ദുബൈ: സ്വകാര്യമേഖല ജീവനക്കാരും തൊഴിലുടമകളും തമ്മിലുള്ള ബന്ധം നിയന്ത്രിക്കുന്ന നിയമങ്ങൾ അടങ്ങിയ ഒരു ബോധവൽക്കരണ ഗൈഡ് പുറത്തിറക്കി മാനവ വിഭവശേഷി, സ്വദേശിവൽക്കരണ മന്ത്രാലയം (MoHRE). ഉൽപ്പാദനക്ഷമതയ്ക്കും തൊഴിലാളികളുടെ അവകാശങ്ങൾക്കും ഇടയിലുള്ള നീതി, സുതാര്യത, സന്തുലിതാവസ്ഥ എന്നിവ ഉറപ്പുവരുത്തുകയാണ് ഇതിന്റെ ലക്ഷ്യമെന്ന് 'അൽബയാൻ' പത്രം റിപ്പോർട്ട് ചെയ്തു.

ജോലി സമയവും ഓവർടൈം ജോലിയും

ഗൈഡ് പ്രകാരം, യു.എ.ഇ.യിൽ പരമാവധി ജോലി സമയം ഒരു ദിവസം എട്ട് മണിക്കൂറും ആഴ്ചയിൽ 48 മണിക്കൂറുമാണ്. ചില പ്രത്യേക മേഖലകളിൽ, നിയമപരമായ പരിധികൾക്ക് വിധേയമായി കൂടുതൽ സമയം ജോലി ചെയ്യാം.

ഓവർടൈം: ഓവർടൈം ജോലി ഒരു ദിവസം രണ്ട് മണിക്കൂറിൽ കൂടരുത്. മൂന്നാഴ്ചത്തെ കാലയളവിൽ ആകെ ജോലി സമയം 144 മണിക്കൂർ കവിയാൻ പാടില്ല എന്നും മന്ത്രാലയം ഊന്നിപ്പറയുന്നു.

ALSO READ: ഹൈദരാബാദ് എയർപോർട്ടിൽ വൻ സ്വർണവേട്ട; കുവൈത്തിൽ നിന്നെത്തിയ യാത്രക്കാരനിൽ നിന്ന് പിടിച്ചെടുത്തത് 1.8 കിലോഗ്രാം സ്വർണം

ഓവർടൈം വേതനം: ഓവർടൈം ജോലിക്ക് ജീവനക്കാർക്ക് അധിക വേതനത്തിന് അർഹതയുണ്ട്:

പകൽ സമയത്തെ അധിക ജോലിക്ക്, അടിസ്ഥാന മണിക്കൂർ വേതനത്തിന്റെ കുറഞ്ഞത് 25 ശതമാനം അധികമായി ലഭിക്കണം.

രാത്രി 10 മണിക്കും പുലർച്ചെ 4 മണിക്കും ഇടയിലുള്ള അധിക ജോലിക്ക്, 50 ശതമാനം അധികമായി കണക്കാക്കണം.

ഒഴിവാക്കലുകൾ: ഈ ഓവർടൈം ജോലി നിയമം ഷിഫ്റ്റ് അടിസ്ഥാനത്തിൽ ജോലി ചെയ്യുന്ന ജീവനക്കാർക്ക് ബാധകമല്ല.

ആഴ്ചയിലെ അവധി ദിവസം ജോലി ചെയ്താൽ: ആഴ്ച തോറുമുള്ള അവധി ദിവസം ജോലി ചെയ്യേണ്ടി വരുന്ന തൊഴിലാളികൾക്ക് പകരമായി ഒരു വിശ്രമ ദിനമോ അല്ലെങ്കിൽ ആ ദിവസത്തെ അടിസ്ഥാന വേതനത്തിന്റെ 50 ശതമാനം വർധനവോ ലഭിക്കണം.

വേതനവും പേയ്‌മെന്റ് സംവിധാനവും 

എല്ലാ ശമ്പളങ്ങളും നിശ്ചിത തീയതി കഴിഞ്ഞ് 15 ദിവസത്തിനകം നൽകിയിരിക്കണമെന്ന് ഗൈഡ് വ്യക്തമാക്കുന്നു.

