നീലേശ്വരം: ഹയര്‍സെക്കന്‍ഡറി സ്‌കൂളുകളില്‍ ദിവസവേതനക്കാരായി ജോലി ചെയ്യുന്ന അധ്യാപകര്‍ക്ക് ഇത്തവണയും കണ്ണീരോണം. ഓഗസ്റ്റ് മാസത്തെ വേതനം ലഭിക്കാത്തതാണു കാരണം. ഈ മാസം മുതല്‍ താല്‍ക്കാലിക ജീവനക്കാരുടെ വേതനം സ്പാര്‍ക്ക് മുഖേന നല്‍കാന്‍ തീരുമാനിച്ചതാണ് പ്രതിസന്ധിക്കിടയാക്കിയത്. സോഫ്റ്റ്‌വെയറിലെ സാങ്കേതിക പ്രശ്‌നം മൂലം താല്‍ക്കാലിക അധ്യാപകരുടെ വിവരങ്ങള്‍ ചേര്‍ക്കാന്‍ കഴിഞ്ഞില്ല. ഇതു ചേര്‍ത്താല്‍ മാത്രമേ ഇവര്‍ക്കു വേതനം നല്‍കാന്‍ കഴിയൂ. പ്രശ്‌നം ശ്രദ്ധയില്‍ പെടുത്തിയിട്ടും പരിഹാരമായിട്ടില്ല. ഇന്റഗ്രേറ്റഡ് ഫിനാന്‍ഷ്യല്‍ മാനേജ്‌മെന്റ് സിസ്റ്റം നടപ്പാക്കുന്നതിന്റെ ഭാഗമായി കരാര്‍ ജീവനക്കാരുടേയും ദിവസ വേതനാടിസ്ഥാനത്തില്‍ ജോലി ചെയ്യുന്ന താല്‍കാലിക ജീവനക്കാരുടെയും വേതനം ഓഗസ്റ്റ് മുതല്‍ സ്പാര്‍ക്കില്‍ തയ്യാറാക്കാന്‍ ധന വകുപ്പ് ഉത്തരവിറക്കിയിരുന്നു.
ഹൈസ്‌കൂള്‍ പ്രധാനാധ്യാപകര്‍ക്ക് പ്രിന്‍സിപ്പലിന്റെ ചുമതലയുള്ള സ്‌കൂളുകളിലേയും രണ്ടു സ്‌കൂളുകളിലായി ജോലി ചെയ്യുന്ന ജൂനിയര്‍ അധ്യാപകരുടെയും വിവരങ്ങളും ചേര്‍ക്കാനുള്ള സംവിധാനവും സ്പാര്‍ക്കിലില്ല. ഇതോടെ ആയിരത്തോളം താല്‍ക്കാലിക ജീവനക്കാരുടെ വേതനമാണ് മുടങ്ങിയിരിക്കുന്നത്.