കോട്ടയം: എസ്.എന്‍.ഡി.പി യോഗത്തിന്റെ ഭൂമിയിടപാടില്‍ സാമ്പത്തിക ക്രമക്കേട് നടത്തിയ സംഭവത്തില്‍ വെള്ളാപ്പള്ളി നടേശനും കെ.എം മാണിക്കുമെതിരേ ഗുരുതര ആരോപണം. മീനച്ചില്‍ എസ്.എന്‍.ഡി.പി യൂനിയന്‍ സംരക്ഷണസമിതി ഭാരവാഹികളാണ് ഇക്കാര്യം പത്രസമ്മേളനത്തില്‍ വ്യക്തമാക്കിയത്. പൂഞ്ഞാറില്‍ കോളജ് നിര്‍മിക്കാന്‍ വാങ്ങിയ ഭൂമിഇടപാടില്‍ വന്‍ സാമ്പത്തിക തട്ടിപ്പ് നടന്നെന്ന് യോഗം ജനറല്‍ സെക്രട്ടറി വെള്ളാപ്പള്ളി നടേശനെ അറിയിച്ചെങ്കിലും കേസിലെ ഒന്നാം പ്രതി കെ.എം സന്തോഷ് കുമാറിന് അനുകൂലമായ നിലപാടായിരുന്നു എടുത്തതെന്ന് എസ്.എന്‍.ഡി.പി യോഗം മുന്‍ ബോര്‍ഡ് മെമ്പര്‍ കെ.ഐ ഗോപാലന്‍ പറഞ്ഞു. കൂടാതെ, സാമ്പത്തിക ക്രമക്കേട് നടത്തിയ സംഭവത്തില്‍ സന്തോഷ് കുമാറിനെതിരേ ആദ്യം നടന്ന കേസ് അന്വേഷണം അട്ടിമറിച്ചത് കെ.എം മാണി ഇടപെട്ടാണെന്നും സംരക്ഷണസമിതി ആരോപിച്ചു. മാണിക്കുവേണ്ടി വെള്ളാപ്പള്ളി നടേശനും സന്തോഷ്‌കുമാറും പാലായില്‍ തെരഞ്ഞെടുപ്പ് സമയത്ത് നടത്തിയ പ്രവര്‍ത്തനത്തിന്റെ കൂറുകാണിക്കുകയായിരുന്നു മാണി. അതിനുവേണ്ടി വെള്ളാപ്പള്ളിയുടെ അനുയായികളെ സഹായിക്കുന്ന രീതിയാണ് കെ.എം മാണി സ്വീകരിക്കുന്നതെന്നും അവര്‍ ആരോപിച്ചു.
കേസ് അട്ടിമറിച്ചതിനെ തുടര്‍ന്ന് കെ.ഐ ഗോപാലന്‍ ജില്ലാ പൊലിസ് സൂപ്രണ്ടിന് നല്‍കിയ പരാതിയുടെ അടിസ്ഥാനത്തിലാണ് വീണ്ടും പുനരന്വേഷണം നടന്നത്. ഇതോടെയാണ് എസ്.എന്‍.ഡി.പി മീനച്ചില്‍ താലൂക്ക് യൂനിയന്റെ മറവില്‍ നടന്ന ഒരു കോടി 27 ലക്ഷം രൂപയുടെ വെട്ടിപ്പ് കണ്ടെത്തിയത്. സന്തോഷ് കുമാറിന്റെ ഭരണകാലത്ത് മൂന്നുകോടി രൂപയ്ക്ക് കോളജിനു വേണ്ടി ഭൂമി വാങ്ങിയെന്നായിരുന്നു പറഞ്ഞിരുന്നത്.
കണയന്നൂര്‍ തലക്കോട് ഒതളം കുഴിയില്‍ ഭാസ്‌കരന്‍, മകന്‍ സാബു, ഭാര്യ ഷിയോ എന്നിവരുമായി കച്ചവടം ഉറപ്പിച്ചുവെന്ന് അറിയിച്ചാണ് സന്തോഷ് കുമാര്‍ തട്ടിപ്പ് ആരംഭിക്കുന്നത്. എന്നാല്‍, ഈ വസ്തുക്കള്‍ പണമിടപാട് സംബന്ധിച്ച ഉറപ്പിന് പെരുനിലം പ്‌ളാത്തോട്ടത്തില്‍ ടോമിക്ക് ആധാരം ചെയ്തുവെന്നും സ്ഥലം വാങ്ങുന്നത് സംബന്ധിച്ച് ധാരണ ടോമിയുമായാണ് നടത്തിയതെന്നും പിന്നീട് സമുദായാംഗങ്ങളെ അറിയിക്കുകയായിരുന്നു. പക്ഷേ, പൊലിസ് നടത്തിയ അന്വേഷണത്തില്‍ ഒരുകോടി 37 ലക്ഷത്തിന് ടോമിയും സ്ഥലമുടമകളും തമ്മില്‍ നേരത്തേ കരാറുണ്ടായിരുന്നു. പിന്നീട് ടോമിയാണ് എസ്.എന്‍.ഡി.പി യൂനിയനുമായി മൂന്നു കോടിക്ക് ധാരണയുണ്ടാക്കിയത്. ഇത്തരത്തില്‍ സമുദായാംഗങ്ങളെ കബിളിപ്പിച്ചുകൊണ്ട് നടത്തിയ തട്ടിപ്പിന് യോഗം ജനറല്‍ സെക്രട്ടറി തന്നെ കുട ചൂടുന്നതായി സംരക്ഷണ സമിതി ഭാരവാഹികളായ ഇ.എം മധു, കെ.ഐ ഗോപാലന്‍, ഗോപി മണക്കാട്,ഷാജി പ്ലാച്ചേരി, സനല്‍ തെക്കുംമുറി എന്നിവര്‍ ആരോപിച്ചു.