വേതന സംരക്ഷണ സംവിധാനം (WPS): വേതന സംരക്ഷണ സംവിധാനം (WPS) വഴിയായിരിക്കണം തൊഴിലുടമ ജീവനക്കാരന് വേതനം നൽകേണ്ടത്.

ചെലവുകൾ: WPS-മായി ബന്ധപ്പെട്ട എല്ലാ ഫീസുകളും തൊഴിലുടമയുടെ മാത്രം ഉത്തരവാദിത്തമാണ്. വേതനം കൈമാറ്റം ചെയ്യുന്നതിനോ രജിസ്ട്രേഷനുമായോ ബന്ധപ്പെട്ട നേരിട്ടുള്ളതോ അല്ലാത്തതോ ആയ ചെലവുകൾ തൊഴിലാളികൾ വഹിക്കരുത് എന്നും മന്ത്രാലയം വ്യക്തമാക്കി.

സാമ്പത്തിക ബുദ്ധിമുട്ടുകൾ നേരിടുന്ന സ്ഥാപനങ്ങൾ നിയമപരമായ മാർഗ്ഗനിർദ്ദേശത്തിനും പിന്തുണക്കുമായി MoHRE-യെ സമീപിക്കണമെന്ന് മന്ത്രാലയം അഭ്യർത്ഥിച്ചു. ഇത് നിയമങ്ങൾ പാലിക്കാനും ജീവനക്കാരുടെ അവകാശങ്ങൾ സംരക്ഷിക്കാനും സഹായിക്കും.

ALSO READ: വഖഫ് ദാതാക്കൾക്ക് യുഎഇ ഗോൾഡൻ വിസ; കരാർ ഒപ്പുവച്ച് ജിഡിആർഎഫ്എ ദുബൈയും, ഔഖാഫ് ദുബൈയും

അവധി ദിനങ്ങളും പ്രത്യേക അവധികളും 

ഫെഡറൽ തൊഴിൽ നിയമപ്രകാരം സ്വകാര്യമേഖലാ ജീവനക്കാർക്ക് ലഭിക്കുന്ന വിവിധതരം അവധികളെക്കുറിച്ചും ഗൈഡ് വിശദമാക്കുന്നു:

വാർഷിക അവധി: ഒരു വർഷത്തെ സേവനത്തിന് കുറഞ്ഞത് 30 ദിവസത്തെ ശമ്പളത്തോടുകൂടിയ വാർഷിക അവധിക്ക് ജീവനക്കാർക്ക് അർഹതയുണ്ട്.

പ്രത്യേക അവധികൾ (Special Leave):

വിയോ​ഗ അവധി (Bereavement Leave): പങ്കാളിയുടെ മരണത്തിന് അഞ്ച് ദിവസവും അടുത്ത ബന്ധുവിന്റെ (ഫസ്റ്റ് ഡിഗ്രി റിലേറ്റീവ്) മരണത്തിന് മൂന്ന് ദിവസവും അവധി ലഭിക്കും.

രക്ഷാകർതൃ അവധി (Parental Leave): കുഞ്ഞ് ജനിക്കുമ്പോൾ, ജനനശേഷം ആറ് മാസത്തിനുള്ളിൽ ഏതൊരു രക്ഷാകർത്താവിനും (അച്ഛനും അമ്മക്കും) അഞ്ച് ദിവസത്തെ അവധിക്ക് അർഹതയുണ്ട്.

യുഎഇ പൗരന്മാർക്കുള്ള പ്രത്യേക അവധികൾ

പരീക്ഷാ അവധി (Study Leave): രണ്ട് വർഷമെങ്കിലും സർവീസ് പൂർത്തിയാക്കിയ എമിറാത്തി ജീവനക്കാർക്ക് പരീക്ഷ എഴുതുന്നതിനായി പഠനാവധിക്ക് അർഹതയുണ്ട്.

ദേശീയ സേവനത്തിനുള്ള അവധി: നിർബന്ധിത ദേശീയ സേവനം നടത്തുന്ന പൗരന്മാർക്ക് യുഎഇ നിയമങ്ങൾക്കനുസൃതമായി അവധി അനുവദിക്കും.

The Ministry of Human Resources and Emiratisation (MOHRE) has launched an awareness guide, "Know Your Rights," to regulate relations between private sector employees and employers. The guide aims to ensure justice, transparency, and balance between productivity and workers' rights, promoting a fair work environment in the UAE