കൊരട്ടി: ഓണം ആഘോഷിക്കാന്‍ നാട്ടിലേക്ക് തിരിച്ച എക്‌സൈസ് ഇന്‍സ്‌പെക്ടറുടെ വാഹനത്തില്‍ നിന്ന് മദ്യവും പണവും പിടികൂടി. വ്യാഴാഴ്ച്ച രാവിലെയോടെ ചിറങ്ങര ദേശീയപാതയില്‍ വിജിലന്‍സ് സംഘം നടത്തിയ റെയ്ഡിലാണ് എക്‌സൈസ് ഇന്‍സ്‌പെക്ടറും, സുഹൃത്തുക്കളും പിടിയിലായത്. കാറില്‍ നിന്ന് ഏഴ് കുപ്പി വിദേശമദ്യവും, 50,640 രൂപയും വിജിലന്‍സ് പിടിച്ചെടുത്തു. 

ഓണം ആഘോഷിക്കാനായി തിരുവനന്തപുരത്തേക്ക് പോവുന്നതിനിടയിലാണ് എക്‌സൈസിന്റെ മിന്നല്‍ റെയ്ഡുണ്ടായത്. കാറില്‍ എക്‌സൈസ് ഇന്‍സ്‌പെക്ടറുടെ ഇരിങ്ങാലക്കുട സ്വദേശികളായ രണ്ട് സുഹൃത്തുക്കളുമാണുണ്ടായിരുന്നത്. 

നാട്ടിലേക്ക് പോകുമ്പോള്‍ പണവും, ബാറുകളില്‍ നിന്ന് ശേഖരിക്കുന്ന മദ്യവും കടത്തുന്നത് എക്‌സൈസ് ഇന്‍സ്‌പെക്ടറുടെ പതിവാണെന്ന് നേരത്തെ പരാതി ലഭിച്ചിരുന്നു. ഇതിന്റെ അടിസ്ഥാനത്തിലാണ് വിജിലന്‍സ് സംഘം കാര്‍ തടഞ്ഞ് നിര്‍ത്തി പരിശോധന നടത്തിയത്. നടപടിക്രമങ്ങള്‍ പൂര്‍ത്തിയാക്കിയ ശേഷം പിടിയിലായ സംഘത്തെ വിട്ടയച്ചു. തൃശൂര്‍ വിജിലന്‍സ് ഡിവൈഎസ്പി ജിം പോളിന്റെ നേതൃത്വത്തിലുള്ള സംഘമാണ് അന്വേഷണം നടത്തിയത്. 

അതേസമയം പ്രവാസിയായ തന്റെ സുഹൃത്ത് വിമാനത്താവളത്തില്‍ നിന്ന് നിയമപരമായി വാങ്ങിയതാണ് മദ്യമെന്നും, പണം തന്റേതാണെന്നുമാണ് എക്‌സൈസ് ഉദ്യോഗസ്ഥന്റെ ന്യായീകരണം. 

ALSO READ: നവജാത ശിശുവിനെ 4.5 ലക്ഷം രൂപയ്ക്ക് വിറ്റു; ദുര്‍ഗാവാഹിനി നേതാവ് ഉള്‍പ്പെടെ മൂന്നുപേര്‍ അറസ്റ്റില്‍ 

കഴിഞ്ഞ ദിവസം കൊച്ചി മരട് സ്റ്റേഷനിലെ എസ്.ഐയെ കൈക്കൂലി കേസില്‍ വിജിലന്‍സ് അറസ്റ്റ് ചെയ്തിരുന്നു. പിടിച്ചെടുത്ത വാഹനം വിട്ടുകിട്ടാനായി പരാതിക്കാരനില്‍ നിന്ന് പതിനായിരം രൂപ കൈക്കൂലി ആവശ്യപ്പെട്ട എസ്.ഐ ഗോപകുമാറാണ് വിജിലന്‍സിന്റെ പിടിയിലായത്. സ്റ്റേഷനില്‍ വെച്ചാണ് ഇയാളെ വിജിലന്‍സ് കസ്റ്റഡിയിലെടുത്തത്. 

കൈക്കൂലി നല്‍കാതെ വാഹനം വിടില്ലെന്ന് ഗോപകുമാര്‍ തറപ്പിച്ച് പറഞ്ഞതോടെയാണ് ഉടമ വിജിലന്‍സിനെ വിവരം അറിയിച്ചത്. തുടര്‍ന്ന് വിജിലന്‍സ് സംഘം നല്‍കിയ നിര്‍ദേശത്തെ തുടര്‍ന്ന് ഉടമ കൈക്കൂലിയുമായി മരട് സ്റ്റേഷനിലെത്തി. പണം ഗോപകുമാറിന് കൈമാറിയതിന് തൊടുപിന്നാലെ വിജിലന്‍സ് സംഘം സ്റ്റേഷനകത്ത് കയറി ഇയാളെ കൈയോടെ പിടികൂടുകയായിരുന്നു. 

സംഭവത്തില്‍ ഗോപകുമാറിനെ സസ്‌പെന്റ് ചെയ്ത് സിറ്റി പൊലിസ് കമ്മീഷണര്‍ പുട്ട വിമലാദിത്യ ഉത്തരവിറക്കുകയും ചെയ്തു. 

vigilance raid excise inspector vehicle and seize foreign liquor and money