ബീജിംഗ്: വിവാഹം നിശ്ചയിക്കുന്നതിന് മുന്നോടിയായി കാമുകിയുടെ മാതാപിതാക്കളെ ആകർഷിക്കാൻ വേണ്ടി ഗ്യാസ്ട്രിക് ബൈപാസ് ശസ്ത്രക്രിയയ്ക്ക് വിധേയനായ ചൈനീസ് യുവാവ് ദിവസങ്ങൾക്കകം മരിച്ചു. ഹെനാൻ പ്രവിശ്യയിലെ സിൻക്സിയാങ് സ്വദേശിയായ 36-കാരനായ ലി ജിയാങ്ങ് ആണ് ശ്വസന സ്തംഭനം മൂലം മരണപ്പെട്ടത്. ഏകദേശം 134 കിലോഗ്രാം ഭാരമുണ്ടായിരുന്ന ലി, അമിതവണ്ണം കുറയ്ക്കുന്നതിലൂടെ വിവാഹ ചർച്ചകൾ സുഗമമാക്കാൻ കഴിയുമെന്ന പ്രതീക്ഷയിലാണ് ശസ്ത്രക്രിയ തിരഞ്ഞെടുത്തത്.

"കാമുകിയുമായുള്ള ബന്ധം വളരെ സീരിയസായിരുന്നു. അവളുടെ മാതാപിതാക്കളെ കാണുന്നതിന് മുമ്പ് ശരീരഭാരം കുറയ്ക്കണമെന്ന് ലി ആഗ്രഹിച്ചു. വിവാഹത്തിന് തയ്യാറെടുക്കുന്നതിനാലാണ് അയാൾ അത് ചെയ്തത്," ലീയുടെ സഹോദരൻ സൗത്ത് ചൈന മോർണിംഗ് പോസ്റ്റിനോട് (SCMP) പറഞ്ഞു.

സെപ്റ്റംബർ 30-ന് ഷെങ്‌ഷൗവിലെ നയന്ത് പീപ്പിൾസ് ഹോസ്പിറ്റലിൽ പ്രവേശിപ്പിച്ച ലീയെ ഒക്ടോബർ 2-നാണ് ശസ്ത്രക്രിയയ്ക്ക് വിധേയനാക്കിയത്. ശസ്ത്രക്രിയ വിജയകരമായിരുന്നുവെന്ന് ഡോക്ടർമാർ ആദ്യം അറിയിക്കുകയും ചെയ്തിരുന്നു. നിരീക്ഷണത്തിനായി തീവ്രപരിചരണ വിഭാഗത്തിൽ (ഐസിയു) പ്രവേശിപ്പിച്ച ശേഷം, ആരോഗ്യനില മെച്ചപ്പെട്ടതിനെ തുടർന്ന് ജനറൽ വാർഡിലേക്ക് മാറ്റുകയും ചെയ്തു. എന്നാൽ, ഒക്ടോബർ 4-ന് രാവിലെ ലീയുടെ നില പെട്ടെന്ന് വഷളായി. ഒക്ടോബർ 5-ന് അദ്ദേഹം മരിച്ചു.

 

 

മെറ്റബോളിക് സിൻഡ്രോം, രക്താതിമർദ്ദം, ഫാറ്റി ലിവർ രോഗം തുടങ്ങിയ നിരവധി ആരോഗ്യപ്രശ്നങ്ങളുള്ള വ്യക്തിയായിരുന്നു ലി. ഈ പശ്ചാത്തലത്തിൽ, ശസ്ത്രക്രിയക്ക് അനുമതി നൽകുന്നതിന് മുമ്പ് ആശുപത്രി അദ്ദേഹത്തിന്റെ മൊത്തത്തിലുള്ള ആരോഗ്യം ശരിയായി വിലയിരുത്തിയിരുന്നോ എന്ന് ലീയുടെ കുടുംബം ചോദ്യം ഉന്നയിച്ചു.

ലി ശസ്ത്രക്രിയയ്ക്കുള്ള എല്ലാ ക്ലിനിക്കൽ മാനദണ്ഡങ്ങളും പാലിച്ചിരുന്നുവെന്നും, നില വഷളായപ്പോൾ ജീവനക്കാർ വേഗത്തിൽ പ്രതികരിച്ചുവെന്നും ആശുപത്രി അധികൃതർ ജിമു ന്യൂസിനോട് പറഞ്ഞു. മരണകാരണം കൃത്യമായി കണ്ടെത്താൻ പോസ്റ്റ്‌മോർട്ടം നടത്താൻ പ്രാദേശിക ആരോഗ്യ കമ്മീഷനോട് കുടുംബവും ആശുപത്രിയും സംയുക്തമായി അഭ്യർത്ഥിച്ചിരുന്നു.

"മരണകാരണം നിർണ്ണയിക്കുന്നതിനുള്ള ഏറ്റവും ആധികാരികമായ അടിസ്ഥാനം അന്തിമ പോസ്റ്റ്‌മോർട്ടം റിപ്പോർട്ടായിരിക്കും," ആശുപത്രി വ്യക്തമാക്കി. പോസ്റ്റ്‌മോർട്ടത്തിൽ എന്തെങ്കിലും പിഴവോ അശ്രദ്ധയോ കണ്ടെത്തിയാൽ നിയമപ്രകാരം ഉത്തരവാദിത്തം ഏറ്റെടുക്കുമെന്നും അധികൃതർ കൂട്ടിച്ചേർത്തു.