തിരുവനന്തപുരം: ശബരിമലയിലെ സ്വര്‍ണപ്പാളി വിവാദത്തില്‍ അടിയന്തര പ്രമേയത്തിനു നോട്ടിസ് നല്‍കി പ്രതിപക്ഷം. തിരുവഞ്ചൂര്‍ രാധാകൃഷ്ണന്‍ എം.എല്‍.എയാണ് നോട്ടിസ് നല്‍കിയത്. കോടതിയുടെ പരിഗണനയിലിരിക്കുന്ന വിഷയമായതിനാല്‍ നോട്ടിസ് പരിഗണിക്കാന്‍ കഴിയില്ലെന്ന് സ്പീക്കര്‍ എ.എന്‍.ഷംസീര്‍ വ്യക്തമാക്കി. 

എന്നാല്‍ പ്രതിപക്ഷ നേതാവ് ഇതിനെ എതിര്‍ത്തു. കോടതിയുടെ പരിഗണനയില്‍ ഇരിക്കുന്ന വിഷയങ്ങള്‍ മുന്‍പും അടിയന്തരപ്രമേയമായി സഭയില്‍ വന്നിട്ടുണ്ടെന്ന് പ്രതിപക്ഷ നേതാവ് പറഞ്ഞു. എന്നാല്‍ അയ്യപ്പ സംഗമം കലക്കാനുള്ള പ്രതിപക്ഷത്തിന്റെ നീക്കത്തിന്റെ ഭാഗമാണിതെന്ന് മന്ത്രിമാരായ പി.രാജീവും എം.ബി.രാജേഷും പറഞ്ഞു. തുടര്‍ന്ന് സഭയില്‍ വാഗ്വാദങ്ങളുണ്ടായി. പിന്നാലെ പ്രതിപക്ഷം സഭയില്‍ നിന്ന് ഇറങ്ങിപ്പോയി.  

വളരെ ഗൗരവകരമായ വിഷയമാണിത്. ശബരിമലയിലെ ദ്വാരപാലക ശില്‍പം നന്നാക്കാന്‍ കൊണ്ടുപോയി തിരികെ എത്തിച്ചപ്പോള്‍ നാല് കിലോ സ്വര്‍ണം കുറഞ്ഞതായി പ്രതിപക്ഷ നേതാവ് പറഞ്ഞു. എന്നിട്ടാണ് നാളെ അയ്യപ്പ സംഗമം നടത്തുന്നത്. അയ്യപ്പ ഭക്തരെയും വിശ്വാസി സമൂഹത്തേയും മുഴുവന്‍ വിഷമത്തിലാക്കിയ പ്രശ്നമാണിതെന്നും അദ്ദേഹം പറഞ്ഞു. സര്‍ക്കാരും ദേവസ്വം ബോര്‍ഡും അവരെ സംരക്ഷിക്കുകയാണ്.

നാലു കിലോ സ്വര്‍ണം ശബരിമലയില്‍ നിന്ന് അടിച്ചുമാറ്റിയിട്ട് ഈ സഭയില്‍ ഇത് ചര്‍ച്ച ചെയ്യാന്‍ അനുവദിക്കില്ല എന്ന് പറയുന്നത് വളരെ തെറ്റായ ഒരു കീഴ്‌വഴക്കമാണ്. അയ്യപ്പന്റെ സ്വര്‍ണം അടിച്ചു മാറ്റിയവരാണ് ദേവസ്വം ബോര്‍ഡില്‍ ഇരിക്കുന്നത്. അതിന്റെ പാപം മറയ്ക്കാനാണോ അയപ്പസംഗമം നടത്തുന്നതെന്ന് സംശയിക്കുന്നതായും പ്രതിപക്ഷ നേതാവ് പറഞ്ഞു.

സാധാരണ മന്ത്രിയുടെ വിശദീകരണത്തിന് ശേഷമാണ് സ്പീക്കര്‍ റൂളിങ് നല്‍കാറുള്ളതെങ്കില്‍, ഇത്തവണ സ്പീക്കര്‍ നേരിട്ട് തന്നെ വിഷയം ചര്‍ച്ച ചെയ്യാന്‍ കഴിയില്ലെന്ന് വ്യക്തമാക്കുകയായിരുന്നു.