തിരുവനന്തപുരം:  ഉപഭോക്തൃ തര്‍ക്കപരിഹാര കമ്മിഷനില്‍ പരാതികൾ കുമിഞ്ഞു കൂടിക്കിടക്കുന്നു. 2000 മുതല്‍ കഴിഞ്ഞ മാസം വരെയുള്ള 27,549 പരാതികളാണ് തീർപ്പാകാതെ കെട്ടിക്കിടക്കുന്നത്. കാൽ നൂറ്റാണ്ടു മുമ്പ് 2000ല്‍, രജിസ്റ്റര്‍ ചെയ്ത കേസുപോലും  തീര്‍പ്പാകാതെ കിടക്കുന്നുണ്ട്. പരാതികള്‍  ലഭിച്ചാല്‍ കഴിവതും വേഗം എതിര്‍കക്ഷിക്കു നോട്ടിസ് അയയ്ക്കാനും പരാതി തീര്‍പ്പാക്കാനും കമ്മിഷന് ഉത്തരവാദിത്വമുണ്ട്. 

പരാതിക്കടിസ്ഥാനമായ വസ്തുക്കളുടെ വിശകലനമോ പരിശോധനയോ ആവശ്യമുണ്ടെങ്കില്‍ അഞ്ചു മാസവും അല്ലാത്തവയില്‍ മൂന്നു മാസവുമാണ് സമയപരിധി. എന്നാല്‍ പല കേസുകളും ഈ സമയ പരിധിക്കുള്ളില്‍ തീര്‍പ്പാക്കുന്നില്ലെന്നാണ് കണക്കുകള്‍ സൂചിപ്പിക്കുന്നത്. 

2000 മുതല്‍ 2010 വരെയുള്ള കാലയളവിലുള്ള 103 കേസുകളാണ് തീര്‍പ്പാകാതെ കിടക്കുന്നത്. 2011 മുതല്‍ 2020 വരെയുള്ള  5,687 കേസുകളുമുണ്ട്.  അതിന് ശേഷമുള്ള വർഷങ്ങളിലെ  21755 കേസുകളുമാണ് കെട്ടിക്കിടക്കുന്നത്. സംസ്ഥാന കമ്മിഷനില്‍ 4539 കേസുകളാണ് ശേഷിക്കുന്നത്. ബാക്കിയുള്ളവ ജില്ലകളിലാണ്. 

ഓരോ ജില്ലകളിലും തീർപ്പാക്കാനുള്ള  കേസുകൾ  

തിരുവനന്തപുരം - 2795

കൊല്ലം -1668

ആലപ്പുഴ - 827

പത്തനംതിട്ട - 726

കോട്ടയം - 478

എറണാകുളം - 5010

ഇടുക്കി -556

തൃശൂര്‍ - 4063

പാലക്കാട് - 604

മലപ്പുറം -1289

കോഴിക്കോട്- 2236

വയനാട്-877

കണ്ണൂര്‍-957

കാസർകോട്- 924