ബെംഗളൂർ: കർണാടകയിലെ റായ്ച്ചൂരിൽ ഒമ്പതാം ക്ലാസ് വിദ്യാർത്ഥിനിയെ ലൈംഗികപീഡനത്തിന് ഇരയാക്കി ഗർഭിണിയാക്കിയ യുവാവിനെ പൊലിസ് അറസ്റ്റ് ചെയ്തു. റായ്ച്ചൂർ സ്വദേശി പ്രിയാകർ ശിവമൂർത്തി  ആണ് പിടിയിലായത്. പോക്സോ നിയമപ്രകാരം കേസ് രജിസ്റ്റർ ചെയ്ത പ്രതിയെ കോടതിയിൽ ഹാജരാക്കി. പെൺകുട്ടിയുടെ പിതാവിന്റെ ചിക്കൻ കടയിൽ ചിക്കൻ വാങ്ങാൻ വന്നാണ് പെൺകുട്ടിയുമായി ഈ ബന്ധം ആരംഭിച്ചത്, യുപിഐ ആപ്പിലൂടെയുള്ള മെസേജിങ്ങിലൂടെയാണ് സന്ദേശങ്ങൾ അയച്ചിരുന്നത്,ഈ ബന്ധം പീന്നിട് നിരന്തര പീഡനത്തിലേക്ക് വഴിമാറി. ഗർഭിണിയായ പെൺകുട്ടിയെ ഗർഭഛിദ്രത്തിന് പ്രേരിപ്പിച്ച ശേഷം ഗുളികകൾ നൽകി, അവശയായി ആശുപത്രിയിലെത്തിച്ച സംഭവത്തിൽ പൊലിസ് അന്വേഷണം നടത്തി വരുകയാണ്.

പെൺകുട്ടിയുടെ പിതാവ് നടത്തുന്ന ചിക്കൻ കടയിലേക്ക് പ്രിയാകർ ശിവമൂർത്തി ചിക്കൻ വാങ്ങാൻ വരുമായിരുന്നു. യുപിഐ വഴി പണമിടപാട് നടത്തിയ ശേഷം, അതേ ആപ്പിലൂടെ പെൺകുട്ടിയുടെ മൊബൈൽ നമ്പറിലേക്ക് സന്ദേശങ്ങൾ അയച്ച് അടുപ്പം സ്ഥാപിക്കുകയായിരുന്നു. 'സൗഹൃദ'ത്തിന്റെ പേരിൽ തുടങ്ങിയ സംഭാഷണങ്ങൾ പെട്ടെന്ന് അപകടകരമായ വഴിയിലേക്ക് മാറി. നിരന്തരമായി മെസേജുകൾ അയച്ച് വിശ്വാസം നേടിയ ശേഷം, പീഡനത്തിന് ഇരയാക്കുകയായിരുന്നു.പൊലിസ് അന്വേഷണത്തിൽ, ഈ പീഡനങ്ങൾ പല തവണ നടന്നതായും, അതിനെത്തുടർന്ന് പെൺകുട്ടി ഗർഭിണിയായതായും കണ്ടെത്തി.

കഴിഞ്ഞ ദിവസം പെൺകുട്ടി വീട്ടിന് പുറത്തിറങ്ങിയ ശേഷം കാണാതാവുകയായിരുന്നു. ഇതെ തുടർന്ന് അമ്മ നൽകിയ പരാതിയിൽ റായ്ച്ചൂർ പൊലിസ് അന്വേഷണം ആരംഭിച്ചു. മൊബൈൽ റെക്കോർഡുകൾ, യുപിഐ ട്രാൻസാക്ഷനുകൾ, സന്ദേശങ്ങളുടെ ഹിസ്റ്ററി എന്നിവ പരിശോധിച്ചപ്പോഴാണ് പ്രിയാകറിന്റെ പങ്ക് വെളിപ്പെട്ടത്. പ്രതിയെ പിടികൂടിയ സംഘത്തെ നയിച്ച ഇൻസ്പെക്ടർ, "ഡിജിറ്റൽ ട്രെയിലുകൾ പ്രതിയെ പെട്ടെന്ന് കണ്ടെത്താൻ സഹായിച്ചു" എന്ന് പറഞ്ഞു.

ഗർഭഛിദ്ര ഗൂഢാലോചന: അവശയായ പെൺകുട്ടി ആശുപത്രിയിൽ

പീഡനത്തെ തുടർന്ന് പെൺകുട്ടി ഗർഭിണിയായത് അറിഞ്ഞ പ്രിയാകർ, പെൺകുട്ടിയെ ഗർഭഛിദ്രത്തിന് പ്രേരിപ്പിച്ചു. അനിയന്ത്രിതമായി ഗുളികകൾ നൽകിയതോടെ പെൺകുട്ടി അവശയായി. ഉടൻ ആശുപത്രിയിലെത്തിച്ച സാഹചര്യത്തിലാണ് പൊലിസിന് സംശയം ഉണ്ടായത്. നിലവിൽ പെൺകുട്ടി റായ്ച്ചൂർ ജില്ലാ ആശുപത്രിയിൽ ചികിത്സയിലാണ്. മാനസിക-ശാരീരിക പരിചരണം ലഭിക്കുന്നുണ്ടെന്ന് പൊലിസ് അറിയിച്ചു. കുട്ടിയുടെ കുടുംബത്തിന് സൗകര്യങ്ങൾ ഏർപ്പെടുത്താൻ ജില്ലാ സാമൂഹ്യകാര്യ വകുപ്പ് ഇടപെട്ടു.

പൊലിസ് നടപടി: പോക്സോയ്ക്ക് കീഴിൽ കർശനമായ അന്വേഷണം

പോക്സോ നിയമപ്രകാരം ലൈംഗിക പീഡനം, ഗർഭധാരണം , ഗർഭഛിദ്ര ഗൂഢാലോചന തുടങ്ങിയ വകുപ്പുകൾ ചുമത്തിയാണ് കേസ് രജിസ്റ്റർ ചെയ്തത്. പ്രതിയെ കോടതിയിൽ ഹാജരാക്കി റിമാൻഡ് ചെയ്തു. അന്വേഷണത്തിൽ, പ്രതിയുടെ മൊബൈൽ, യുപിഐ അക്കൗണ്ട് എന്നിവ പരിശോധിച്ച് കൂടുതൽ തെളിവുകൾ ശേഖരിക്കുന്നു. "ഡിജിറ്റൽ ക്രൈം വർധിക്കുന്ന സാഹചര്യത്തിൽ, മാതാപിതാക്കൾ കുട്ടികളുടെ ഓൺലൈൻ പ്രവർത്തനങ്ങൾ നിരീക്ഷിക്കണം" എന്ന് റായ്ച്ചൂർ ജില്ലാ പൊലിസ് മേധാവി ഉപദേശിച്ചു.