തിരുവനന്തപുരം: മെഡിക്കല്‍ കോളജ് ആശുപത്രിയില്‍ ഹൃദ്രോഗത്തിന് ചികിത്സ തേടിയ കൊല്ലം സ്വദേശി വേണു മരിച്ച സംഭവത്തില്‍ വിമര്‍ശനവുമായി മെഡിക്കല്‍ കോളജ് യൂറോളജി വിഭാഗം മേധാവി ഡോ.ഹാരിസ് ചിറയ്ക്കല്‍.

നാടുമുഴുവന്‍ മെഡിക്കല്‍ കോളജുകള്‍തുടങ്ങിയിട്ട് കാര്യമില്ല. നിലവിലുള്ള മെഡിക്കല്‍ കോളജുകള്‍ ശക്തിപ്പെടുത്തണം. തറയില്‍ എങ്ങനെയാണ് രോഗിയെ കിടത്തുന്നതെന്നും ഡോക്ടര്‍ ചോദിച്ചു. പ്രാകൃതമായ ചികിത്സാ നിലവാരമാണെന്നും അദ്ദേഹം പറഞ്ഞു. തിരുവനന്തപുരത്ത് മെഡിക്കല്‍ സര്‍വീസ് സെന്റര്‍ സെമിനാറില്‍ സംസാരിക്കുകയായിരുന്നു അദ്ദേഹം.

ALSO READ: രണ്ടുതവണ യാത്രക്കാരെ കയറ്റിയിട്ടും പുറപ്പെടാനായില്ല: തിരുവനന്തപുരം - ബെംഗളൂരു എയർ ഇന്ത്യ എക്സ്പ്രസ് വിമാനം വൈകുന്നു

കോന്നി മെഡിക്കല്‍ കോളേജില്‍തന്നെ അഞ്ഞൂറുകോടിയോളം രൂപ ചെലവായെന്നാണ് തനിക്ക് കിട്ടിയ കണക്ക്. എന്നിട്ടും അവിടെ അടിസ്ഥാന സൗകര്യങ്ങള്‍ കുറവാണ്. പലയിടത്തും സൂപ്പര്‍ സ്‌പെഷ്യാലിറ്റി ചികിത്സയുടെ അഭാവമുണ്ട്. തിരുവനന്തപുരം മെഡിക്കല്‍ കോളജിലെ ചില വാര്‍ഡുകളുടെ അവസ്ഥ പരിതാപകരമാണ് എന്നും ഡോ. ഹാരിസ് പറയുന്നു.

മുന്‍പ് ചില കാര്യങ്ങള്‍ ചൂണ്ടിക്കാണിച്ചപ്പോള്‍ തനിക്ക് ചില വിഷമതകള്‍ നേരിടേണ്ടിവന്നുവെന്നും അന്ന് സമൂഹം ഒപ്പം നിന്നു, തെറ്റല്ല ചെയ്തത്, ന്യൂനത ചൂണ്ടിക്കാണിക്കുകയായിരുന്നെന്നും ഡോ. ഹാരിസ് പറഞ്ഞു. 

English Summary: Dr. Harris Chirakkal, Head of the Urology Department at Thiruvananthapuram Medical College, has come out strongly criticizing the poor treatment conditions at government hospitals after the death of Venu, a Kollam native who sought cardiac treatment at the Medical College Hospital.