠനത്തിൽ താൽപ്പര്യക്കുറവ് കാണിക്കുകയും ശാരീരിക അസ്വസ്ഥതകൾ പ്രകടിപ്പിക്കുകയും ചെയ്യുന്നത് രക്ഷിതാക്കളുടെ  ശ്രദ്ധയിൽപ്പെട്ടിരുന്നു. ധരിച്ചിരുന്ന സ്വർണാഭരണങ്ങൾ നഷ്ടപ്പെട്ടതിനെക്കുറിച്ച് രക്ഷിതാക്കൽ ചോദിച്ചപ്പോൾ വീണുപോയെന്നാണ് കുട്ടി ആദ്യം പറഞ്ഞത്. എന്നാൽ, തുടർന്നുള്ള ചോദ്യം ചെയ്യലിൽ, നരിക്കുനിയിലെ ഒരു ജ്വല്ലറിയിൽ ആഭരണങ്ങൾ വിറ്റ് പണം സുഹൃത്തിന് നൽകിയതായി പെൺകുട്ടി വെളിപ്പെടുത്തി. പരാതിയുടെ അടിസ്ഥാനത്തിൽ കാക്കൂർ പൊലിസ് കേസെടുത്ത് അന്വേഷണം ആരംഭിച്ചു. 

In Kozhikode, a plus two student allegedly threatened a female friend, forcing her to steal gold and money from her home to fund his drug purchases. The incident came to light when her family noticed missing money and questioned her, leading to a police complaint