തിരുവനന്തപുരം: 1995ലെ എ.കെ ആന്റണി സർക്കാരിന്റെ കാലത്തെ ശിവഗിരിയിലെ പൊലിസ് നടപടിയെ  ചൊല്ലി നിലവിലെ മഠം ഭരണസമിതിയിൽ ഭിന്നത. ആന്റണിയെ പിന്തുണച്ച് ശിവഗിരി മഠാധിപതി സ്വാമി സച്ചിതാനന്ദ രംഗത്തെത്തിയപ്പോൾ, പൊലിസ് നടപടിയെ തള്ളിപ്പറയുകയാണ് മഠം ജനറൽ സെക്രട്ടറി സ്വാമി ശുഭാംഗാനന്ദ. അന്നത്തെ സർക്കാർ ശിവഗിരിയെ സഹായിക്കുകയാണ് ചെയ്തതെന്നാണ്  അന്ന് പ്രകാശാനന്ദ പക്ഷത്ത് ഉണ്ടായിരുന്ന സ്വാമി സച്ചിതാനന്ദ പറഞ്ഞത്. കോടതി നിർദേശം ഉണ്ടായിരുന്നതിനാൽ പൊലിസ് നടപടി അനിവാര്യമായിരുന്നുവെന്നും അങ്ങനെ ഒരു അനിവാര്യതയിലേക്ക് ആരാണോ പ്രശ്‌നങ്ങളെ സങ്കീർണമാക്കിയത് അവരാണ് തെറ്റുകാരെന്നും സ്വാമി സച്ചിദാനന്ദ മാധ്യമപ്രവർത്തകരോട് പറഞ്ഞു. ജയിച്ചുവന്നവർ ഭരണം ഏറ്റുവാങ്ങാൻ എത്തിയിട്ടും നടന്നില്ല. ചില രാഷ്ട്രീയ പാർട്ടിയുടെ പ്രവർത്തകർ ഒത്തു ചേർന്നു. ശിവഗിരിക്ക് ദോഷം വരുമെന്ന് കണ്ടപ്പോഴാണ് കോടതി ഇടപെട്ടത്. സഭയിലെ ചർച്ചയുമായി ബന്ധപ്പെട്ട് രാഷ്ട്രീയം പറയാൻ ഇല്ലെന്നും സ്വാമി സച്ചിദാനന്ദ വ്യക്തമാക്കി.

ALSO READ: സർക്കാർ കുടിശ്ശിക പെരുകി; വഖ്ഫ് ബോർഡ് ക്ഷേമപദ്ധതികൾ നിലച്ചു

ഇതിൽ നിന്നു വ്യത്യസ്തമായ നിലപാടാണ് ശിവഗിരി മഠം ജനറൽ സെക്രട്ടറി സ്വാമി ശുഭാംഗാനന്ദ സ്വീകരിച്ചത്. ആന്റണി ഇപ്പോൾ ഖേദം പ്രകടിപ്പിച്ചിട്ട് ഒരു കാര്യവുമില്ലെന്നും ശ്രീനാരായണീയർക്ക് ഏറ്റ മനോവിഷമം എന്തു ചെയ്താലും മാറ്റാനാകില്ലെന്നും സ്വാമി ശുഭാംഗാനന്ദ സ്വകാര്യ ചാനലിനോട് പറഞ്ഞു. അന്ന് നടന്നത് നരനായാട്ടായിരുന്നു. ഇപ്പോഴത്തെ ഖേദപ്രകടനത്തിനു പിന്നിൽ രാഷ്ട്രീയ ലക്ഷ്യങ്ങളുണ്ടെന്നും സ്വാമി ശുഭാംഗാനന്ദ പറഞ്ഞു.ശിവഗിരിയിൽ പൊലിസിനെ അയച്ചതിനു പിന്നാലെ നടന്ന സംഭവങ്ങളിൽ പലതും നിർഭാഗ്യകരമാണെന്നാണ് കഴിഞ്ഞ ദിവസം വാർത്താ സമ്മേളനത്തിൽ ആന്റണി പറഞ്ഞത്.