കോഴിക്കോട്: നഗരത്തിന്റെ മുഖച്ഛായ മാറ്റും വിധത്തില്‍ അത്യാധുനിക രീതിയില്‍ നിര്‍മിച്ച സംസ്ഥാനത്തെ ഏറ്റവും വലിയ പച്ചക്കറി മാര്‍ക്കറ്റുകളിലൊന്നായ കല്ലുത്താന്‍കടവിലെ ന്യൂ പാളയം മാര്‍ക്കറ്റ് ഉദ്ഘാടനത്തിനിടെ വന്‍ പ്രതിഷേധം. ഉദ്ഘാടനം ചെയ്യാനായി മുഖ്യമന്ത്രി പിണറായി വിജയന്‍ എത്തുന്നതിന് തൊട്ടുമുന്‍പാണ് പ്രതിഷേധം ഉണ്ടായിരിക്കുന്നത്. ന്യൂ പാളയം മാര്‍ക്കറ്റിനെ എതിര്‍ക്കുന്നവരും അനുകൂലിക്കുന്നവരും തമ്മിലാണ് സംഘര്‍ഷമുണ്ടായത്. 

ഇതിനിടെ പൊലിസും  പ്രതിഷേധക്കാരും തമ്മിലും ഉന്തും തള്ളുമുണ്ടായി. പാളയം മാര്‍ക്കറ്റ് കല്ലുത്താന്‍ കടവിലേക്ക് മാറ്റുന്നതിനെ അനുകൂലിക്കുന്നവര്‍ പ്രകടനമായി എത്തി. ഇവരെ പ്രതിഷേധക്കാര്‍ കൂകി വിളിച്ചതാണ് സംഘര്‍ഷത്തിലേക്ക് നയിച്ചത്. 

ALSO READ: 'പതിനായിരം കോടി തന്നാലും നാഗ്പൂർ പദ്ധതി ഇവിടെ നടക്കില്ല'; പിഎം ശ്രീ പദ്ധതിയിൽ ചേരില്ലെന്ന് ആവർത്തിച്ച് തമിഴ്നാട്

പച്ചക്കറി മാര്‍ക്കറ്റിലെ മള്‍ട്ടിലെവല്‍ മാര്‍ക്കറ്റ് ഉദ്ഘാടനം മന്ത്രി എം.ബി രാജേഷും ഹോള്‍സെയില്‍ ആന്‍ഡ് ഓപണ്‍ മാര്‍ക്കറ്റ് ഉദ്ഘാടനം മന്ത്രി പി.എ മുഹമ്മദ് റിയാസുമാണ് നിര്‍വഹിക്കുന്നത്. മേയര്‍ ബീനാ ഫിലിപ്പ് അധ്യക്ഷയാകും. കോര്‍പറേഷന്‍ പൊതുസ്വകാര്യ പങ്കാളിത്ത മാതൃകയില്‍ നടപ്പാക്കിയ ആദ്യത്തെ ബൃഹദ് പദ്ധതിയാണ് ഇതോടെ യാഥാര്‍ഥ്യമാകുന്നതെന്ന് മേയര്‍ അറിയിച്ചു. 100 കോടിയോളം രൂപ ചെലവഴിച്ചാണ് പദ്ധതി പൂര്‍ണമായും പ്രാവര്‍ത്തികമാക്കിയിരിക്കുന്നത്. കല്ലുത്താന്‍കടവ് ഏരിയ ഡെവലപ്മെന്റ് കമ്പനിയാണ് പ്രവൃത്തി ഏറ്റെടുത്ത് നടപ്പാക്കിയത്. 2009ലാണ് പദ്ധതിയുടെ കരാര്‍ ഒപ്പുവച്ചത്. കല്ലുത്താന്‍കടവിലെ ചേരി നിവാസികളെ പുനരധിവസിപ്പിച്ചതിന്റെ പിന്നാലെയാണ് മാര്‍ക്കറ്റ് സമുച്ചയത്തിന്റെ പ്രവൃത്തി ആരംഭിച്ചത്. പദ്ധതി നടപ്പാക്കുന്നതിനായി 27 കോടിയോളം രൂപ ചെലവഴിച്ച് കോര്‍പറേഷന്‍ സ്ഥലം ഏറ്റെടുത്തിരുന്നു. പാളയം മാര്‍ക്കറ്റിനെ അപേക്ഷിച്ച് ഏറെ സൗകര്യങ്ങളോട് കൂടിയുള്ളതാണ് കല്ലുത്താന്‍ കടവിലെ ന്യൂ പാളയം മാര്‍ക്കറ്റ്. 

