പരിയാരം: പരിയാരം മെഡിക്കല്‍ കോളജ് കവാടത്തിന്  സമീപം നാലു പഞ്ചായത്തുകളിലേയും രണ്ട് നഗരസഭകളിലേയും കര്‍ഷകര്‍ ഉല്‍പ്പാദിപ്പിക്കുന്ന പച്ചക്കറികള്‍ വില്‍പ്പന നടത്തുന്നതിന് വില്‍പ്പനകേന്ദ്രം പണിയുന്നതിനെതിരെ സ്ഥാപിത താല്‍പര്യക്കാര്‍ രംഗത്ത്.
സര്‍ക്കാര്‍ ഭൂമി കയ്യേറി കെട്ടിടം പണിയുന്നുവെന്നു ആരോപണമുന്നയിച്ചാണ് ഒരു വിഭാഗം വ്യാപാരികളുടെ ഒത്താശയോടെ വില്‍പ്പനകേന്ദ്രത്തിനെതിരേ ചിലര്‍ രംഗത്തെത്തിയിരിക്കുന്നത്. കടന്നപ്പള്ളി-പാണപ്പുഴ, പരിയാരം, കുറുമാത്തൂര്‍, പട്ടുവം പഞ്ചായത്തുകളിലും ആന്തൂര്‍, തളിപ്പറമ്പ് നഗരസഭകളിലുമുള്ള ജൈവപച്ചക്കറി കര്‍ഷകര്‍ ഉല്‍പ്പാദിപ്പിക്കുന്ന പച്ചക്കറികള്‍ക്ക് മികച്ച വിപണി കണ്ടെത്തുകയാണ് ഈ വിപണന കേന്ദ്രത്തിലൂടെ ലക്ഷ്യമിടുന്നത്. പച്ചക്കറി കര്‍ഷകര്‍ക്ക് തങ്ങളുടെ ഉല്‍പ്പന്നങ്ങള്‍ക്ക് മികച്ച വില നേടിക്കൊടുക്കുന്നതിന് പ്രത്യേക വിപണിസംവിധാനമൊരുക്കാനുള്ള സര്‍ക്കാര്‍ തീരുമാനത്തിന്റെ ഭാഗമായിട്ടായിരുന്നു പുതിയ തീരുമാനം. എന്നാല്‍  ഓണത്തിന് കര്‍ഷകര്‍ക്ക് മെച്ചപ്പെട്ട വിപണനമൊരുക്കുന്നതിനുള്ള ശ്രമത്തെ തടയാനുള്ള നീക്കത്തിനെതിരെ കര്‍ഷകരുടെയും, നാട്ടുകാരുടെയും രോഷം ശക്തമായിരിക്കയാണ്. എന്നാല്‍ പച്ചക്കറി വില്‍പന നടത്തുന്നതിന് ഭൂമി വിട്ടുകൊടുക്കാന്‍ മെഡിക്കല്‍ കോളജ് മാനേജ്‌മെന്റിന് അധികാരമില്ലെന്നാണ് സ്ഥാപിതതാല്‍പര്യക്കാരുടെ വാദം.
താല്‍ക്കാലിക  ഷെഡ് പണിത് പച്ചക്കറി വിപണനം നടത്താന്‍ അനുവദിക്കണമെന്ന പഞ്ചായത്ത് സെക്രട്ടറിയുടെ അപേക്ഷ അംഗീകരിക്കുക മാത്രമാണ് ചെയ്തിട്ടുള്ളതെന്നും കര്‍ഷകര്‍ക്കും ഉപഭോക്താക്കള്‍ക്കും ഗുണപരമായ കാര്യമായതുകൊണ്ടാണ് പരിഗണിച്ചതെന്നും മെഡിക്കല്‍ കോളജ് അധികൃതര്‍ വ്യക്തമാക്കി. ഹൈവേ വികസനം വരുമ്പോള്‍ പൊളിച്ചു മാറ്റപ്പെടുമെന്നതിനാല്‍ താല്‍ക്കാലിക ഷെഡ് മാത്രമേ പണിയുന്നുള്ളൂവെന്നും വിപണന കേന്ദ്രത്തിന്റെ ചുമതലയുള്ള കടന്നപ്പള്ളി-പാണപ്പുഴ കൃഷി ഓഫീസര്‍ റൂബി ജാനറ്റ് ജോയി പറഞ്ഞു.