കൊച്ചി: പ്രസവിച്ച് ഏതാനും മണിക്കൂറുകൾ മാത്രം പ്രായമായ ആൺകുഞ്ഞിനെ കൊച്ചി നഗരമധ്യത്തിലെ അമ്മത്തൊട്ടിലിന് സമീപം ഉപേക്ഷിച്ച നിലയിൽ കണ്ടെത്തി. തിങ്കളാഴ്ച പുലർച്ചെ ആറുമണിയോടെ സമീപത്തെ ജനറൽ ആശുപത്രിയിലെ കാവൽക്കാരനായ കെ. വിഷ്ണുവാണ് കുഞ്ഞിനെ കണ്ടത്. അമ്മത്തൊട്ടിലിനടുത്തുള്ള പ്ലാവിന്റെ ചുവട്ടിൽ ഒരു ബെഡ്ഷീറ്റിൽ പൊതിഞ്ഞ നിലയിലായിരുന്നു കുഞ്ഞ്.

ഇവിടെ പ്രവർത്തിച്ചിരുന്ന ഹൈടെക് അമ്മത്തൊട്ടിൽ കഴിഞ്ഞ രണ്ടുവർഷമായി അടഞ്ഞുകിടക്കുകയാണ്. ഇത് കാരണമാകാം കുഞ്ഞിനെ സമീപത്ത് ഉപേക്ഷിച്ചതെന്നാണ് കരുതുന്നത്. തെരുവുനായ്ക്കൾ കൂട്ടംകൂടുന്ന ഈ മേഖലയിൽ കുഞ്ഞ് ഭാഗ്യം കൊണ്ടാണ് അപകടമില്ലാതെ രക്ഷപ്പെട്ടത്.

ഉടൻ തന്നെ കുഞ്ഞിനെ ജനറൽ ആശുപത്രിയിൽ പ്രവേശിപ്പിച്ചു. 2.6 കിലോഗ്രാം ഭാരമുള്ള കുഞ്ഞ് ആരോഗ്യവാനാണെന്ന് ആശുപത്രി അധികൃതർ അറിയിച്ചു. വീട്ടിലാണ് പ്രസവം നടന്നതെന്നാണ് പ്രാഥമിക നിഗമനം. ജനറൽ ആശുപത്രിയിലെ മുലപ്പാൽ ബാങ്കിൽ നിന്നും കുഞ്ഞിന് പാൽ നൽകുന്നുണ്ട്. ഗർഭാവസ്ഥയിൽ കുട്ടിക്ക് ആവശ്യമായ ചികിത്സ ലഭിച്ചിട്ടില്ലെന്നും സൂചനയുണ്ട്. നിലവിൽ കുഞ്ഞ് ആശുപത്രിയിലെ എൻഐസിയുവിൽ (NICU) ചികിത്സയിലാണ്. കുഞ്ഞ് പൂർണ്ണ ആരോഗ്യവാനാണെന്ന് ഉറപ്പിച്ച ശേഷം ചൈൽഡ് വെൽഫെയർ കമ്മിറ്റിക്ക് (CWC) കൈമാറും.

സംസ്ഥാന ശിശുക്ഷേമ സമിതിയുടെ ഹൈടെക് അമ്മത്തൊട്ടിലുകൾ പലയിടങ്ങളിലും പ്രവർത്തനരഹിതമാണ്. അമ്മത്തൊട്ടിലിലെ സാങ്കേതിക തകരാറുകൾ പരിഹരിക്കുന്നതിനുള്ള നടപടികൾ തുടങ്ങിയിട്ടുണ്ടെന്ന് സിഡബ്ല്യുസി അധികൃതർ അറിയിച്ചു.