ദുബൈ: ഗസ്സയില്‍ ഫലസ്തീനികളെ കൂട്ടക്കൊല ചെയ്യുന്ന സയണിസ്റ്റ് രാജ്യത്തിന് പിന്തുണ കൊടുത്തതിന്റെ പേരില്‍ ബഹിഷ്‌കണം നേരിടുന്ന ഫ്രഞ്ച് റീട്ടെയില്‍ ഭീമന്‍ കാരിഫോര്‍ (Carrefour) കഴിഞ്ഞ പത്ത് മാസത്തിനുള്ളില്‍ നാലു രാജ്യങ്ങളിലാണ് അടച്ചുപൂട്ടിയത്. ആദ്യം ഇസ്‌റാഈല്‍ അയല്‍രാജ്യമായ ജോര്‍ദാനിലും പിന്നീട് ഗള്‍ഫ് രാജ്യങ്ങളായ ഒമാന്‍, കിവൈത്ത്, ബഹ്‌റൈന്‍ എന്നിവിടങ്ങളിലെയും ശാഖകളാണ് അടച്ചുപൂട്ടിയത്. ഗള്‍ഫ് മേഖലയിലെ ഏറ്റവും പ്രമുഖ സൂപ്പര്‍മാര്‍ക്കറ്റ് ശൃംഖലകളില്‍ ഒന്നാണ് കാരിഫോര്‍. 

തീരുമാനങ്ങള്‍ക്ക് വിശദീകരണമൊന്നും നല്‍കാതെയാണ് ഉപഭോക്താക്കളുടെ പിന്തുണയ്ക്ക് നന്ദി പറഞ്ഞ ശേഷം ജോര്‍ദാന്‍, ഒമാന്‍, ബഹ്‌റൈന്‍, കുവൈത്ത് എന്നിവിടങ്ങളിലെ തങ്ങളുടെ സ്റ്റോറുകള്‍ കമ്പനി അടച്ചുപൂട്ടിയത്. എന്നാല്‍ പൂട്ടുവീണ നീലിടത്തും കാരിഫോര്‍ ഹൈപ്പര്‍ മാക്‌സ് എന്ന പേരില്‍ വീണ്ടും തുറന്നിട്ടുണ്ട്.

ജോര്‍ദാനിലാണ് ആദ്യം കാരിഫോര്‍ അവരുടെ ശാഖ അടച്ചുപൂട്ടിയത്. കഴിഞ്ഞവര്‍ഷം നവംബറിലാണ് കാരിഫോര്‍ ജോര്‍ദാനിലെ എല്ലാ സ്റ്റോറുകളും അടച്ചുപൂട്ടിയത്. പിന്നീട് പ്രാദേശിക ബ്രാന്‍ഡായ ഹൈപ്പര്‍മാക്‌സിന് കീഴില്‍ പേര് മാറ്റി തുറന്നു. യു.എ.ഇയിലെ വമ്പന്‍ ഗ്രൂപ്പായ അല്‍ഫുതൈം ആണ് കാരിഫോറിന്റെ ഷോപ്പുകള്‍ നടത്തിയിരുന്നത്. സമാനരീതിയില്‍ അല്‍ഫുതൈമിന്റെ ഹൈപ്പര്‍ മാക്‌സിന് കീഴില്‍ ഒമാനിലും ബഹ്‌റൈനിലും ഇപ്പോള്‍ കുവൈത്തിലും കാരിഫോര്‍ തുറന്നു പ്രവര്‍ത്തിക്കുകയായിരുന്നു. 

 

 

കാരിഫോര്‍ പ്രവര്‍ത്തനം നിര്‍ത്തിയ രാജ്യങ്ങള്‍

ജോര്‍ദാന്‍: 2024 നവംബര്‍ 4ന് സ്റ്റോറുകള്‍ ഔദ്യോഗികമായി അടച്ചു.

ഒമാന്‍: ജോര്‍ദാന്‍ എക്‌സിറ്റ് കഴിഞ്ഞ് രണ്ട് മാസത്തിന് ശേഷം, 2025 ജനുവരി 7ന് എല്ലാ പ്രവര്‍ത്തനങ്ങളും അവസാനിച്ചു.

ബഹ്‌റൈന്‍: 2025 സെപ്റ്റംബര്‍ 14ന് കാരിഫോര്‍ വ്യാപാരം നിര്‍ത്തി.

കുവൈത്ത്: വെറും രണ്ട് ദിവസത്തിന് ശേഷം, 2025 സെപ്റ്റംബര്‍ 16ന് മൂന്നാമത്തെ ഗള്‍ഫ് രാജ്യത്തും കാരിഫോര്‍ അടച്ചുപൂട്ടി.

പൂട്ടാനുള്ള കാരണങ്ങള്‍ എന്തൊക്കെയായിരുന്നു?

ശാഖകള്‍ അടച്ചുപൂട്ടാനുള്ള കാരണമായി കമ്പനി ഇതുവരെ ഔദ്യോഗിക പ്രസ്താവനകള്‍ പുറപ്പെടുവിച്ചിട്ടില്ല. സോഷ്യല്‍ മീഡിയയില്‍ നടത്തിയ മിക്ക പ്രഖ്യാപനങ്ങളും ഉപഭോക്താക്കളോട് നന്ദി രേഖപ്പെടുത്തി. എന്നാല്‍ സാമ്പത്തികമോ പ്രവര്‍ത്തനപരമോ ആയ കാരണങ്ങളൊന്നും വ്യക്തമാക്കിയിട്ടില്ല.

