അമ്പലപ്പുഴ: സ്ത്രീധനം നല്‍കാത്തതിന്റെ പേരിൽ നവവധുവിനെ ഭര്‍ത്താവും ബന്ധുക്കളും ചേര്‍ന്ന് മാനസികമായി പീഡിപ്പിക്കുകയും വീട്ടില്‍നിന്ന് ഇറക്കിവിടുകയും ചെയ്തതായി പരാതി. ആലപ്പുഴ സ്വദേശിനിയായ യുവതി അമ്പലപ്പുഴ പൊലിസില്‍ നല്‍കിയ പരാതിയെ തുടര്‍ന്ന് ഭര്‍ത്താവ് പുറക്കാട് കരൂര്‍ മഠത്തില്‍ പറമ്പില്‍ മിഥുന്‍, സഹോദരി മൃദുല, സഹോദരിയുടെ ഭര്‍ത്താവ് അജി എന്നിവര്‍ക്കെതിരെ കേസെടുത്തു.

വിദേശത്ത് ജോലി ചെയ്യുന്ന മിഥുന്‍ അടുത്തിടെ അവധിക്ക് നാട്ടിലെത്തിയിരുന്നു. പത്രപരസ്യത്തിലൂടെ വിവാഹാലോചനകള്‍ ക്ഷണിച്ചാണ് വിവാഹം നിശ്ചയിച്ചത്. യുവതിയുടെ വീട്ടുകാര്‍ സാമ്പത്തിക ബുദ്ധിമുട്ട് മൂലം സ്ത്രീധനമോ മറ്റ് പാരിതോഷികങ്ങളോ നല്‍കാന്‍ കഴിയില്ലെന്ന് വിവാഹം നിശ്ചയിക്കുന്നതിന് മുമ്പ് മിഥുനേയും ബന്ധുക്കളെയും അറിയിച്ചിരുന്നു. ഈ ധാരണയുടെ അടിസ്ഥാനത്തിലാണ് വിവാഹം മുന്നോട്ട് പോയത്. 2025 ആഗസ്റ്റ് 31-ന് ആലപ്പുഴ സ്വദേശിനിയായ യുവതിയെ മിഥുന്‍ സമുദായ ആചാരപ്രകാരം വിവാഹം കഴിച്ചു.

കബളിപ്പിക്കലും മാനസിക പീഡനവും

വിവാഹം നിയമപരമായി രജിസ്റ്റര്‍ ചെയ്യാനിരുന്ന ഒക്ടോബര്‍ 6-ന് മിഥുന്‍ തയ്യാറാകാതെ യുവതിയെയും വീട്ടുകാരെയും കബളിപ്പിച്ചു. കൂടാതെ, മിഥുനും സഹോദരി മൃദുലയും സഹോദരിയുടെ ഭര്‍ത്താവ് അജിയും ചേര്‍ന്ന് യുവതിയോട് 25 ലക്ഷം രൂപയും സ്വര്‍ണവും സ്ത്രീധനമായി ആവശ്യപ്പെട്ടു. സാമ്പത്തിക ബുദ്ധിമുട്ട് മൂലം ഇത് നല്‍കാന്‍ കഴിയില്ലെന്ന് യുവതി വ്യക്തമാക്കിയതിനെ തുടര്‍ന്ന്, 2025 സെപ്റ്റംബര്‍ 21-ന് യുവതിയെ വീട്ടില്‍നിന്ന് ഇറക്കിവിടുകയായിരുന്നു.

സമുദായ പ്രതിനിധികളും പഞ്ചായത്ത് അംഗങ്ങളും വിഷയം പരിഹരിക്കാന്‍ പലതവണ അനുനയിപ്പിക്കാന്‍ ശ്രമിച്ചെങ്കിലും മിഥുനും ബന്ധുക്കളും സഹകരിച്ചില്ല. ഇതോടെയാണ് യുവതി പൊലിസില്‍ പരാതി നല്‍കിയത്. മിഥുന്‍ ഒക്ടോബര്‍ 10-ന് അവധി കഴിഞ്ഞ് വിദേശത്തേക്ക് മടങ്ങാനിരിക്കുകയാണ്.

അമ്പലപ്പുഴ പൊലിസ് യുവതിയുടെ പരാതിയില്‍ മിഥുന്‍, മൃദുല, അജി എന്നിവര്‍ക്കെതിരെ കേസ് രജിസ്റ്റര്‍ ചെയ്ത് അന്വേഷണം ആരംഭിച്ചു. സ്ത്രീധനത്തിന്റെ പേര്‍ പറഞ്ഞ് നവവധുവിനെ മാനസികമായി പീഡിപ്പിക്കുകയും വീട്ടില്‍നിന്ന് ഇറക്കിവിടുകയും ചെയ്ത ഈ സംഭവം പ്രദേശത്ത് വലിയ ചര്‍ച്ചയായിരിക്കുകയാണ്.