കൊച്ചി: ഓപ്പറേഷന്‍ നുംഖോറില്‍ കസ്റ്റംസ് പിടിച്ചെടുത്ത വാഹനം വിട്ടുകിട്ടണമെന്ന് ആവശ്യപ്പെട്ട് നടന്‍ ദുല്‍ഖര്‍ സല്‍മാന്‍ ഹൈക്കോടതിയില്‍. എല്ലാ നിയമനടപടികളും പൂര്‍ത്തിയാക്കിയാണ് താന്‍ വാഹനം സ്വന്തമാക്കിയതെന്നും എന്നാല്‍ രേഖകള്‍ പരിശോധിക്കാന്‍ പോലും തയ്യാറാകാതെ കസ്റ്റംസ് കസ്റ്റഡിയിലെടുക്കുകയായിരുന്നുവെന്നും ഹൈക്കോടതിയില്‍ നല്‍കിയ ഹരജിയില്‍ അദ്ദേഹം ആരോപിച്ചു.  

ഓപ്പറേഷന്‍ നുംഖോറുമായി ബന്ധപ്പെട്ട് ദുല്‍ഖറിന്റെ നാല് വാഹനങ്ങളാണ് സംശയ നിഴലിലുള്ളത്. രണ്ട് ലാന്‍ഡ് റോവറും രണ്ട് നിസാന്‍ വാഹനങ്ങളും. ഇതില്‍ തമിഴ്‌നാട് രജിസ്‌ട്രേഷനുള്ള 2004 മോഡല്‍ ലാന്‍ഡ് റോവര്‍ ഡിഫന്‍ഡറാണ് കസ്റ്റംസ് പിടിച്ചെടുത്തത്. 

അടുത്ത ദിവസംതന്നെ ദുല്‍ഖറിനെ ചോദ്യം ചെയ്യാന്‍ വിളിപ്പിക്കാനുള്ള തീരുമാനത്തിലാണ് കസ്റ്റംസ്. വാഹനം സംബന്ധിച്ച എല്ലാ രേഖകളും ഹാജരാക്കാന്‍ തയ്യാറാണെന്ന് ദുല്‍ഖര്‍ വ്യക്തമാക്കിയിട്ടുണ്ട്. 

മലപ്പുറം, കോഴിക്കോട് ജില്ലകളിലായി ചില വ്യവസായികള്‍, വാഹന ഷോറൂമുകള്‍, ഇടനിലക്കാരുടെ വീടുകള്‍ എന്നിങ്ങനെ നടത്തിയ പരിശോധനയില്‍ 11 വാഹനങ്ങളാണ് പിടിച്ചെടുത്തിരുന്നത്. പിടിച്ചെടുത്ത വാഹനങ്ങള്‍ നികുതി വെട്ടിച്ച് കടത്തിയവയായിരുന്നു എന്ന് അവരുടെ ഉടമസ്ഥരായ സിനിമ താരങ്ങള്‍ ഉള്‍പ്പെടെയുള്ളവര്‍ക്ക് അറിവുണ്ടായിരുന്നുവോ എന്ന് പരിശോധിച്ചുവരികയാണ്. നികുതിവെട്ടിച്ച് കടത്തിയതാണ് എന്നു വ്യക്തമായിട്ടും ഇവ വാങ്ങിയതാണെങ്കില്‍ ഉടമസ്ഥരും നടപടി നേരിടേണ്ടി വരും. പിടിച്ചെടുത്ത കാറുകളുടെ രേഖകള്‍ കസ്റ്റംസ് പരിശോധിച്ചു വരികയാണ്.