കോഴിക്കോട്: സഊദി അറേബ്യയിലെ ജയിലിൽ കഴിയുന്ന കോഴിക്കോട് ഫറോക്ക് സ്വദേശി അബ്ദുറഹീമിന്റെ മോചനം മെയ് മാസത്തോടെ ഉണ്ടാകുമെന്ന് റഹീം നിയമസഹായ സമിതി. കേസിൽ ഇന്നലെയുണ്ടായ സുപ്രിംകോടതി വിധി റഹീമിൻറെ മോചനത്തിന് ആശ്വാസം നൽകുന്ന വിധിയാണെന്നും റഹീം നിയമസഹായ സമിതി അധികൃതർ പറഞ്ഞു. ശിക്ഷാ നടപടികൾ മെയ് മാസത്തോടെ മോചനമുണ്ടാകുമെന്നാണ് പ്രതീക്ഷയെന്നും സമിതി പ്രതികരിച്ചു. സർക്കാരിനും സഊദി ഭരണ കൂടത്തിനും ഒപ്പം നിന്ന എല്ലാവർക്കും നന്ദി അറിയിക്കുന്നതായും റഹീം നിയമസഹായ സമിതി പ്രതികരിച്ചു.

കീഴ് കോടതിയുടെ വിധി ശരിവെച്ച് സഊദി സുപ്രിം കോടതി ഇന്നലെയാണ് ഉത്തരവ് പുറപ്പെടുവിച്ചത്. അപ്പീൽ കോടതിയുടെ വിധിക്കെതിരെ പ്രോസിക്യൂഷൻ നൽകിയ അപ്പീൽ സുപ്രിംകോടതി തള്ളുകയായിരുന്നു. ഇതോടെ റഹീമിനെതിരെയുളള കോടതി നടപടി അവസാനിച്ചു. 19 വർഷത്തിലധികം തടവിൽ കഴിഞ്ഞ സാഹചര്യത്തിൽ റഹീമിന്റെ മോചനം ഏതു സമയവും പ്രതീക്ഷിക്കാമെന്നാണ് നിഗമനം. ഏറെ പ്രമാദമായ കേസിൽ അബദുറഹീമിനെതിരെ നേരത്തെ വിചാരണ കോടതി വധശിക്ഷ വിധിച്ചിരുന്നു. ദിയാ ധനം നൽകിയതിനെ തുടർന്ന് കുടുംബം മാപ്പുനൽകിയതോടെയാണ് വധ ശിക്ഷ റദ്ദാക്കിയത്.

പബ്‌ളിക് റൈറ്റ് പ്രകാരം വിചാരണ നേരിട്ട റഹീമിന് ഈ വർഷം ജൂലൈ 26ന് റിയാദ് ക്രിമിനൽ കോടതി ഇരുപത് വർഷം തടവു ശിക്ഷ വിധിച്ചു. വിധിക്കെതിരെ പ്രോസിക്യൂഷൻ അപ്പീൽ സമർപ്പിച്ചെങ്കിലും ജൂലൈ 9 ന് കോടതി തളളി. തുടർന്നാണ് സുപ്രീം കോടതയിൽ അപ്പീൽ സമർപ്പിച്ചത്. ഇതും തളളിയതോടെ റഹീമിനെതിരെ ഇനി കോടതി നടപടി ഉണ്ടാവില്ല. റിയാദ് ജയിലിലെ നടപടിക്രമങ്ങൾ പൂർത്തിയാക്കി റഹീമിന് ഇന്ത്യയിലേയ്ക്കു മടങ്ങാൻ കഴിയും.

സുപ്രിംകോടതി വിധി ഏറെ സന്തോഷം നൽകുന്നതാണെന്ന് റിയാദിലെ അബ്ദുറഹീം നിയമ സഹായ സമിതി ചെയർമാൻ സി പി മുസ്തഫ, ജനറൽ കൺവീനർ അബ്ദുല്ല വല്ലാഞ്ചിറ, ട്രഷറർ സെബിൻ, യുസഫ് കാക്കഞ്ചേരി എന്നിവർ പ്രതികരിച്ചു.