തിരുവനന്തപുരം: തൈക്കാട് സംഘര്‍ഷത്തിനിടെ 19കാരന്‍ കൊല്ലപ്പെട്ട സംഭവത്തില്‍ അക്രമി സംഘത്തിലെ അഞ്ച് പേരെ തിരിച്ചറിഞ്ഞു. കാപ്പാ കേസ് പ്രതി ഉള്‍പ്പെടെ നിലവില്‍ കസ്റ്റഡിയിലുണ്ട്. കൊലപാതകം ആസൂത്രിതമാണെന്ന് നിഗമനത്തിലാണ് പൊലിസ്. 

വിദ്യാര്‍ഥികള്‍ തമ്മിലുള്ള  തമ്മിലുള്ള തര്‍ക്കത്തില്‍ മധ്യസ്ഥതയ്ക്ക് എത്തിയ രാജാജിനഗര്‍ സ്വദേശി അലന്‍(19) ആണ് കൊല്ലപ്പെട്ടത്. ഇന്നലെ വൈകീട്ട് ഏഴ് മണിയോടെ നഗരത്തില്‍ തൈക്കാട് ശാസ്താ ക്ഷേത്രത്തിന് സമീപത്തായിരുന്നു കൊലപാതകം. 

ഫുട്‌ബോള്‍ കളിയുമായി ബന്ധപ്പെട്ട തര്‍ക്കമാണ് കൊലപാതകത്തിലേക്ക് നയിച്ചതെന്നാണ് പ്രാഥമിക നിഗമനം. ജഗതി കോളനിയിലെയും ചെങ്കല്‍ചൂളയിലേയും ( രാജാജി നഗര്‍) വിദ്യാര്‍ഥികള്‍ തമ്മിലുണ്ടായ അടിപിടിയില്‍ മധ്യസ്ഥതയ്ക്ക് എത്തിയതായിരുന്നു കൊല്ലപ്പെട്ട അലന്‍. 

തൈക്കാട് മോഡല്‍ സ്‌കൂളില്‍ പഠിക്കുന്ന വിദ്യാര്‍ഥികള്‍ രണ്ട് ഗ്യാങ്ങായി തിരിഞ്ഞ് കുറച്ച് നാളായി തര്‍ക്കവും സംഘര്‍ഷവുമുണ്ടായിരുന്നു. കൂട്ടയടിക്കിടെയാണ് കത്തിക്കുത്ത് ഉണ്ടായത്. മുപ്പതോളം വിദ്യാര്‍ഥികള്‍ സംഭവം നടക്കുമ്പോള്‍ പരിസരത്തുണ്ടായിരുന്നു.സ്‌കൂള്‍ യൂനിഫോം ധരിച്ച കുട്ടികളും സംഘത്തിലുണ്ടായിരുന്നുവെന്ന്  ദൃക്‌സാക്ഷികള്‍ പറഞ്ഞു. 

അലന്റെ നെഞ്ചിലാണ് കുത്തേറ്റത്. ഹൃദയത്തിനേറ്റ മുറിവ് കാരണമുള്ള ആന്തരിക രക്തസ്രാവമാണ് മരണകാരണം. മൂര്‍ച്ചയേറിയതും കനം കുറഞ്ഞതുമായ ആയുധം വാരിയെല്ലുകള്‍ക്കിടയിലൂടെ ഹൃദയത്തിലേക്കു തറച്ചുവെന്നാണ് ഡോക്ടര്‍മാരുടെ പ്രാഥമിക നിഗമനം. രണ്ടുപേര്‍ ചേര്‍ന്ന് ബൈക്കില്‍ അലനെ ആശുപത്രിയിലെത്തിക്കുമ്പോഴേക്കും മരിച്ചിരുന്നു. 

English summary: A 19-year-old youth named Alan, who had arrived to mediate a dispute between student groups, was stabbed to death during a violent clash at Thykad, Thiruvananthapuram. The incident occurred near the Thykad Sastha Temple around 7 pm. Police have identified five members of the attacking group, including a suspect already involved in a “Kappa” case, who is currently in custody.