പത്തനംതിട്ട: വേടന്റെ ഷോ കാണാൻ എത്തി മടങ്ങുന്നതിനിടെ പാർക്കിങ്ങുമായി ബന്ധപ്പെട്ട് ഉണ്ടായ തർക്കത്തിൽ വീട്ടമ്മയുടെ കൈക്ക് പരുക്കേറ്റു. കോന്നി മങ്ങാരം കളർനിൽക്കുന്നതിൽ റഷീദ ബീവിയുടെ കൈ ആണ് കമ്പുകൊണ്ടുള്ള ആക്രമണത്തിൽ പൊട്ടിയത്. ഇവരുടെ ഭർത്താവ് സുലൈമാനെ പൊലിസുകാരനുൾപ്പെട്ട സംഘം ആക്രമിക്കുന്നത് തടഞ്ഞപ്പോഴാണ് ഇവർക്ക് നേരെ ആക്രമണം ഉണ്ടായത്. സംഭവത്തിൽ തിരുവനന്തപുരം എആർ ക്യാംപിലെ പൊലിസ് ഉദ്യോഗസ്ഥൻ കൊട്ടാരക്കര നെടുവത്തൂർ ചണ്ണയ്ക്കാപാറ പുത്തൻപുര താഴേതിൽ അഖിൽരാജ് (30) ഉൾപ്പെടെ നാലുപേരെ കോന്നി പൊലിസ് അറസ്റ്റ് ചെയ്തു.   

തിങ്കളാഴ്ച രാത്രി 10ന് മാങ്കുളത്താണ് ആക്രമണ സംഭവം ഉണ്ടായത്. കരിയാട്ടം ടൂറിസം എക്സ്പോയുടെ സമാപനത്തോടനുബന്ധിച്ചു നടത്തിയ റാപ്പർ വേടന്റെ ഷോ കാണാനെത്തിയതായിരുന്നു അഖിൽ രാജ്, സഹോദരൻ എം.ആർ.അഭിലാഷ് (32), വട്ടക്കാവ് ലക്ഷംവീട് മനു മോഹൻ (20), പത്തനംതിട്ട മാത്തൂർ മലമുകളിൽ സെറ്റിൽമെന്റ് കോളനി കാഞ്ഞിരം നിൽക്കുന്നതിൽ പി.കെ.ദിപിൻ (സച്ചു–23) എന്നിവർ. ഷോ കഴിഞ്ഞ് മടങ്ങുന്നതിനിടെ മദ്യലഹരിയിലായിരുന്ന മാങ്കുളത്തു വച്ച സ്കൂട്ടർ എടുക്കുന്നതിനിടെ നാട്ടുകാരുമായി തർക്കമുണ്ടായി.

ALSO READ: പൊലിസ് ആക്രമണത്തിനെതിരെ വീണ്ടും പരാതി; കണ്ണൂരിൽ വർക്ക്‌ഷോപ്പ് ഉടമയുടെ കർണപുടം അടിച്ചു തകർത്തു

തുടർന്നു സമീപവാസിയായ സുലൈമാനെ ഈ സംഘം വീട്ടുവളപ്പിൽ കടന്ന് മർദ്ദിച്ചു. എന്നാൽ ഭർത്താവിനെ ആക്രമിക്കുന്നത് തടയാൻ റഷീദ ബീവി എത്തിയതോടെ ഇവരെ കമ്പുകൊണ്ട് അടിക്കുകയും തള്ളിയിടുകയും ചെയ്യുകയായിരുന്നു. ആക്രമണത്തിൽ ഗുരുതരമായി പരുക്കേറ്റ റഷീദ ബീവിയെ കോന്നി മെഡിക്കൽ കോളജിൽ പ്രവേശിപ്പിച്ചു. 

ALSO READ: വേടന്‍ അറസ്റ്റില്‍; വൈദ്യപരിശോധനക്ക് ശേഷം വിട്ടയക്കും 

സംഭവത്തിൽ നാൽവർ സംഘത്തെ പിന്നാലെ കോന്നി പൊലിസ് അറസ്റ്റ് ചെയ്തു. കോടതിയിൽ ഹാജരാക്കിയ പ്രതികളെ കോടതി റിമാൻഡ് ചെയ്തു. അതേസമയം, നാട്ടുകാർ മർദ്ദിച്ചെന്ന് പൊലിസുകാരൻ അടങ്ങുന്ന സംഘവും പരാതി നൽകി. ഇതിൽ കേസെടുത്ത പൊലിസ് കണ്ടാലറിയാവുന്ന 10 പേരെ പ്രതിചേർത്തു.