കാബൂള്‍: അഫ്ഗാനിസ്ഥാനില്‍ വീണ്ടും ഭൂചലനം. കഴിഞ്ഞ ദിവസം ഭൂകമ്പമുണ്ടായ ജലാലാബാദിന് 34 കിലോമീറ്റര്‍ അകലെയാണ് പ്രഭവ കേന്ദ്രമെന്ന് അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്തു. ഭൂചലനം റിക്ടര്‍ സ്‌കെയിലില്‍ 5.2 തീവ്രത രേഖപ്പെടുത്തി. മേഖലയില്‍ രക്ഷാപ്രവര്‍ത്തനം തുടരുന്നതായി താലിബാന്‍ വക്താവ് അറിയിച്ചു. 

അതേസമയം തുടര്‍ ഭൂചലങ്ങളില്‍ വിറങ്ങിലിച്ചിരിക്കുകയാണ് അഫ്ഗാന്‍ ജനത. രണ്ടുദിവസം മുന്‍പ് കുനാര്‍ പ്രവിശ്യയിലുണ്ടായ ഭൂകമ്പത്തില്‍ 1400 പേര്‍ക്കാണ് ജീവന്‍ നഷ്ടമായത്. റിക്ടര്‍ സ്‌കെയില്‍ 6.0 തീവ്രത രേഖപ്പെടുത്തിയ ഭൂചലനത്തില്‍ 3000 ലധികം പേര്‍ക്ക് പരിക്കേറ്റതായാണ് റിപ്പോര്‍ട്ട്. 160 കിലോമീറ്റര്‍ ആഴത്തിലായിരുന്നു ഭൂകമ്പത്തിന്റെ പ്രഭവ കേന്ദ്രം. 

ALSO READ: വെനസ്വേല സർക്കാരിനെ അട്ടിമറിക്കാൻ അമേരിക്ക ശ്രമിക്കുന്നു: കരീബിയനിൽ സൈനിക വിന്യാസം, ആരോപണവുമായി വെനസ്വേലൻ പ്രസിഡൻ്റ്

ഭൂചലനത്തില്‍ നൂര്‍ഗല്‍, സാവ്‌കെ, വാതപൂര്‍, മനോഗി, ചാപ്പദാര ജില്ലകളില്‍ കനത്ത നാശനഷ്ടങ്ങളാണ് റിപ്പോര്‍ട്ട് ചെയ്തിട്ടുള്ളത്. ഇവിടെയും രക്ഷാപ്രവര്‍ത്തനം തുടരുകയാണ്. നിരവധി കെട്ടിടങ്ങളും, വീടുകളും തകര്‍ന്നിട്ടുണ്ട്. കെട്ടിടാവശിഷ്ടങ്ങള്‍ക്കിടയില്‍ ഇനിയും നിരവധിയാളുകള്‍ കുടുങ്ങി കിടക്കുന്നതായാണ് റിപ്പോര്‍ട്ട്. 

കഴിഞ്ഞ ദിവസമുണ്ടായ ഭൂകമ്പത്തിന്റെ പ്രകമ്പനം ഇന്ത്യയടക്കമുള്ള അയല്‍ രാജ്യങ്ങളിലും പ്രകടമായിരുന്നു. ഹിമാചല്‍ പ്രദേശിലെ ചമ്പ ജില്ലയില്‍ നേരിയ ഭൂചലനം അനുഭവപ്പെട്ടു. 

Another earthquake has struck Afghanistan. According to international media reports, the epicenter was 34 kilometers away from Jalalabad, where a quake had occurred recently