റിയാ​ദ്: പൊതു സ്ഥലങ്ങളിൽ ലൈസൻസില്ലാതെ യാത്രക്കാരെ ആകർഷിക്കുന്ന അനധികൃത ഗതാഗത സേവനങ്ങൾ ഇല്ലാതാക്കാനായി പുതിയ നിയമം അവതരിപ്പിച്ച് സഊദി ട്രാൻസ്‌പോർട്ട് ജനറൽ അതോറിറ്റി. ഈ നിയപ്രകാരം പിഴകൾ ഉൾപെടെയുള്ള കടുത്ത നിയമ നടപടികൾ നേരിടേണ്ടതായി വരാം. 

സാധുവായ ലൈസൻസ് ഇല്ലാതെ വ്യക്തികൾ യാത്രാ സേവനങ്ങൾ വാഗ്ദാനം ചെയ്യുന്നത് ഈ നിയമം വിലക്കിയിട്ടുണ്ട്. യാത്രക്കാരെ വിളിച്ച് ആകർഷിക്കുക (ഹെയിലിംഗ് എന്നറിയപ്പെടുന്ന രീതി), അവരെ തടസ്സപ്പെടുത്തുക, പിന്തുടരുക, അല്ലെങ്കിൽ യാത്രാ മേഖലകളിൽ കൂട്ടംകൂടുക, ലൈസൻസില്ലാത്ത വാഹനങ്ങളിലേക്ക് ആളുകളെ ക്ഷണിക്കാനുള്ള ഉദ്ദേശ്യത്തോടെ അലഞ്ഞുനടക്കുക തുടങ്ങിയ പ്രവർത്തനങ്ങൾ കർശനമായി നിരോധിച്ചിട്ടുണ്ട്. 

ALSO READ: ഇലക്ട്രിക് ഡെലിവറി ബൈക്കുകൾക്കായി ബാറ്ററി സ്വാപ്പിംഗ് സ്റ്റേഷനുകൾ; പുതിയ പദ്ധതിയുമായി ദുബൈ

നിയമലംഘകർക്ക് 11,000 സഊദി റിയാൽ വരെ പിഴ ലഭിക്കും. കൂടാതെ, 25 ദിവസം വരെ വാഹനം കണ്ടുകെട്ടുകയും ചെയ്യും. ആവർത്തിച്ചോ സംഘടിതമായോ അനധികൃത ഗതാഗതം നടത്തുന്നവർക്ക് 20,000 റിയാൽ വരെ പിഴ, 60 ദിവസം വരെ വാഹനം കണ്ടുകെട്ടൽ തുടങ്ങിയ ശിക്ഷകൾ ലഭിക്കും. വാഹനം ലേലം ചെയ്യനുള്ള സാധ്യതയും ഉണ്ട്. സ‌ഊദി പൗരൻമാരല്ലാത്ത നിയമലംഘകർക്ക് നാടുകടത്തലും ശിക്ഷയായി ലഭിക്കാം.

അനധികൃത പ്രവർത്തനങ്ങൾ തടയുക, യാത്രക്കാരുടെ അവകാശങ്ങൾ സംരക്ഷിക്കുക, ലൈസൻസുള്ള ഓപ്പറേറ്റർമാരുടെ താൽപ്പര്യങ്ങൾ സുരക്ഷിതമാക്കുക എന്നിവയെല്ലാമാണ് ഇതിലൂടെ ലക്ഷ്യമിടുന്നതെന്ന് അതോറിറ്റി വ്യക്തമാക്കി. "ഈ നടപടികൾ ഗതാഗത സംവിധാനത്തിലുള്ള വിശ്വാസം ശക്തിപ്പെടുത്തുകയും എല്ലാ യാത്രക്കാർക്കും മികച്ച സേവനം ഉറപ്പാക്കുകയും ചെയ്യും," അതോറിറ്റി പ്രസ്താവനയിൽ വ്യക്തമാക്കി. 

നിയമം നടപ്പിലാക്കുന്നതോടൊപ്പം, വർക്ഷോപ്പുകൾ, ബോധവൽക്കരണ കാമ്പെയ്‌നുകൾ എന്നിവയും ആരംഭിച്ചിട്ടുണ്ട്. സഊദി അറേബ്യയുടെ വിഷൻ 2030 ലക്ഷ്യങ്ങളുമായി ഗതാഗത മേഖലയെ സംയോജിപ്പിക്കാനുള്ള ശ്രമങ്ങളുടെ ഭാഗമാണ് ഈ നടപടി.

The Transport General Authority (TGA) in Saudi Arabia has introduced a new law banning unlicensed passenger transport services, targeting informal ride solicitation or hailing. The law imposes significant penalties on violators, including fines and vehicle impoundment, to protect passengers and support licensed operators.