തിരുവനന്തപുരം: തമിഴ്നാട്ടിലെ  കരൂരില്‍ ടിവികെ റാലിക്കിടെ ഉണ്ടായ ദുരന്തത്തില്‍ മുഖ്യമന്ത്രി പിണറായി വിജയന്‍ ദുഃഖം രേഖപ്പെടുത്തി. ദുരന്തത്തില്‍ ആവശ്യമെങ്കില്‍ എല്ലാ സഹായവും നല്‍കാന്‍ കേരളം തയ്യാറാണെന്ന് അറിയിച്ചുകൊണ്ട് മുഖ്യമന്ത്രി പിണറായി വിജയന്‍ തമിഴ്നാട് മുഖ്യമന്ത്രി എം.കെ. സ്റ്റാലിന് കത്തയച്ചു. 

കേരളത്തില്‍ നിന്ന് ആരോഗ്യ പ്രവര്‍ത്തകരെ അയയ്ക്കാന്‍ തയ്യാറാണെന്ന് ആരോഗ്യമന്ത്രി വീണാ ജോര്‍ജ് തമിഴ്നാട് ആരോഗ്യമന്ത്രി മാ. സുബ്രഹ്‌മണ്യനെ ഫോണില്‍ വിളിച്ച് അറിയിച്ചു.

''തമിഴ്‌നാട്ടിലെ കരൂരില്‍ റാലിക്കിടെ ഉണ്ടായ ദുരന്തത്തില്‍ നിരവധി പേര്‍ക്ക് ജീവന്‍ നഷ്ടപ്പെടുകയും പരിക്കേല്‍ക്കുകയും ചെയ്ത സംഭവം അത്യധികം ദുഃഖകരമാണ്. മരണങ്ങളില്‍ അതീവ ദുഃഖം രേഖപ്പെടുത്തുകയും അനുശോചനം അറിയിക്കുകയും ചെയ്യുന്നു. ആവശ്യമെങ്കില്‍ സഹായം വാഗ്ദാനം ചെയ്ത് തമിഴ്‌നാട് മുഖ്യമന്ത്രി എം.കെ സ്റ്റാലിന് കത്തയച്ചു.'' മുഖ്യമന്ത്രി ഫേസ്ബുക്കില്‍ കുറിച്ചു. 

തമിഴഗ വെട്രി കഴകം (ടിവികെ) മേധാവിയും നടനുമായ വിജയ് പങ്കെടുത്ത റാലിയില്‍ തിക്കിലും തിരക്കിലും പെട്ട് 40 പേരാണ് മരിച്ചത്. നാമക്കലില്‍ നേരത്തെ നടന്ന റാലിക്ക് ശേഷം വിജയ് പ്രസംഗിക്കേണ്ടിയിരുന്ന സ്ഥലത്ത് കുറഞ്ഞത് 30,000 പേരെങ്കിലും തടിച്ചു കൂടിയിരുന്നു. എന്നാല്‍ അദ്ദേഹത്തിന്റെ വരവ് ഏഴ് മണിക്കൂറിലധികം വൈകിയിരുന്നു.

മരണസംഖ്യ ഇനിയും ഉയരുമെന്നാണ് റിപ്പോര്‍ട്ടുകള്‍. വിജയ് പ്രസംഗിച്ചുകൊണ്ടിരിക്കെയാണ് തിക്കും തിരക്കുമുണ്ടായത്. അപകടത്തെ തുടര്‍ന്ന് പ്രസംഗം പൂര്‍ത്തിയാക്കാതെ വിജയ് മടങ്ങി. മുഖ്യമന്ത്രി എം.കെ സ്റ്റാലിന്റെ നിര്‍ദേശപ്രകാരം സ്ഥലത്തെത്തിയ ആരോഗ്യമന്ത്രിയുടെ നേതൃത്വത്തില്‍ ഉന്നത ഉദ്യോഗസ്ഥസംഘം സ്ഥലത്ത് ക്യാംപ് ചെയ്യുകയാണ്. സ്റ്റാലിന്‍ അപകടത്തിന് പിന്നാലെ കരൂരിലേക്ക് തിരിച്ചു. തിരുച്ചിയില്‍നിന്ന് 24 ഡോക്ടര്‍മാരും സേലത്തുനിന്ന് 20 ഡോക്ടര്‍മാരും ഇന്നലെ രാത്രി തന്നെ സ്ഥലത്തെത്തി.

രക്ഷാപ്രവര്‍ത്തനത്തിന് ആംബുലന്‍സുകളും ഫയര്‍ഫോഴ്സ് സംവിധാനങ്ങളും കരൂരിലെത്തി. സ്ഥിതി ആശങ്കയുണ്ടാക്കുന്നതാണെന്നും അടിയന്തര ചികിത്സകള്‍ ലഭ്യമാക്കാന്‍ ആശുപത്രികള്‍ക്ക് നിര്‍ദേശം നല്‍കിയതായും സ്റ്റാലിന്‍ അറിയിച്ചു.പരുക്കേറ്റവര്‍ക്ക് ആവശ്യമായ അടിയന്തര ചികിത്സ ലഭ്യമാക്കാനും രക്ഷാപ്രവര്‍ത്തനങ്ങള്‍ ഏകോപിപ്പിക്കാനും മുന്‍ മന്ത്രി വി. സെന്തില്‍ ബാലാജിയെയും മന്ത്രി മാ. സുബ്രഹ്‌മണ്യത്തെയും നിയോഗിച്ചതായി സ്റ്റാലിന്‍ വ്യക്തമാക്കി.

English Summary: Kerala Chief Minister Pinarayi Vijayan expressed deep sorrow over the tragedy and sent a letter to Tamil Nadu Chief Minister M.K. Stalin, offering all necessary assistance from Kerala, including medical aid. Kerala Health Minister Veena George also contacted her Tamil Nadu counterpart and expressed Kerala’s readiness to send medical teams.