ദുബൈ: കൊടും ചൂടില്‍ പുറം ജോലിയെടുക്കുന്ന യു.എ.ഇയിലെ തൊഴിലാളികള്‍ക്ക് ഐസ് ക്രീമിന്റെ ആശ്വാസത്തണുപ്പുമായി പാക്കേജിങ് രംഗത്തെ പ്രമുഖരായ ഹോട്ട്പാക്ക്. ഷാര്‍ജയിലെയും വടക്കന്‍ എമിറേറ്റുകളിലെയും അയ്യായിരത്തില്‍ പരം തൊഴിലാളികള്‍ക്കും ബൈക് ഡെലിവറി ജീവനക്കാര്‍ക്കും ഹോട്ട്പാക്കിന്റെ സി.എസ്.ആര്‍ പ്രവര്‍ത്തനങ്ങളുടെ ഭാഗമായി ഹാപിനസ് പ്രൊജക്ടിന്റെ കീഴില്‍ നടത്തിയ കാംപയിനിലാണ് ഇഗഌവുമായി ചേര്‍ന്ന് ഐസ് ക്രീം സ്‌കൂപ്പുകള്‍ വിതരണം ചെയ്തത്.
ഓഗസ്റ്റ് 20 മുതല്‍ സെപ്റ്റംബര്‍ ആദ്യ വാരം വരെ നടന്ന കാംപയിനില്‍ ദുബൈ, അബൂദബി, ഷാര്‍ജ, അല്‍ ഐന്‍, ഉമ്മുല്‍ഖുവൈന്‍ എന്നീ എമിറേറ്റുകളിലുമായുള്ള ലേബര്‍ ക്യാമ്പുകളും റോഡരികുകളിലെ തൊഴിലിടങ്ങളും കേന്ദ്രീകരിച്ചായിരുന്നു ഐസ് ക്രീം വിതരണം.

ഇത് കൂടാതെ, കഴിഞ്ഞ മാസം ദുബൈ ചാരിറ്റബിള്‍ അസോസിയേഷന്റെ 'എ ബ്രീസ് ഇന്‍ ദി സമ്മര്‍' കാംപയിന്‍ ഭാഗമായി ഹോട്ട്പാക്ക് ദുബൈയിലെ തൊഴിലാളികള്‍ക്കിടയില്‍ ഐസ് ക്രീമും ജ്യൂസും പഴങ്ങളും വിതരണം ചെയ്തിരുന്നു.
യഥാര്‍ത്ഥ വിജയത്തിന്റെ കണക്കെടുക്കുന്നത് ബിസിനസ് വളര്‍ച്ച മാത്രം പരിഗണിച്ചായിരിക്കരുതെന്നും, നാം സമൂഹത്തിലുണ്ടാക്കുന്ന ഗുണപരമായ മാറ്റങ്ങള്‍ കൂടി കണക്കിലെടുത്തായിരിക്കണമെന്നും ഹോട്ട്പാക്ക് ഗ്രൂപ് സി.ഇ.ഒയും മാനേജിങ് ഡയരക്ടറുമായ പി.ബി അബ്ദുല്‍ ജബ്ബാര്‍ പറഞ്ഞു.

'ഐസ് ക്രീം വിതരണം എന്നതിലുപരി, കൊടും വേനലില്‍ പുറത്ത് അക്ഷീണം തൊഴിലെടുക്കുന്നവര്‍ക്കുള്ള കൃതജഞത രേഖപ്പെടുത്തല്‍ കൂടിയായിരുന്നു ഈ കാംപയിന്‍. ഇഗ്ലൂവുമായി ചേര്‍ന്നതിലൂടെ, ആയിരക്കണക്കിന് തൊഴിലാളികളുമായി സന്തോഷം പങ്കിടാനും അവരുടെ കഠിനാധ്വാനം ഏറെ വിലപ്പെട്ടതാണെന്ന് ഓര്‍മിപ്പിക്കാനും സാധിച്ചു.
'ഐസ് ക്രീം വിതണ കാംപയിന്‍ എന്നതിലുപരി, തിരക്കു പിടിച്ച നഗരങ്ങളുടെ നട്ടെല്ലെന്ന് പറയാവുന്ന പുറം ജോലിക്കാരുടെയും ഡെലിവറി റൈഡര്‍മാരുടെയും സംഭാവനകളെ ആദരപൂര്‍വം അംഗീകരിക്കുന്ന പ്രവര്‍ത്തനം എന്ന നിലയിലാണ് കാംപയിന് രൂപം നല്‍കിയതെന്നും അദ്ദേഹം വ്യക്തമാക്കി.

ഇത്തരം പ്രവര്‍ത്തനങ്ങള്‍ പ്രത്യേക ലക്ഷ്യത്തോടെയുള്ള സുസ്ഥിരതയില്‍ ഹോട്ട്പാക്ക് എത്രത്തോളം വിശ്വസിക്കുന്നുവെന്നതിന് തെളിവാണെന്ന് ഗ്രൂപ് സി.ഒ.ഒയും എക്‌സിക്യുട്ടിവ് ഡയരക്ടറുമായ സൈനുദ്ദീന്‍ പി.ബി പറഞ്ഞു.
ജനങ്ങളുടെയും സമൂഹത്തിന്റെയും നമ്മുടെ ഭൂമിയുടെ തന്നെയും നിലനില്‍പ്പില്‍ ശ്രദ്ധ ചെലുത്തിയുള്ള ഇത്തരം പരിശ്രമങ്ങള്‍ പരസ്പരം കൈ കോര്‍ത്താണ് മുന്നോട്ടു പോകുന്നത്. ഇഗ്ലൂവുമായി ചേര്‍ന്നതിലൂടെ, പാക്കേജിങ് സൊലൂഷന്‍സ് ഉണ്ടാക്കുക എന്നതിനപ്പുറം, അര്‍ഥവത്തായ ബന്ധങ്ങള്‍ കൂടി ഉണ്ടാക്കിയെടുക്കാനുള്ള തങ്ങളുടെ ദൗത്യത്തിനു ഒന്നു കൂടി അടിവര ഇടുകയാണ് ഹോട്ട്പാക്ക് ചെയ്തത്  അദ്ദേഹം കൂട്ടിച്ചേര്‍ത്തു.

Hotpack offers free ice cream scoops to 5,000 outdoor workers in scorching heat in uae