തിരുവനന്തപുരം: കേരള ഹൈക്കോടതി എറണാകുളം കളമശ്ശേരിയിൽ സ്ഥാപിക്കാൻ മന്ത്രിസഭ യോഗം തത്വത്തിൽ അംഗീകാരം നൽകി. നിലവിൽ കൊച്ചിയിൽ മറൈൻ ഡ്രൈവിന് സമീപമാണ് ഹൈക്കോടതി സ്ഥിതി ചെയ്യുന്നത്. ഇവിടെ നിന്ന് മാറ്റി ജുഡീഷ്യൽ സിറ്റിയാണ് എച്ച്.എം.ടിയുടെ കൈവശമുള്ള 27 ഏക്കർ ഭൂമിയിൽ സ്ഥാപിക്കാൻ തീരുമാനമായത്. ഇതിനായി ഭൂമി ഏറ്റെടുക്കും. പദ്ധതിയുടെ പ്രാരംഭ നടപടികൾ ആരംഭിക്കാനും കേന്ദ്ര സർക്കാർ സഹായം ലഭ്യമാക്കാനുള്ള സാധ്യത പരിശോധിക്കാനും ആഭ്യന്തര വകുപ്പിനെ മന്ത്രിസഭ യോഗം ചുമതലപ്പെടുത്തി​.

നിലവിലെ ഹൈക്കോടതി മന്ദിരം വിപുലീകരിക്കാൻ സ്ഥലം ഏറ്റെടുക്കുന്നതിലെ പരിമിതിയും ഉയർന്ന വിലയും പരിഗണിച്ചാണ് ജുഡീഷ്യൽ സിറ്റി സ്ഥാപിക്കുന്നത് കളമശ്ശേരിയിലേക്ക് മാറ്റുന്നത്. പൊതുമരാമത്ത് വകുപ്പ് ജുഡീഷ്യൽ സിറ്റിയുടെ പ്രാഥമിക രൂപരേഖ തയ്യാറാക്കിയിട്ടുണ്ട്. 27 ഏക്കറിലായി 12 ലക്ഷത്തിലധികം ചതുരശ്ര അടി കെട്ടിടം പണിയും. ആധുനിക സംവിധാനങ്ങളും സൗകര്യങ്ങളുമുള്ള ജുഡീഷ്യൽ സിറ്റിയാണ് വിഭാവന ചെയ്യുന്നത്. ഭൂമി ഏറ്റെടുക്കലിനും കെട്ടിട നിർമാണത്തിനായി ഏകദേശം 1,000 കോടിയിൽപരം രൂപ ചെലവ് കണക്കാക്കുന്നു. 

മൂന്ന് ടവറുകളിലായാണ്​ ജുഡീഷ്യൽ സിറ്റി രൂപകൽപന ചെയ്യുന്നത്​. ഭരണഘടനയിലെ പ്രധാന തത്വങ്ങളായ തുല്യതക്കും സ്വാതന്ത്ര്യത്തിനും ജീവിക്കാനുള്ള മൗലികാവകാശങ്ങൾ ഉറപ്പുവരുത്തുന്ന 14, 19, 21 ആർട്ടിക്കിളുകൾ വിഭാവന ചെയ്താണ് മൂന്ന് ടവറുകൾ പണിയുന്നത്. പ്രധാന ടവറിൽ ഏഴ്​ നിലകളും മറ്റ് രണ്ട് ടവറുകളിൽ ആറ്​ നിലകൾ വീതവും ഉണ്ടാകും.

ചീഫ് ജസ്റ്റിസി​ൻറേത്​ ഉൾപ്പെടെ ആകെ 61 കോടതി ഹാളുകൾ, രജിസ്ട്രാർ ഓഫിസ്, ഭരണ വിഭാഗത്തിനുള്ള സൗകര്യങ്ങൾ, ലൈബ്രറി ബ്ലോക്ക്, ഓഡിറ്റോറിയം, വിവിധ കമ്മിറ്റികൾക്കുള്ള മുറികൾ, ആർബിട്രേഷൻ സെൻറർ, ഐ.ടി വിഭാഗം, റിക്രൂട്ട്മെന്റ് സെൽ തുടങ്ങി അതിവിപുലമായ സൗകര്യങ്ങൾ ഉണ്ടാകും. ഇൻഫർമേഷൻ സെൻറർ, അഡ്വക്കേറ്റ് ജനറൽ ഓഫിസ്, അഭിഭാഷകരുടെ ചേംബറുകൾ എന്നിവയും കെട്ടിടത്തിൽ ഇടം പിടിക്കും. വിശാലമായ പാർക്കിങ്​ സൗകര്യം, മഴവെള്ള സംഭരണി എന്നിവയും രൂപകൽപന ചെയ്തിട്ടുണ്ട്.

2023 ൽ മുഖ്യമന്ത്രി - ചീഫ് ജസ്റ്റിസ് വാർഷിക യോഗ തീരുമാന പ്രകാരമാണ് ജുഡീഷ്യൽ സിറ്റി സ്ഥാപിക്കാനുള്ള മന്ത്രിസഭ തീരുമാനം. നിയമ വകുപ്പ് മന്ത്രി പി. രാജീവിന്റെയും ഹൈക്കോടതി ജഡ്ജിമാരായ ജസ്റ്റിസ് മുഹമ്മദ് മുഷ്താഖ്, ജസ്റ്റിസ് ബെച്ചു കുര്യൻ തോമസ്, ജസ്റ്റിസ് രാജ വിജയരാഘവൻ, ജസ്റ്റിസ് സതീഷ് നൈനാൻ എന്നിവരുടെയും നേതൃത്വത്തിൽ കളമശ്ശേരിയിലെ സ്ഥലം സന്ദർശിച്ച ശേഷമാണ് പദ്ധതിയുടെ മറ്റു വിശദാംശങ്ങൾ തയാറാക്കിയത്.