തിരുവനന്തപുരം: തദ്ദേശ തിരഞ്ഞെടുപ്പിനുള്ള അന്തിമ വോട്ടര്‍ പട്ടികയില്‍ 2.83 കോടി വോട്ടര്‍മാര്‍ ഇടംപിടിച്ചതായി തെരഞ്ഞെടുപ്പ് കമ്മീഷന്‍. ഇതില്‍ 1.33 കോടി പുരുഷന്‍മാരും, 1.49 കോടി സ്ത്രീ വോട്ടര്‍മാരുമാണുള്ളത്. 

2087 പ്രവാസി വോട്ടര്‍മാരും, 276 ട്രാന്‍സ്‌ജെന്‍ഡര്‍ വോട്ടര്‍മാരും പട്ടികയിലുണ്ട്. 2020 ലെ തെരഞ്ഞെടുപ്പില്‍ 2.76 കോടി വോട്ടര്‍മാരാണ് ഉള്‍പ്പെട്ടിരുന്നത്. നേരത്ത പുറത്തിറക്കിയ കരട് വോട്ടര്‍ പട്ടികയില്‍ 2.66 കോടി പേരാണ് ഉണ്ടായിരുന്നത്. അന്തിമ പട്ടിക പുറത്തിറങ്ങുമ്പോള്‍ കണക്കില്‍ നേരിയ വ്യത്യാസത്തിന് സാധ്യതയുണ്ടെന്ന് തെരഞ്ഞെടുപ്പ് കമ്മീഷന്‍ കൂട്ടിച്ചേര്‍ത്തു. 

ജൂലൈ 23നാണ് കരട് വോട്ടര്‍ ലിസ്റ്റ് പുറത്തിറക്കിയത്. കരട് പട്ടികയില്‍ 2,68,78,258 വോട്ടര്‍മാരാണ് ഉള്‍പ്പെട്ടത്. തുടര്‍ന്ന് പുതുതായി പേരു ചേര്‍ക്കാന്‍ ആഗസ്റ്റ് 12 വരെ തെരഞ്ഞെടുപ്പ് കമ്മീഷന്‍ സമയം അനുവദിച്ചു. 

വോട്ട് ചേര്‍ക്കാനായി 30 ലക്ഷത്തിനടുത്ത് അപേക്ഷകള്‍ ലഭിച്ചെന്ന് തെരഞ്ഞെടുപ്പ് കമ്മീഷന്‍ അറിയിച്ചു. ഈ അപേക്ഷകള്‍ കൂടി പരിഗണിച്ച് വാര്‍ഡ് പുനര്‍വിഭജനത്തിന് ശേഷം പുതിയ വാര്‍ഡുകളിലെ പോളിങ് സ്‌റ്റേഷനുകള്‍ അടിസ്ഥാനമാക്കിയാണ് ഇപ്പോള്‍ അന്തിമ പട്ടിക പുറത്തിറക്കിയിട്ടുള്ളത്. 

ALSO READ: അഫ്ഗാനിസ്ഥാനില്‍ വീണ്ടും ഭൂചലനം; റിക്ടര്‍ സ്‌കെയിലില്‍ 5.2 തീവ്രത രേഖപ്പെടുത്തി; രക്ഷാപ്രവര്‍ത്തനം തുടരുന്നു

പതിനാല് ജില്ലകളിലായി 941 ഗ്രാമപഞ്ചായത്തുകളിലെ 17337 വാര്‍ഡുകളിലെയും, 87 മുനിസിപ്പാലിറ്റികളിലെ 3240 വാര്‍ഡുകളിലെയും ആറ് കോര്‍പ്പറേഷനുകളിലെ 421 വാര്‍ഡുകളിലെയും അന്തിമ വോട്ടര്‍ പട്ടികയാണ് ഇപ്പോള്‍ പുറത്തിറക്കിയത്. 

വോട്ടര്‍ ലിസ്റ്റില്‍ പേരുണ്ടോ? എങ്ങനെ പരിശോധിക്കാം ? 

അന്തിമ പട്ടികയില്‍ പേര് ഉള്‍പ്പെട്ടിട്ടുണ്ടോ എന്നറിയാനായി നിങ്ങള്‍ സംസ്ഥാന തെരഞ്ഞെടുപ്പ് കമ്മീഷന്റെ വെബ്‌സൈറ്റ് സന്ദര്‍ശിക്കുക. (sec.kerala.gov.in). പുറമെ അതത് തദ്ദേശ സ്ഥാപനങ്ങളിലും, താലൂക്ക്, വില്ലേജ് ഓഫീസുകളിലും വോട്ടര്‍ പട്ടിക ലഭ്യമാണ്.

Election Commission has announced that 2.83 cr voters have been included in the final voter list for the local body elections in Kerala.