തൃപ്രയാർ: തൃപ്രയാറിലെ ഒരു ഡ്രൈവിങ് സ്കൂൾ ഉടമയുടെ ബാങ്ക് അക്കൗണ്ടിൽ നിന്ന് വ്യാജ മൊബൈൽ ആപ്പ് ഉപയോഗിച്ച് 4 ലക്ഷം രൂപയോളം മോഷ്ടാക്കൾ തട്ടിയെടുത്തു. തൃപ്രയാർ ലൈറ്റ് ഡ്രൈവിങ് സ്കൂളിന്റെ ഉടമയായ പെരിങ്ങോട്ടുകര സ്വദേശി പ്രദീപിനാണ് ഈ സംഭവത്തിൽ പണം നഷ്ടമായത്. ബാങ്ക് സ്റ്റേറ്റ്മെന്റ് പരിശോധിക്കാൻ ശ്രമിക്കവേ, യഥാർഥ ബാങ്ക് ആപ്പിന് പകരം ഫോണിൽ കടന്നുകൂടിയ വ്യാജ ആപ്പ് ഉപയോഗിച്ചാണ് തട്ടിപ്പ് നടന്നത്.

‌സംഭവം നടന്നത് ചൊവ്വാഴ്ച ഉച്ചയ്ക്ക് 2 മണിക്ക് ശേഷമാണ്. പ്രദീപ് തന്റെ ബാങ്ക് അക്കൗണ്ടിന്റെ ബാലൻസ് പരിശോധിക്കാൻ ശ്രമിച്ചപ്പോൾ, അറിയാതെ ഫോണിൽ ഡൗൺലോഡ് ചെയ്തിരുന്ന വ്യാജ ആപ്പ് തുറന്നു. എട്ട് തവണകളിലായി 4,03,000 രൂപയോളം മോഷ്ടാക്കൾ പിൻവലിച്ചു. ഒടിപി ഉൾപ്പെടെ പങ്കുവെച്ചതാണ് തട്ടിപ്പിന് കാരണമായതെന്നാണ് പൊലിസിന്റെ പ്രാഥമിക നിഗമനം.

ആദ്യ തവണ പണം നഷ്ടപ്പെട്ട ഉടനെ ബാങ്കിൽ നിന്ന് പ്രദീപിന് അറിയിപ്പ് ലഭിച്ചു. ഉടൻ ബാങ്കിലെത്തി അക്കൗണ്ട് മരവിപ്പിക്കാൻ ശ്രമിച്ചെങ്കിലും, അതിന് മുമ്പ് 4 ലക്ഷത്തോളം രൂപ മോഷണം പോയിരുന്നു. അക്കൗണ്ട് മരവിപ്പിച്ച ശേഷവും 25,000 രൂപ കൂടി നഷ്ടപ്പെട്ടതായി പ്രദീപ് പറഞ്ഞു. എടിഎം കാർഡ്, ബാങ്ക് ട്രാൻസ്ഫർ എന്നിവ വഴിയാണ് മോഷ്ടാക്കൾ പണം പിൻവലിച്ചതെന്ന് പൊലിസ് കണ്ടെത്തി.

പണം നഷ്ടപ്പെട്ട ശേഷവും മോഷ്ടാക്കൾ വിവിധ ഫോൺ നമ്പറുകളിൽ നിന്നും വാട്സാപ്പ് സന്ദേശങ്ങൾ വഴിയും പ്രദീപിനെ ബന്ധപ്പെട്ടു. ബാങ്കിന്റെ പ്രതിനിധികളെന്ന വ്യാജേന വിളിച്ച അവർ, നഷ്ടപ്പെട്ട തുക തിരികെ നൽകാമെന്നും, അതിനായി "ടാക്സ്" എന്ന പേര് പറഞ്ഞ് കൂടുതൽ പണം അയക്കണമെന്നും ആവശ്യപ്പെട്ടു. ഫോൺ വിളിച്ചവരിൽ ഒരാൾ മലയാളി ആണെന്നും പ്രദീപ് പറഞ്ഞു.

പൊലിസിന്റെ പ്രാഥമിക അന്വേഷണത്തിൽ, തട്ടിപ്പ് ജാർഖണ്ഡിൽ നിന്നാണ് നടന്നതെന്ന് കണ്ടെത്തിയിട്ടുണ്ട്. തൃപ്രയാർ പൊലിസിന്റെ സൈബർ സെൽ കേസെടുത്ത് അന്വേഷണം ആരംഭിച്ചു. വ്യാജ ആപ്പുകൾ ഉപയോഗിച്ചുള്ള സൈബർ കുറ്റകൃത്യങ്ങൾ തടയാൻ ജനങ്ങൾ ജാഗ്രത പാലിക്കണമെന്ന് പൊലിസ് മുന്നറിയിപ്പ് നൽകിയിട്ടുണ്ട്.