നീലേശ്വരം: റോളര്‍സ്‌കേറ്റിങ്ങില്‍ വിസ്മയം തീര്‍ക്കുകയാണ് നീലേശ്വരം പള്ളിക്കരയിലെ സഹോദരിമാരായ വിഷ്ണുപ്രിയയും വൈഷ്ണവിയും. ദേശീയ അന്തര്‍ദേശീയ മത്സരങ്ങളില്‍ ഇതിനകംതന്നെ നിരവധി മെഡലുകള്‍ ഇവര്‍ വാങ്ങിക്കൂട്ടിയിട്ടുണ്ട്. തിരുപ്പൂരില്‍ നടന്ന ലോക സ്‌കേറ്റിങ്ങ് മാരത്തോണില്‍ ലോകറെക്കോര്‍ഡിനുടമയാകാന്‍ വിഷ്ണുപ്രിയയ്ക്കു കഴിഞ്ഞിട്ടുണ്ട്.
          കേരളത്തില്‍ നിന്നു പങ്കെടുത്ത 12 പേരില്‍ ഒരാളാണ് വിഷ്ണുപ്രിയ. രണ്ടു ദിവസം കൊണ്ട് നൂറുകണക്കിനു കിലോമീറ്റര്‍ ദൂരമാണ് ഇവര്‍ താണ്ടിയത്. തിരുവനന്തപുരത്തു നടന്ന സൗത്ത്‌സോണ്‍ മത്സരത്തില്‍ 100, 200 മീറ്റര്‍ വിഭാഗത്തില്‍ ഒന്നും രണ്ടും സ്ഥാനങ്ങള്‍ വിഷ്ണുപ്രിയ കരസ്ഥമാക്കിയിട്ടുണ്ട്. പാലക്കാട് നടന്ന ഇന്റര്‍ സ്‌കൂള്‍ മീറ്റില്‍ ഗോള്‍ഡ് മെഡലും ഈ മിടുക്കി കരസ്ഥമാക്കിയിരുന്നു. അനുജത്തി വൈഷ്ണവിയും ചേച്ചിയുടെ പാതയില്‍ തന്നെയാണ്. ദീക്ഷിത്, ദീപേഷ്, സുരേഷ്, ശരത് തുടങ്ങിയവരാണ് പരിശീലകര്‍. ബ്രിജേഷും പ്രീതിയുമാണ് മാതാപിതാക്കള്‍.