റിയാദ്: അഴിമതിക്കെതിരായ പോരാട്ടം കടുപ്പിച്ച് സഊദി അറേബ്യ. അഴിമതിക്കെതിരായ നടപടിയിൽ 138 സർക്കാർ ഉദ്യോഗസ്ഥരെ അറസ്റ്റ് ചെയ്തതായി ഓവർസൈറ്റ് ആൻഡ് ആന്റി-കറപ്ഷൻ അതോറിറ്റി (നസഹ) അറിയിച്ചു. കൈക്കൂലി വാങ്ങിയതിനും ഔദ്യോഗിക പദവി ദുരുപയോഗം ചെയ്തതിനുമാണ് വിവിധ കുറ്റങ്ങൾ ചുമത്തി ഇവരെ അറസ്റ്റു ചെയ്തിരിക്കുന്നത്. അറസ്റ്റിലായവർ വിവിധ മന്ത്രാലയങ്ങളിലെ 
ഉയർന്ന പദവി വഹിക്കുന്ന ജീവനക്കാരാണ്. ഇവരിൽ ചിലരെ പിന്നീട് ജാമ്യത്തിൽ വിട്ടയച്ചു.

ALSO READ: ഞായറാഴ്ച രക്തചന്ദ്രന്‍: ഏഷ്യയില്‍ പൂര്‍ണ ചന്ദ്രഗ്രഹണം; ഇന്ത്യയിലെയും ഗള്‍ഫിലെയും സമയം അറിഞ്ഞിരിക്കാം | Lunar Eclipse 2025 

ആഗസ്റ്റിൽ നസഹ ഉദ്യോഗസ്ഥർ വിവിധ മന്ത്രാലയങ്ങളിലായി 1,851 പരിശോധനകൾ നടത്തിയിരുന്നു. പരിശോധനകൾക്കൊടുവിൽ 416 പേർക്കെതിരെ അന്വേഷണം ആരംഭിച്ചിട്ടുണ്ട്. രാജ്യത്തെ അഴിമതി തുടച്ചുനീക്കാനും സർക്കാർ സ്ഥാപനങ്ങളുടെ ഉത്തരവാദിത്തം ശക്തിപ്പെടുത്താനുമുള്ള നിരന്തര ശ്രമങ്ങളുടെ ഭാഗമായാണ് കടുത്ത നടപടി.

അറസ്റ്റിലായ ഉദ്യോഗസ്ഥർ ആഭ്യന്തരം, നാഷണൽ ഗാർഡ്, പ്രതിരോധം, വിദ്യാഭ്യാസം, ആരോഗ്യം, മുനിസിപ്പാലിറ്റി, ഭവന നിർമ്മാണം, മാനവ വിഭവശേഷി, സാമൂഹിക വികസനം, വ്യവസായം, ധാതു വിഭവങ്ങൾ തുടങ്ങിയ മന്ത്രാലയങ്ങളിൽ ജോലി ചെയ്തിരുന്നവരാണ്. കൂടാതെ, സകാത്ത്, നികുതി, കസ്റ്റംസ് അതോറിറ്റികളിലെ ജീവനക്കാരും കേസിൽ ഉൾപ്പെട്ടതായാണ് വിവരം.

ALSO READ: പൊതു സ്ഥലത്ത് മാലിന്യം വലിച്ചെറിഞ്ഞാൽ 10,000 റിയാൽ വരെ പിഴ; അനധികൃത മാലിന്യ സംസ്കരണത്തിനെതിരെ കർശന നടപടികളുമായി സഊദി 

സഊദി സർക്കാരിലെ സുതാര്യത, സദ്ഭരണം, പൊതുജന വിശ്വാസം എന്നിവ വർധിപ്പിക്കാനുള്ള വിശാല ശ്രമത്തിന്റെ ഭാഗമാണ് നസഹയുടെ നീക്കം. “അഴിമതി ഒരു തലത്തിലും വെച്ചുപൊറുപ്പിക്കില്ല. ഈ നടപടി അതിന്റെ വ്യക്തമായ സൂചനയാണ്,” നസഹ വ്യക്തമാക്കി.

saudi arabia launches major anti-corruption drive as 138 government employees are arrested for misuse of power, bribery and fraud.