അഞ്ചര ഏക്കര്‍ സ്ഥലത്ത് സ്ഥിതിചെയ്യുന്ന കെട്ടിട സമുച്ചയത്തില്‍ ആറ് ബ്ലോക്കുകളായിട്ടാണ് മാര്‍ക്കറ്റ് നിര്‍മിച്ചത്. പ്രധാന ബ്ലോക്കിന്റെ മുകള്‍ഭാഗത്തുള്‍പ്പെടെ സജ്ജീകരിച്ചിരിക്കുന്ന പാര്‍ക്കിങ്ങില്‍ ഒരേ സമയം 500 ഓളം വാഹനങ്ങള്‍ക്ക് സുഗമമായി പാര്‍ക്ക് ചെയ്യാം. 

ALSO READ: പതുങ്ങി....കുതിച്ചു സര്‍വ്വകാല റെക്കോര്‍ഡിലേക്ക്; സ്വര്‍ണവിലയില്‍ ഇന്ന് വര്‍ധന, പവന്‍ വില 98,000ത്തിലേക്ക് 

മൂന്നരലക്ഷം സ്‌ക്വയര്‍ ഫീറ്റില്‍ നിര്‍മിച്ചിരിക്കുന്ന സമുച്ചയത്തില്‍ 300 ഓളം ഫ്രൂട്സ് ആന്‍ഡ് വെജിറ്റബിള്‍ ഷോപ്പുകളാണ് ഉള്‍ക്കൊള്ളുന്നത്. ഇതിനുപുറമെ അനുബന്ധ കച്ചവടക്കാര്‍ക്കും സൗകര്യം ഒരുക്കിയിട്ടുണ്ട്. പാളയം മാര്‍ക്കറ്റ് അവിടെനിന്ന് മാറ്റുന്നതിന്റെ ഭാഗമായി തൊഴില്‍ രഹിതരാവാനിടയുള്ള പാളയത്തെ ഉന്തുവണ്ടി പെട്ടിക്കട കച്ചവടക്കാരെ കൂടി മാര്‍ക്കറ്റിന്റെ ഭാഗമാക്കുന്നുണ്ട്. ഇതോടൊപ്പം സാധനങ്ങള്‍ വാങ്ങാനെത്തുന്നവര്‍ക്ക് വിനോദത്തിനുള്ള സൗകര്യങ്ങള്‍ കൂടി സജ്ജീകരിക്കുമെന്ന് മേയര്‍ പറഞ്ഞു. 

നഗരഹൃദയമായ പാളയത്തെ ജനത്തിരക്കും ഗതാഗത  തടസങ്ങളും കുറയ്ക്കുകയെന്ന ലക്ഷ്യത്തോടെയാണ് പാളയം മാര്‍ക്കറ്റ് കല്ലുത്താന്‍ കടവിലേക്ക് മാറ്റുന്നതിനുള്ള പദ്ധതി ആവിഷ്‌കരിച്ചത്. 

English summary: In Kalluthankadavu, Kozhikode, the new “New Palayam Market” is being inaugurated. The complex is built on about 5.5 acres, accommodates approximately 310 shops for fruits and vegetables, along with parking for 500 vehicles and other modern facilities.