2024 നവംബര്‍ 4ന് ജോര്‍ദാനിലെ ശാഖ അടച്ചുപൂട്ടിയപ്പോള്‍ ഇറക്കിയ പ്രസ്താവന ഇങ്ങനെ:  'ഞങ്ങളുടെ ഉപഭോക്താക്കള്‍ക്ക് ഞങ്ങള്‍ നന്ദി പറയുന്നു. ഈ തീരുമാനം ഉണ്ടാക്കിയേക്കാവുന്ന അസൗകര്യത്തിന് ഞങ്ങള്‍ ക്ഷമ ചോദിക്കുന്നു. പതിറ്റാണ്ടുകളായി ഉപഭോക്താക്കളുടെ വിശ്വാസത്തിനും പിന്തുണയ്ക്കും നന്ദി പറയുന്നു'. 

പശ്ചിമേഷ്യയില്‍ ആരാണ് കാരിഫോര്‍ നടത്തുന്നത്?

1995 ല്‍ യുഎഇ ആസ്ഥാനമായയ മാജിദ് അല്‍ ഫുതൈം (എംഎഎഫ്) ആണ് കാരിഫോര്‍ ഈ മേഖലയിലേക്ക് അവതരിപ്പിച്ചത്. പശ്ചിമേഷ്യ, ആഫ്രിക്ക, ഏഷ്യ എന്നിവിടങ്ങളിലെ രാജ്യങ്ങളില്‍ സ്വന്തം പേരിലും 'എം' ലോഗോയിലും കാരിഫോര്‍ പ്രവര്‍ത്തിപ്പിക്കാനുള്ള പ്രത്യേക അവകാശം എംഎഎഫിന് ഉണ്ട്. ഇതില്‍ ബഹ്‌റൈന്‍, ഈജിപ്ത്, ജോര്‍ജിയ, ഇറാഖ്, കെനിയ, കുവൈത്ത്, ലെബനന്‍, ഒമാന്‍, പാകിസ്ഥാന്‍, ഖത്തര്‍, സൗദി അറേബ്യ, ഉഗാണ്ട എന്നിവ ഉള്‍പ്പെടുന്നു. ഇക്കഴിഞ്ഞ മെയ് വരെ മാജിദ് അല്‍ ഫുതൈം റീട്ടെയില്‍ 12 വിപണികളിലായി 390 ലധികം കാരിഫോര്‍ സ്റ്റോറുകളാണ് പ്രവര്‍ത്തിക്കുന്നത്. 

വ്യാപക ബഹിഷ്‌കരണം

ഗസ്സയില്‍ കൂട്ടക്കൊല നടത്തിവരുന്ന സയണിസ്റ്റ് സൈനികര്‍ക്ക് കാരിഫോര്‍ സമ്മാനപൊതികള്‍ കൊടുത്തയച്ചതും, സൈനികര്‍ക്കായി കമ്പനി സംഭാവന പിരിക്കാനും തുടങ്ങിയതുമാണ് ബഹിഷ്‌കരണം ശക്തിപ്പെടാന്‍ കാരണം. ഇസ്‌റാഈലിന്റെ വംശഹത്യക്ക് സഹായം നല്‍കിയതിനെ തുടര്‍ന്ന് ബോയ്‌കോട്ട്, ബി.ഡി.എസ് മൂവ്‌മെന്റ് (Boycott, Divestment and Sanctions, BDS) ആഹ്വാനംചെയ്തതിനെ തുടര്‍ന്നാണ് കാരിഫോറിന് ഗള്‍ഫ് ഉള്‍പ്പെടെയുള്ള മേഖലകളില്‍ വന്‍ തിരിച്ചടി നേരിട്ടത്. ഇസ്‌റാഈല്‍ ഭരണകൂടത്തിന് പിന്തുണ നല്‍കുന്ന കമ്പനികളെ അന്താരാഷ്ട്ര നിയമം പാലിക്കാന്‍ നിര്‍ബന്ധിക്കുന്ന പ്രസ്ഥാനമാണ് ബി.ഡി.എസ്. വിവിധ രാജ്യങ്ങളിലെ കാരിഫോര്‍ ഔട്ട്‌ലെറ്റുകള്‍ക്ക് മുന്നില്‍ യുദ്ധവിരുദ്ധ ആക്ടിവിസ്റ്റുകള്‍ പ്രതിഷേധിക്കുന്നത് പതിവ് കാഴ്ചയാണ്.

 ALSO READ: യു.എസ് ഫെഡറല്‍ റിസര്‍വ് ബാങ്കിന് പിന്നാലെ ഗള്‍ഫ് രാജ്യങ്ങളിലെ സെന്‍ട്രല്‍ ബാങ്കുകളും പലിശനിരക്ക് കുറച്ചു; കുറവ് കാല്‍ ശതമാനം

Carrefour, one of the Middle East's most recognisable supermarket brands, has exited four countries in just over 10 months, marking a significant shift in the regional grocery market. The retailer closed its stores in Jordan, Oman, Bahrain, and Kuwait, each time thanking customers for their support while offering little explanation for the decisions. UAE-based conglomerate Majid Al Futtaim, which holds exclusive rights to operate Carrefour in the region, has simultaneously expanded the operations of its own grocery brand, HyperMax.